ଉତ୍ତର ପ୍ରଦେଶରେ ଆଠ ଜଣ ପୋଲିସ କର୍ମୀଙ୍କ ନିର୍ମମ ହତ୍ୟା ଘଟଣାର ମୁଖ୍ୟ ଅଭିଯୁକ୍ତ ବିକାଶ ଦୁବେର ପୋଲିସ ସ୍ୱତନ୍ତ୍ର ଟାସ୍କ ଫୋର୍ସ (STF) ସହ ଏନକାଉଣ୍ଟରରେ ମୃତ୍ୟୁ ଘଟିଛି । ବିକାଶ ଦୁବେ ଯେଉଁ ଗାଡ଼ିରେ ଯାଉଥିଲେ ତାହା ଦୁର୍ଘଟଣାର ଶିକାର ହୋଇଥିଲା । ଏହି ଘଟଣା ବାରା ପୋଲିସ ଷ୍ଟେସନ ପରିସର ନିକଟରେ ହୋଇଥିଲା । ଦୁର୍ଘଟଣାରେ କାରଟି ଓଲଟି ଯାଇଥିଲା । ସୂତ୍ରଙ୍କ ଅନୁସାରେ ବିକାଶ ଦୁବେ ଦୁର୍ଘଟଣା ପରେ ଦୌଡ଼ି ପଳାଇବାକୁ ଚେଷ୍ଟା କରୁଥିଲା । ସେହି ସମୟରେ ଏନକାଉଣ୍ଟରରେ ତା’ର ମୃତ୍ୟୁ ଘଟିଥିଲା ।
ଏସ୍.ଏସ୍.ପି.ଙ୍କ କହିବା ଅନୁଯାୟୀ ପୋଲିସ ଗାଡ଼ିଟି ଓଲଟି ପଡିବାର ସୁଯୋଗ ନେଇ ବିକାଶ ଦୁବେ ଖସିଯିବାକୁ ଚେଷ୍ଟା କରୁଥିଲା । ‘‘ଆମ ସ୍ୱତନ୍ତ୍ର ଟାସ୍କ ଫୋର୍ସର (STF) ଯବାନମାନେ ଏହି ଗାଡ଼ିକୁ ଫଲୋ କରୁଥିଲେ । ବିକାଶ ଦୁବେ ଜଣେ ପୋଲିସ୍ କର୍ମୀଙ୍କ ବନ୍ଧୁକ ଛଡ଼ାଇ ଖସିଯିବା ପରେ ସେମାନେ କମ୍ବିଂ କଲେ । ଫାୟାରିଂ ହେଲା, ଆଉ ଆତ୍ମରକ୍ଷା ପାଇଁ ବିକାଶ ଦୁବେ ଉପରେ ଗୁଳି ଚାଲିଲା । ଏହା ଦ୍ୱାରା ବିକାଶ ଦୁବେର ମୃତ୍ୟ ହୋଇଗଲା ।’’ ଏସ୍.ଏସ୍.ପି. ଆହୁରି ମଧ୍ୟ କହିଛନ୍ତି ଯେ ଏନକାଉଣ୍ଟର ବୋଲି ସେମିତି କିଛି କଥା ନାହିଁ । ‘‘ଆମେ ନ୍ୟାୟିକ ପ୍ରକ୍ରିୟା ଅନୁସରଣ କରୁ । ବିକାଶର ସବୁ ସହଯୋଗୀ ଗୁଣ୍ଡାଙ୍କୁ ଗିରଫ କରାଯିବ,’’ ସେ କହିଛନ୍ତି ।
ପୋଲିସ ସୂତ୍ରଙ୍କ ଅନୁଯାୟୀ ନିଜ ସ୍ୱୀକାରୋକ୍ତିରେ ବିକାଶ ଦୁବେ କହିଥିଲା ଯେ କାନପୁରରେ ଘଟିଥିବା ଘଟଣା ପରେ ପାଞ୍ଚ ଜଣ ପୋଲିସ କର୍ମଚାରୀଙ୍କ ମୃତ ଦେହକୁ ନିଜ ଘର ପାଖରେ ଥିବା ଗୋଟେ କୂଅ ପାଖପେ ଗୋଟିଏ ଉପରୋ ଆଉ ଗୋଟିଏ କରି ସେ ଗଦା କରିଥିଲା । ଏହା ଦ୍ୱାରା ସେଥିରେ ନିଆଁ ଲଗାଇ ସବୁ ପ୍ରମାଣ ନଷ୍ଟ କରିବା ପ୍ଲାନ୍ ଥିଲା । ନିଆଁ ଲଗାଇ ଜାଳିଦେବା ପାଇଁ ଘରେ ୫୦ ଲିଟର ଗ୍ୟାଲନ୍ ତେଲ ବି ପୂର୍ବରୁ ରଖାଯାଇଥିଲା । କିନ୍ତୁ ଶବଗୁଡ଼ିକୁ ଏକତ୍ର କରିବା ପରେ ତାକୁ ଆଉ ସେଥିରେ ନିଆଁ ଲଗାଇବାର ସୁଯୋଗ ମିଳି ନ ଥିଲା ଓ ସେ ଫେରାର ହୋଇଯାଇଥିଲା ।
