ମୋଦିଙ୍କ ସହ ଗୁପଚୁପ ଖାଇଲେ ଜାପାନ PM; ଭାରତୀୟ ଖାଦ୍ୟର କଲେ ପ୍ରଶଂସା

ଜାପାନର ପ୍ରଧାନମନ୍ତ୍ରୀ ଫୁମିଓ କିଶିଦା ଦୁଇ ଦିନିଆ ଭାରତ ଗସ୍ତରେ ଆସିଛନ୍ତି। ସୋମବାର ସକାଳେ ଭାରତ ଆସିବା ପରେ ଦୁଇ ନେତାଙ୍କ ମଧ୍ୟରେ କଥାବାର୍ତ୍ତା ହୋଇଥିଲା। ଚଳିତ ବର୍ଷ ମେ ମାସରେ ହିରୋସିମା ଠାରେ ଅନୁଷ୍ଠିତ G7 ନେତାଙ୍କ ସମ୍ମିଳନୀରେ ସେ ମୋଦିଙ୍କୁ ଆମନ୍ତ୍ରଣ କରିଥିଲେ, ଯାହା ପ୍ରଧାନମନ୍ତ୍ରୀ ଗ୍ରହଣ ମଧ୍ୟ କରିଥିଲେ।

ଗୁପଚୁପ , ଆମ୍ ପନ୍ନା ଏବଂ ଲସି ପିଉଥିବାର ଏକ ଭିଡିଓ ମଧ୍ୟ ସାମ୍ନାକୁ ଆସିଛି ଯେଉଁଥିରେ ସେ ମସଲାଯୁକ୍ତ ଭାରତୀୟ ଖାଦ୍ୟ ଖାଉଥିବା ଦେଖିବାକୁ ମିଳିଛି। ଏଥି ସହିତ ଅନେକ ଲୋକ ସୋସିଆଲ ମିଡିଆରେ ଟ୍ୱିଟ କରି ଚିନ୍ତା ପ୍ରକଟ କରିଛନ୍ତି ଯେ ରାଗ ଏବଂ ଖଟା ଭାରତୀୟ ଖାଦ୍ୟ ସାମଗ୍ରୀ ଖାଇବା ଦ୍ୱାରା ଜାପାନ ପିଏମଙ୍କ ସ୍ୱାସ୍ଥ୍ୟ ଖରାପ ହେବନି ତ? ତେବେ ଭିଡିଓରେ ଦେଖି ଯାହା ଲାଗୁଛି ତାଙ୍କୁ ମସଲାଯୁକ୍ତ ଖାଦ୍ୟ ଖାଇବାରେ କୌଣସି ଅସୁବିଧା ହେଉନାହିଁ। ପ୍ରତିରକ୍ଷା, ସୁରକ୍ଷା, ବାଣିଜ୍ୟ, ପୁଞ୍ଜି ବିନିଯୋଗ ଏବଂ ଉଚ୍ଚ ପ୍ରଯୁକ୍ତିବିଦ୍ୟା ପରି ଦୁଇ ଦେଶ ମଧ୍ୟରେ ସମ୍ପର୍କକୁ ଆହୁରି ସୁଦୃଢ଼ କରିବା ପାଇଁ ଜାପାନ ପ୍ରଧାନମନ୍ତ୍ରୀ ଭାରତ ଗସ୍ତରେ ଆସିଛନ୍ତି।

ତେବେ ଏହି ସମୟରେ ପିଏମ ମୋଦି ଫୁମିଓ କିଶିଦାଙ୍କ ସହ ମିଶି ଏକ ବୁଦ୍ଧ ମୂର୍ତ୍ତି ଉପସ୍ଥାପନ କରିଥିଲେ। ଅଧିକାରୀମାନେ କହିଛନ୍ତି ଯେ ଏହା ଚନ୍ଦନ କାଠରେ ନିର୍ମିତ। ଏହାର ଖୋଦନ କଳା ହେଉଛି ଏକ ସୂକ୍ଷ୍ମ ତଥା ପ୍ରାଚୀନ ହସ୍ତଶିଳ୍ପ ଯାହାକି ଦକ୍ଷିଣ ଭାରତୀୟ ରାଜ୍ୟରେ ଶତାବ୍ଦୀ ଧରି ନିର୍ମିତ ହେଇଆସୁଛି।

ଆଲୋଚନା ସମୟରେ ଉଭୟ ଦେଶର ନେତାମାନେ ଭାରତ-ଜାପାନର ବିଶ୍ୱସ୍ତରୀୟ ରଣନୀତିକ ଭାଗିଦାରୀକୁ ଆଗକୁ ନେବାକୁ ନିଷ୍ପତ୍ତି ନେଇଥିଲେ।

ଏହାପୂର୍ବରୁ କିଶିଦାଙ୍କୁ ଭାରତକୁ ସ୍ୱାଗତ କରି ପ୍ରଧାନମନ୍ତ୍ରୀ ମୋଦି କହିଥିଲେ, ‘‘ପିଏମ ଫୁମିଓ କିଶିଦା ଏବଂ ମୁଁ ବର୍ଷକୁ ଅନେକ ଥର ସାକ୍ଷାତ କରିଛୁ ଏବଂ ପ୍ରତ୍ୟେକ ଥର ମୁଁ ଭାରତ-ଜାପାନ ଦ୍ୱିପାକ୍ଷିକ ସମ୍ପର୍କ ପ୍ରତି ତାଙ୍କର ସକରାତ୍ମକତା ଏବଂ ପ୍ରତିବଦ୍ଧତା ଅନୁଭବ କରିଛି। ତାଙ୍କର ଆଜିର ଗସ୍ତ ଏହି ଗତି ବଜାୟ ରଖିବାରେ ଲାଭଦାୟକ ହେବ।

ଏହି ସମୟରେ ଜାପାନ ପ୍ରଧାନମନ୍ତ୍ରୀ କହିଛନ୍ତି, ଭାରତ ସହିତ ଆମର ଆର୍ଥିକ ସହଯୋଗ ଦ୍ରୁତ ଗତିରେ ବୃଦ୍ଧି ପାଉଛି | ଏହା କେବଳ ଭାରତର ବିକାଶରେ ସହାୟକ ହେବ ନାହିଁ, ଜାପାନ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ ଆର୍ଥିକ ସୁଯୋଗ ସୃଷ୍ଟି କରିବ।