ନା କୋଚିଂ ନା ଟେଷ୍ଟ୍ ସିରିଜ୍; କେବଳ ଇଣ୍ଟରନେଟ୍ ବ୍ୟବହାର କରି IAS ହେଲେ ଏହି ଯୁବତୀ

ଦେଶରେ ଏମିତି ଅନେକ ପ୍ରତିଭାବାନ୍ ଯୁବକଯୁବତୀ ଅଛନ୍ତି ଯେଉଁମାନେ କଠିନ କାର୍ଯ୍ୟକୁ ନିଜେ ସହଜ କରନ୍ତି ଓ ସଫଳତା ପାଆନ୍ତି । ଏମିତି ଜଣେ ଯୁବତୀ ହେଉଛନ୍ତି ଭାରତୀୟ ପ୍ରଶାସନିକ ସେବାର ଅଧିକାରୀ ଅନୁକୃତି ଶର୍ମା । ସେ କେବେ କୌଣସି କୋଚିଂ ନେଇ ନାହାଁନ୍ତି ବା କୌଣସି ଟେଷ୍ଟ୍ ସିରିଜରେ ଭାଗ ନେଇ ନାହାଁନ୍ତି । କିନ୍ତୁ ସେ IAS ହୋଇ ନିଜର ସ୍ୱପ୍ନକୁ ପୂରଣ କରିଛନ୍ତି ।

ଆଜିକାଲି ଯୁବକଯୁବତୀମାନେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି କୋଚିଂ ମାଧ୍ୟମରେ UPSC ଅର୍ଥାତ୍ ସିଭିଲ୍ ସର୍ଭିସ୍ ପରୀକ୍ଷା ପାଇଁ ପ୍ରସ୍ତୁତ ହେଉଥିବା ବେଳେ ଅନୁକୃତି ଶର୍ମା କେବଳ ଇଣ୍ଟରନେଟ୍ ମାଧ୍ୟମରେ ଅଧ୍ୟୟନ କରି ଏହି ସଫଳତା ହାସଲ କରିଛନ୍ତି । ତାଙ୍କର ଏହି ସଫଳତା ଅତି ଗୁରୁତ୍ୱପୂର୍ଣ୍ଣ କାରଣ ଭାରତୀୟ ପ୍ରଶାସନିକ ସେବା (Indian Administrative Service, IAS) ହେଉଛି ଦେଶରେ ସରକାରୀ ଚାକିରି ମଧ୍ୟରେ ସବୁଠାରୁ ଲୋକପ୍ରିୟ ଚାକିରି । ଏଥିରେ ଅର୍ଥ, ଖ୍ୟାତି, ଆଧିପତ୍ୟ ସହ ସମାଜରେ ପରିବର୍ତ୍ତନ ଆଣିବାର ସୁଯୋଗ ଥାଏ ।

ନିକଟରେ ଏକ ସାକ୍ଷାତକାରରେ ଜୟପୁରର ବାସିନ୍ଦା ଅନୁକୃତି ଶର୍ମା ୟୁପିଏସସି ସିଭିଲ୍ ସର୍ଭିସେସ୍ ପରୀକ୍ଷା ପାଇଁ ପ୍ରସ୍ତୁତ ହେଉଥିବା ଯୁବକମାନଙ୍କ ପାଇଁ ଅନେକ ସହଜ ଓ ଗୁରୁତ୍ୱପୂର୍ଣ୍ଣ ଟିପ୍ସ ଦେଇଛନ୍ତି । ତାଙ୍କ ସଫଳତାର କାହାଣୀ ସବୁ ଯୁବକଯୁବତୀଙ୍କୁ ନିଶ୍ଚୟ ପ୍ରେରଣା ଦେବ । ସିଭିଲ ସର୍ଭିସେସ୍ ପରୀକ୍ଷା ୨୦୧୯ରେ ୧୩୩ତମ ରାଙ୍କ୍ ହାସଲ କରିଥିବା ଅନୁକୃତି ‘ଦିଲ୍ଲୀ ନଲେଜ୍ ଟ୍ରେକ୍’କୁ ଏକ ସାକ୍ଷାତକାରରେ IAS ହେବା ପର୍ଯ୍ୟନ୍ତ ନିଜ ଜୀବନର କାହାଣୀଟି କହିଥିଲେ ।

‘‘ଭଲ ପ୍ରସ୍ତୁତି ବିନା ପରୀକ୍ଷାରେ ଉତ୍ତମ ଉତ୍ତର ଦେବା ଅତି କଷ୍ଟକର । କିନ୍ତୁ ଯଦି ଆମେ ଉତ୍ତର ଲେଖିବା ପାଇଁ ଆମର ନିଜସ୍ୱ ପ୍ରସ୍ତୁତିକୁ ମଜବୁତ କରୁ, ତେବେ ସେହି କାର୍ଯ୍ୟ ସହଜ ହୋଇଯାଏ । ମୁଁ ନିଜେ ସେଥି ପାଇଁ ପ୍ରାକ୍ଟିସ୍ କରିଥିଲି,’’ ସେ କହିଛନ୍ତି ।

ଅନୁକୃତିଙ୍କ IAS ହେବାର କାହାଣୀ ଅତି କୌତୁହଳପୂର୍ଣ୍ଣ । ସେ ଏକ ସାଧାରଣ ପରିବାରର ଝିଅ । ଅନ୍ୟ ଝିଅମାନେ ବିବାହ ପରେ ନିଜ ଘର, ପରିବାର ଓ ସମ୍ପର୍କୀୟମାନଙ୍କ ଯତ୍ନ ନେବାରେ ବ୍ୟସ୍ତ ରହନ୍ତି । ଅନେକ ଝିଅ ତ ନିଜ କରିୟର ପାଇଁ ବିବାହ କରନ୍ତି ନାହିଁ ବା ବିବାହ ସମୟକୁ ଘୁଞ୍ଚାଇ ଚାଲିଥାନ୍ତି । ହେଲେ ଅନୁକୃତିଙ୍କ IAS ହେବାର ଯାତ୍ରା ତାଙ୍କ ବିବାହ ପରେ ହିଁ ଆରମ୍ଭ ହୋଇଥିଲା । ସେ ବିବାହ ପରେ ହିଁ ଆଇଏଏସ୍ ହେବାକୁ ନିଷ୍ପତ୍ତି ନେଇଥିଲେ । ଅଉ ସେ ନିଜ ସ୍ୱପ୍ନକୁ ପୂରଣ କରିବାରେ ସଫଳ ହୋଇଥିଲେ ।

‘‘ମୁଁ ସିଭିଲ ସର୍ଭିସେସ୍ ପରୀକ୍ଷାର ପ୍ରସ୍ତୁତି ପାଇଁ ଲକ୍ଷ ଲକ୍ଷ ଟଙ୍କା ନେଇ କୋଚିଂ ଦେଉଥିବା ଇନଷ୍ଟିଚ୍ୟୁଟ୍ ଠାରୁ ଦୂରରେ ରହିଲି । ମୁଁ କୌଣସି ଅନଲାଇନ୍ କିମ୍ବା ଅଫଲାଇନ୍ ଟେଷ୍ଟ ସିରିଜରେ ବି ଭାଗ ନେଇ ନ ଥିଲି । ମୁଁ ସିଭିଲ ସର୍ଭିସ ପରୀକ୍ଷାର ପ୍ରସ୍ତୁତି ପାଇଁ କେବଳ ଇଣ୍ଟରନେଟକୁ ବ୍ୟବହାର କରିଥିଲି,’’ ସେ କହିଛନ୍ତି ।

ଏମିତି ନୁହେଁ ଯେ ଅନୁକୃତି ଇଣ୍ଟରନେଟ୍ ମାଧ୍ୟମରେ ପ୍ରସ୍ତୁତ ହୋଇ ନିଜ ପ୍ରଥମ ପ୍ରୟାସରେ ସଫଳ ପାଇଥିଲେ । ତାଙ୍କୁ ଚାରି ଥର ପରୀକ୍ଷା ଦେବାକୁ ପଡି଼ଥିଲା । ତା’ପରେ ଯାଇ ସେ IAS ହେବାରେ ସକ୍ଷମ ହୋଇଥିଲେ । ଭଲ ରାଙ୍କ୍ ନ ମିଳିବାରୁ ତାଙ୍କର ପ୍ରଥମ ତିନୋଟି ପ୍ରୟାସ ବିଫଳ ହୋଇଥିଲା । କିନ୍ତୁ ସେ ହାର ମାନି ନ ଥିଲେ ।

ଅନୁକୃତି ୨୦୧୭ର ପ୍ରଥମ ପ୍ରୟାସରେ ୩୫୫ତମ ରାଙ୍କ୍ ହାସଲ କରିଥିଲେ, କିନ୍ତୁ ସେଇଠି ଅଟକି ନ ଥିଲେ । ୨୦୧୮ରେ ପୁଣି ଥରେ ଆହୁରି ଭଲ ପ୍ରସ୍ତୁତି ପାଇଁ ସେ ଏକ ବିରତି ନେଇଥିଲେ । ଆଉ ୨୦୧୯ର ପ୍ରୟାସରେ ୧୩୮ତମ ରାଙ୍କ ହାସଲ କରିଥିଲେ ଓ IAS ହେବାକୁ ଯୋଗ୍ୟ ବିବେଚିତ ହୋଇଥିଲେ ।

ବିଜ୍ଞାନ ପୃଷ୍ଠଭୂମିର ଛାତ୍ରୀ ଥିବା ଅନୁକୃତି ଜୟପୁରର ଇଣ୍ଡୋ ଭାରତ ଇଣ୍ଟରନ୍ୟାସନାଲ ସ୍କୁଲରେ ଅଧ୍ୟୟନ କରିଥିଲେ। ୨୦୧୨ରେ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ସାଇନ୍ସ ଏଜୁକେସନ୍ ଆଣ୍ଡ ରିସର୍ଚ୍ଚ କୋଲକାତାରୁ ସେ BSMSରେ (ଭୂବିଜ୍ଞାନ) ସ୍ନାତକ ଡିଗ୍ରୀ ହାସଲ କରିଥିଲେ । 

ତା’ପରେ ସେ ପୋଷ୍ଟଗ୍ରାଜୁଏଟ୍ ହୋଇଥିଲେ ଓ ନେଟ୍ (NET) ପରୀକ୍ଷାରେ ବି ସଫଳ ହୋଇଥିଲେ । ପରେ ସେ ଅଧିକ ଅଧ୍ୟୟନ ପାଇଁ ଆମେରିକା ଯାଇଥିଲେ । ସେଠାରୁ ଫେରିବା ପରେ ସେ ସିଭିଲ ସର୍ଭିସ ପରୀକ୍ଷା ଦେବାକୁ ନିଷ୍ପତ୍ତି ନେଇଥିଲେ ।

ଅନୁକୃତିଙ୍କ ପିତା ସରକାରୀ ଚାକିରିରୁ ଅବସର ନେଇଛନ୍ତି ଓ ମା’ କଲେଜରୁ ଅବସର ନେଇଛନ୍ତି। ସିଭିଲ ସର୍ଭିସ ପରୀକ୍ଷା ଦେବାର ନିଷ୍ପତ୍ତି ନେବା ମାତ୍ରେ ଅନୁକ୍ତି ସିଲାବସ୍ ସଂଗ୍ରହ କରିଥିଲେ ଓ ସେହି ଅନୁଯାୟୀ ଇଣ୍ଟରନେଟରୁ ଅଧ୍ୟୟନ ସାମଗ୍ରୀ ବାହାର କରିଥିଲେ । ତା’ପରେ ସେ ଆରମ୍ଭ କରିଥିଲେ ପଏଣ୍ଟ-ଟୁ-ପଏଣ୍ଟ ପ୍ରସ୍ତୁତି ।

ଅନୁକୃତି କହିଛନ୍ତି, ‘‘ନିରନ୍ତର କଠିନ ପରିଶ୍ରମ ଓ ଇଣ୍ଟରନେଟ୍ ମାଧ୍ୟମରେ ଉନ୍ନତ ପ୍ରସ୍ତୁତି ସହିତ ଆପଣ ସିଭିଲ୍ ସର୍ଭିସ୍ ପରୀକ୍ଷାରେ ସଫଳତା ପାଇପାରିବେ ।’’

‘‘କେବଳ ନିଜକୁ ନିୟମିତ ପ୍ରସ୍ତୁତ କରିବା ଦରକାର,’’ସେ କହିଛନ୍ତି ।

ଅନୁକୃତିଙ୍କ ସଫଳତାର କାହାଣୀ ବିବାହିତ ମହିଳାମାନଙ୍କ ପାଇଁ ଅତି ପ୍ରେରଣାଦାୟୀ । (ସବୁ ଫଟୋ ସୌଜନ୍ୟ: ସୋସିଆଲ୍ ମିଡ଼ିଆ)