ଯୋଗୀ ଆଦିତ୍ୟନାଥଙ୍କୁ ମୃତ୍ୟୁ ଧମକ ମିଳିଲା; କହିଲା ‘‘ଆପଣଙ୍କ ଜୀବନର ଆଉ ୪ ଦିନ ବାକି ଅଛି’’

ଲକ୍ଷ୍ନୌ: ଉତ୍ତର ପ୍ରଦେଶର ମୁଖ୍ୟ ମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ (Yogi Adityanath) ଜଣେ ଅଜ୍ଞାତ ବ୍ୟକ୍ତିଙ୍କଠାରୁ ମୃତ୍ୟୁ ଧମକ ମିଳିଥିବା ସୂଚନା ମିଳିଛି । ସେହି ବ୍ୟକ୍ତି ତାଙ୍କୁ ଚେତାବନୀ ଦେଇ କହିଛି ଯେ ଆଦିତ୍ୟନାଥଙ୍କ ଜୀବନରେ ‘‘ଆଉ ଚାରି ଦିନ ବାକି ଅଛି’’ (Yogi Adityanath death threat)।

ଉତ୍ତର ପ୍ରଦେଶ ପୋଲିସର (UP Police) ହ୍ୱାଟସ୍-ଆପ୍ ଜରୁରୀକାଳୀନ ଡାଏଲ୍ ନମ୍ବର ୧୧୨ରେ ଏହି ଧମକ ଆସିଛି । ସୁଶାନ୍ତ ଗଲ୍ଫ ସିଟି ଥାନାରେ ଏହାକୁ ନେଇ ଏକ ଅଭିଯୋଗ ଦାଖଲ କରାଯାଇଛି । କେଉଁ ନମ୍ବରରୁ ଏହି ଧମକ ଆସିଛି ତାହା ଜାଣିବା ପାଇଁ ପୋଲିସ ଉଦ୍ୟମ ଜାରି ରଖିଛି ।

ଧମକ ଦେଇଥିବା ବ୍ୟକ୍ତିଙ୍କୁ ଚିହ୍ନଟ କରିବା ପାଇଁ ଓ ତାଙ୍କୁ ଗିରଫ କରିବା ପାଇଁ ପୋଲିସ ଏକ ଟିମ୍ କାମରେ ଲଗାଇଛି । ଏପ୍ରିଲ ୨୯ ତାରିଖ ସନ୍ଧ୍ୟାରେ ଏହି ଧମକ ମିଳିଥିଲା ବୋଲି ଜଣେ ପୋଲିସ ଅଧିକାରୀ କହିଛନ୍ତି ।

ୟୁପିର ସି.ଏମ୍.ଙ୍କୁ ପ୍ରଥମ ଥର ପାଇଁ ମୃତ୍ୟୁ ଧମକ ମିଳିନାହିଁ । ଗତ ବର୍ଷ ସେପ୍ଟେମ୍ବର, ନଭେମ୍ବର ଓ ଡିସେମ୍ବରରେ ଆଦିତ୍ୟନାଥଙ୍କୁ ଧମକ ଦେଇ କଲ୍ ଆସିଥିଲା । ନଭେମ୍ବରରେ ଜଣେ ଯୁବକ ତାଙ୍କୁ ମୃତ୍ୟୁ ଧମକ ଦେଇଥିଲା ।

ନଭେମ୍ବରରେ ଜଣେ ୧୫ ବର୍ଷର ବାଳକ ଉତ୍ତର ପ୍ରଦେଶ ପୋଲିସର ୧୧୨ ହେଲ୍ପଲାଇନରେ ଏକ ବାର୍ତ୍ତା ପଠାଇଥିଲା । ପୋଲିସ ନାବାଳକର ମୋବାଇଲ୍ ଫୋନ୍ ନମ୍ବର ଆଗ୍ରାର ବୋଲି ଚିହ୍ନଟ କରି ତାକୁ ଗିରଫ କରିଥିଲା ଓ ଏକ ଶିଶୁ କାରାଗାରକୁ ପଠାଇଥିଲା । କରୋନା ଭାଇରସ୍ ମହାମାରୀକୁ (COVID-19) ଦୃଷ୍ଟିରେ ରଖି ରାଜ୍ୟରେ ସ୍କୁଲ ବନ୍ଦ ହେବାକୁ ନେଇ ସେହି ନାବାଳକ ନାରାଜ ଥିବା ପରେ ଜଣାପଡ଼ିଥିଲା ।

୨୦୧୭ଠାରୁ ଉତ୍ତର ପ୍ରଦେଶର ମୁଖ୍ୟ ମନ୍ତ୍ରୀଙ୍କୁ ଜେଡ୍-ପ୍ଲସ୍ ସଶସ୍ତ୍ର ସୁରକ୍ଷା କଭର୍ (Z + VVIP Security) ଦିଆଯାଇଛି ।

ଯୋଗୀ ଆଦିତ୍ୟନାଥ ଯେଉଁଆଡେ ଯାଆନ୍ତି ତାଙ୍କ ସହ ୨୫ରୁ ୨୮ ଜଣ ସଶସ୍ତ୍ର କମାଣ୍ଡୋ ଯାଆନ୍ତି । ଏବେ ତାଙ୍କ ସୁରକ୍ଷାକୁ ଆହୁରି ଅଧିକ ସୁଦୃଢ଼ କରାଯାଇଛି ବୋଲି ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି ।

ଏଣିକି ଯୋଗୀ ଆଦିତ୍ୟନାଥ ଦେଶର ବିଭିନ୍ନ ସ୍ଥାନକୁ ଗଲେ ତାଙ୍କ ସହ ସି.ଆଇ.ଏସ୍.ଏଫ୍. କମାଣ୍ଡୋଙ୍କ ଏକ ଶକ୍ତିଶାଳୀ ଟିମ୍ ରହିବ । ତାଙ୍କ ସରକାରୀ ବାସଭବନରେ ଏଭଳି କମାଣ୍ଡୋମାନଙ୍କ ଏକ ଟିମ୍ ନିୟୋଜିତ କରାଯିବ ବୋଲି ବି କୁହାଯାଇଛି ।