ମେକ୍ସିକୋ ସିଟିରେ ଏକ ମେଟ୍ରୋ ଟ୍ରେନ୍ ଓଭରବ୍ରିଜ୍ ଭୁଶୁଡି ପଡିବାରୁ ଏହା ଉପରେ ଯାଉଥିବା ଏକ ଟ୍ରେନ୍ ତଳକୁ ଗଳି ପଡ଼ିଲା । ଏହି ଭୀଷଣ ଦୁର୍ଘଟଣାରେ ପିଲାମାନଙ୍କ ସମେତ ଅତି କମରେ ୨୩ ଜଣଙ୍କର ମୃତ୍ୟୁ ଘଟିଛି । ଏକ ବ୍ୟସ୍ତବହୁଳ ରାସ୍ତା ଉପରେ ଦୁଇଟି ଡବା ଓଭରବ୍ରିଜରୁ ତଳକୁ ଓହଳି ରହିଥିଲା । ଏହି ଦୁର୍ଘଟଣାରେ ଅତି କମରେ ୬୫ ଜଣ ଆହତ ହୋଇଥିବା ବେଳେ ସାତ ଜଣଙ୍କ ଅବସ୍ଥା ଗୁରୁତର ରହିଛି । ଟ୍ରେନ୍ ଓ ପୋଲର ଧ୍ୱଂସାବଶେଷ ତଳେ ଫସିଯାଇଥିବା ଏକ କାର୍ ଭିତରୁ ଜଣେ ବ୍ୟକ୍ତିଙ୍କୁ ଜୀବନ୍ତ ଟାଣି ବାହାର କରାଯାଇଥିଲା। ଦୁନିଆର ଅନ୍ୟତମ ସବୁଠୁ ବ୍ୟସ୍ତବହୁଳ ମେଟ୍ରୋ ଟ୍ରେନ୍ ସେବା ଥିବା ମେକ୍ସିକୋ ସିଟିରେ ଗତ ଅନେକ ଦଶନ୍ଧି ମଧ୍ୟରେ ଏହା ସବୁଠାରୁ ଭୟାନକ ଦୁର୍ଘଟଣା । ଏହି ଦୁର୍ଘଟଣା ମେକ୍ସିକୋ ସିଟିର ଦକ୍ଷିଣ-ପୂର୍ବରେ ଥିବା ମେଟ୍ରୋ ଲାଇନ୍ ୧୨ରେ ସୋମବାର ସ୍ଥାନୀୟ ସମୟ ପ୍ରାୟ ରାତି ୧୦ଟା ବେଳେ ଘଟିଥିଲା । ମେକ୍ସିକୋ ସିଟିର ବାସିନ୍ଦାମାନେ ୨୦୧୭ରେ ଆସିଥିବା ଏକ ବଡ଼ ଭୂମିକମ୍ପ ପରେ ଏହି ରେଳ ପୋଲର ଢାଞ୍ଚାରେ ଫାଟ ସୃଷ୍ଟି ହୋଇଥିବା କହିଥିଲେ । ରାଷ୍ଟ୍ରପତି ଆଣ୍ଡ୍ରେସ ମାନୁଏଲ ଲୋପେଜ ଓବ୍ରାଡୋର୍ ମୃତ ଓ ଆହତ ଲୋକଙ୍କ ସମ୍ପର୍କୀୟମାନଙ୍କୁ ସମବେଦନା ଜଣାଇଛନ୍ତି ଓ କହିଛନ୍ତି ଯେ ଏହି ଦୁର୍ଘଟଣାର ଉଚ୍ଚସ୍ତରୀୟ ତଦନ୍ତ ହେବ । ମେକ୍ସିକୋବାସୀଙ୍କଠାରୁ କିଛି ଲୁଚାଯିବ ନାହିଁ ବୋଲି ସେ କହିଛନ୍ତି । ଯେଉଁ ଓଭରବ୍ରିଜଟି ଭାଙ୍ଗିପଡ଼ଲା ତାହା ମାତ୍ର ନଅ ବର୍ଷ ତଳେ ତିଆରି ହୋଇଥିଲା । ସବୁ ଫଟୋ: ହେନରୀ ରୋମେରୋ/ରୟଟର୍ସ୍)
