ସିଆଚୀନରେ ବରଫ ଝଡ଼କୁ ସାମ୍ନା କରି ଦେଶକୁ ସୁରକ୍ଷା ଦେଉଛନ୍ତି କ୍ଯାପଟେନ ଶିବା ଚୌହାନ

ବର୍ତ୍ତମାନ ରାଜସ୍ଥାନର ଶିବା ଚୌହାନ ମଧ୍ୟ ହିମାଳୟ ପର୍ବତର କରାକୋରାମ ପରିସରରେ ପ୍ରାୟ ୨୦ ହଜାର ଫୁଟ ଉଚ୍ଚରେ ଅବସ୍ଥିତ ବିଶ୍ୱର ସର୍ବୋଚ୍ଚ ଯୁଦ୍ଧକ୍ଷେତ୍ର ସିଆଚୀନରେ ଦେଶର ସୁରକ୍ଷା ପାଇଁ ନିୟୋଜିତ ହୋଇଛନ୍ତି। ପ୍ରଥମ ଥର ପାଇଁ ଏପରି କଠୋର ପରିସ୍ଥିତି ସହିତ ସିଆଚୀନ ଅଞ୍ଚଳରେ ଜଣେ ମହିଳାଙ୍କୁ ପୋଷ୍ଟ କରାଯାଇଛି।

ସିଆଚୀନରେ ପୋଷ୍ଟିଂ ହୋଇଥିବା ଶିବା ଚୌହାନ ୧୮ ଜୁଲାଇ ୧୯୯୭ ରେ ରାଜସ୍ଥାନର ଉଦୟପୁରରେ ରାଜେନ୍ଦ୍ର ସିଂ ଚୌହାନ ଏବଂ ଅଞ୍ଜଲି ଚୌହାନଙ୍କ ଝିଅ । ଉଦୟପୁରର ସେଣ୍ଟ ଆନ୍ଥୋନିଙ୍କ ସିନିୟର ସେକେଣ୍ଡାରୀ ସ୍କୁଲରୁ ଅଧ୍ୟୟନ ସମାପ୍ତ କରିବା ପରେ ସେ ଉଦୟପୁରର NJR ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିରୁ ସିଭିଲ୍ ଇଞ୍ଜିନିୟରିଂରେ ସ୍ନାତକ ହାସଲ କରିଥିଲେ।

ଶିବା ବହୁତ କମ୍ ବୟସରେ ପିତାଙ୍କୁ ହରାଇଥିଲେ ଓ ତାଙ୍କ ମା ତାଙ୍କର ଅଧ୍ୟୟନର ସମ୍ପୂର୍ଣ୍ଣ ଯତ୍ନ ନେଇଥିଲେ। ଶିବାଙ୍କ ପରିବାରରେ ତାଙ୍କର ଏକ ବଡ଼ ଭଉଣୀ ଶୁଭମ୍ ଚୌହାନ ଅଛନ୍ତି, ଯିଏ ଭାରତୀୟ ନ୍ୟାୟିକ ସେବାରେ ଯୋଗଦେବାକୁ ପ୍ରସ୍ତୁତ ହେଉଛନ୍ତି। ପିଲାଦିନରୁ ଶିବାଙ୍କର ଭାରତୀୟ ସେନାରେ ଯୋଗଦେବାକୁ ଇଚ୍ଛା ଥିଲା ଓ ଇଞ୍ଜିନିୟରିଂ କରିବା ପରେ ସେ ସେନାରେ ଯୋଗଦେବା ସ୍ୱପ୍ନକୁ ସାକାର କରିବା ଦିଗରେ ପଦକ୍ଷେପ ନେଇଥିଲେ।

୨୦୨୦ ରେ ଚେନ୍ନାଇର ଅଫିସର୍ସ ଟ୍ରେନିଂ ଏକାଡେମୀରେ ତାଲିମ ସମାପ୍ତ କରିବା ପରେ ତାଙ୍କୁ ମେ ୨୦୨୧ ରେ ଇଞ୍ଜିନିୟର ରେଜିମେଣ୍ଟରେ ଭର୍ତ୍ତି କରାଯାଇଥିଲା। ସେନା ଅଧିକାରୀ କହିଛନ୍ତି ଯେ ଏକ ମାସ ପାଇଁ ସିଆଚୀନ ବ୍ୟାଟ୍ ସ୍କୁଲରେ କଠୋର ତାଲିମ ପରେ ତିନି ମାସ ପାଇଁ ୧୫,୬୦୦ ଫୁଟ ଉଚ୍ଚରେ ଅବସ୍ଥିତ କୁମାର ପୋଷ୍ଟରେ ଶିବାଙ୍କୁ ପୋଷ୍ଟ କରାଯାଇଛି।

ଏହାପୂର୍ବରୁ ମହିଳାମାନେ କେବଳ ୯,୦୦୦ ଫୁଟ ଉଚ୍ଚରେ ଅବସ୍ଥିତ ସିଆଚୀନ୍ ବେସ୍ କ୍ୟାମ୍ପରେ ପୋଷ୍ଟ କରାଯାଇଥିଲା। ସେନା ଏକ ବିବୃତ୍ତିରେ କହିଛି, “ଭାରତୀୟ ସେନା ପାଇଁ ଏହା ଏକ ଗର୍ବର ମୁହୂର୍ତ୍ତ, କ୍ୟାପ୍ଟେନ ଶିବା ଚୌହାନଙ୍କୁ ବିଶ୍ୱର ସର୍ବୋଚ୍ଚ ଯୁଦ୍ଧକ୍ଷେତ୍ର ସିଆଚୀନରେ ପୋଷ୍ଟ କରାଯାଇଛି।

ଅନ୍ୟ ଅଧିକାରୀଙ୍କ ସହ ଏକ ମାସର ତାଲିମ ସଫଳ ହେବା ପରେ ସେ ଏହି ସୁଯୋଗ ପାଇଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଶିବା ଚୌହାନଙ୍କୁ ଏହି ସଫଳତା ପାଇଁ ଅଭିନନ୍ଦନ ଜଣାଇଛନ୍ତି।

ପ୍ରଧାନମନ୍ତ୍ରୀ ଏହାକୁ ମହିଳା ଶକ୍ତିର ଆଉ ଏକ ବିଜୟ ବୋଲି ବର୍ଣ୍ଣନା କରିଥିବାବେଳେ ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ଅଧିକରୁ ଅଧିକ ମହିଳା ସଶସ୍ତ୍ର ବାହିନୀରେ ଯୋଗଦେବା ଦେଖି ସେ ବହୁତ ଖୁସି। ଆଶା କରାଯାଉଛି ଯେ ସିଆଚେନ୍ର ଧଳା ବରଫରେ ଶିବାଙ୍କ ପାଦଚିହ୍ନ ଦେଶର ଅନେକ ଝିଅଙ୍କୁ ଏହି ରାସ୍ତାରେ ଚାଲିବାକୁ ପ୍ରେରଣା ଦେବ।