ପ୍ରସିଦ୍ଧ ଖେଳାଳି ଓ ସେମାନଙ୍କ ପତ୍ନୀଙ୍କ ମଧ୍ୟରେ ଟେନସନ ଥିବାର ଖବର ବାରମ୍ବାର ସାମନାକୁ ଆସେ । ଏହି ଝଗଡ଼ା କାରଣରୁ ବେଳେବେଳେ ପାରିବାରିକ ହିଂସା ହୁଏ ତ ବେଳେବେଳେ ସେମାନଙ୍କର ଏଫାୟାର୍ସ ଆରମ୍ଭ ହୋଇଥାଏ । ତୁର୍କୀର ପୂର୍ବତନ ଫୁଟବଲର୍ ଏମ୍ରେ ଆସିକଙ୍କ (Emre Asik) ଘରେ ମଧ୍ୟ ଏଭଳି ଘଟଣା ଘଟିଛି । ଖବର ଅନୁସାରେ ଏମ୍ରେ ଆସିକଙ୍କ ପତ୍ନୀ ୟାଗମୁରଙ୍କ ମଧ୍ୟରେ ଝଗଡ଼ା ଚାଲିଛି ଓ ଏହାର କାରଣ ହେଉଛି ଜଣେ ମହିଳାଙ୍କ ସହ ଆମ୍ରେଙ୍କ ଏଫାୟାର୍ । ଆଶ୍ଚର୍ଯ୍ୟଜନକ କଥା ହେଉଛି ଯେ ଆସିକଙ୍କ ପତ୍ନୀ ୟାଗମୁରଙ୍କ ଉପରେ ଅଭିଯୋଗ ଆସିଛି ଯେ ସେ ନିଜ ସ୍ୱାମୀଙ୍କୁ ହତ୍ୟା କରିବା ପାଇଁ ସୁପରୀ ଦେଇଛନ୍ତି ।
ତୁର୍କୀର ଖବରକାଗଜ ‘ହୁରିୟତ’ ଦାବି କରିଛି ଯେ ନିଜ ସ୍ୱାମୀ ଆସିକଙ୍କୁ ହତ୍ୟା କରାଇବା ପାଇଁ ୟାଗମୁର ଏକ ଚୁକ୍ତିଭିତ୍ତିକ ହତ୍ୟାକାରୀଙ୍କ (contract killer) ନିକଟକୁ ଯାଇ ତାଙ୍କୁ ୯ କୋଟି ୩୦ ଲକ୍ଷ ଟଙ୍କାରେ ଚୁକ୍ତିବଦ୍ଧ କରିଥିଲେ । ଦାବି କରାଯାଇଛି ଯେ ୟାଗମୁର ହିଁ ସେହି କଣ୍ଟ୍ରାକ୍ଟ କିଲରଙ୍କୁ ସ୍ୱାମୀଙ୍କ ହତ୍ୟା ପାଇଁ ଅସ୍ତ୍ର ଯୋଗାଇ ଦେଇଥିଲେ । ଶବକୁ ଠିକ୍ ଜାଗାରେ ଫିଙ୍ଗିବାରେ ସାହାଯ୍ୟ କରିବାକୁ ବି ପ୍ରତିଶୃତି ଦେଇଥିଲେ ୟାଗମୁର୍ ।
ହେଲେ ଆସିକଙ୍କ ଭାଗ୍ୟ ଭଲ ଥିଲା ଓ ସେ ବଞ୍ଚିଯାଇଥିଲେ । ତୁର୍କୀର ଖବରକାଗଜ ଦାବି କରିଛି ଯେ ଏହି ହତ୍ୟାକାଣ୍ଡ ପୂର୍ବରୁ ଚୁକ୍ତିଭିତ୍ତିକ ହତ୍ୟାକାରୀ ଜଣକଙ୍କ ମନ ବଦଳିଗଲା ଓ ସେ ନିଜେ ହିଁ ଆସିକଙ୍କୁ ତାଙ୍କ ପତ୍ନୀଙ୍କ ଷଡ଼ଯନ୍ତ୍ର ବିଷୟରେ କହିଥିଲେ । ହତ୍ୟା ପାଇଁ ଏହି ଚୁକ୍ତି ସାମନାକୁ ଆସିବା ପରେ ଆସିକଙ୍କ ପତ୍ନୀ ୟାଗମୁର୍ ଓ କଣ୍ଟ୍ରାକ୍ଟ କିଲର୍ ସୁଙ୍ଗୁରଙ୍କୁ ଗିରଫ କରାଯାଇଛି । ସେମାନଙ୍କ ଉପରେ ଏବେ ହତ୍ୟା ଷଡ଼ଯନ୍ତ୍ରର ମାମଲା କୋର୍ଟରେ ଚାଲିବ ।
