ଗ୍ରାହକଙ୍କୁ ଝଟକା: ୭୦ ହଜାର ଛୁଇଁବ ସୁନା! ୧୦ ଦିନରେ ବଢ଼ିଲାଣି ୫ ହଜାର ଟଙ୍କା

ଆମେରିକା ଏବଂ ୟୁରୋପରେ ବ୍ୟାଙ୍କିଙ୍କ୍ କ୍ଷେତ୍ରରେ ଦେଖାଦେଇଥିବା ସଙ୍କଟ ଯୋଗୁଁ ସାରା ବିଶ୍ବ ଅର୍ଥନୀତି ପ୍ରଭାବିତ ହୋଇଛି। ବିଶ୍ବ ବଜାରରେ ସୁନା ଦର ବଢ଼ି ଚାଲିଛି। ଭାରତୀୟ ବଜାର ଉପରେ ଏହାର ଘୋର ପ୍ରଭାବ ପଡ଼ିଛି। ବର୍ଦ୍ଧିତ ସୁନା ଦର ମଧ୍ୟବିତ୍ତ ପରିବାରକୁ କଷ୍ଟ ଦେଉଛି।

ବିବାହ ଋତୁ ଜାରି ଥିବା ବେଳେ ଉଭୟ ବର ଓ କନ୍ୟା ପରିବାରକୁ ସୁନା କିଣିବା ପୂର୍ବରୁ ‌ଅନେକ ଥର ଚିନ୍ତା କରିବାକୁ ପଡୁଛି। ଏହାର କାରଣ ଗତ ଏକ ସପ୍ତାହ ହେଲା ବିନା ବ୍ରେକ୍‌ରେ ସୁନା ଦର ବଢ଼ି ଚାଲିଛି।

୨୨ କ୍ୟାରେଟ ସୁନା ଦର ବଢ଼ି ବଢ଼ି ୭୦ ହଜାର ଟଙ୍କାରେ ପହଞ୍ଚିବ ବୋଲି ଆଶଙ୍କା କରାଯାଉଛି। ତେଣୁ ସୁନା ବ୍ୟବସାୟୀ ଓ ଗ୍ରାହକଙ୍କ ଚିନ୍ତା ବଢ଼ିବାରେ ଲାଗିଛି। ଗତ ୧୨ ତାରିଖରେ ସୁନା ଦର ୫୧ ହଜାର ୭୩୦ ଟଙ୍କା ଥିଲା। ୧୯ ତାରିଖରେ ଏହା ୫୫ ହଜାର ୪୦୦ ଟଙ୍କାରେ ପହଞ୍ଚିଛି।

ଗତ ବର୍ଷ ମାର୍ଚ୍ଚ ୧୯ ତାରିଖରେ ୨୨ କ୍ୟାରେଟ୍‌ ସୁନା ୧୦ ଗ୍ରାମ ପିଛା ୪୭, ୪୫୦ ଟଙ୍କା ଥିଲା। ସେହିପରି ୫ ବର୍ଷ ପୂର୍ବରୁ ଅର୍ଥାତ ୨୦୧୮ ମାର୍ଚ୍ଚ ୧୯ ତାରିଖରେ ଏହାର ମୂଲ୍ୟ ୨୮,୮୬୦ ଟଙ୍କା ଥିଲା। ଅର୍ଥାତ ମାତ୍ର ୫ ବର୍ଷ ମଧ୍ୟରେ ସୁନା ଦର ପାଖାପାଖି ୨ ଗୁଣ ହୋଇସାରିଛି।

ସୁନା, ରୂପା ଦାମରେ ପ୍ରତିଦିନ ବୃଦ୍ଧି ଘଟୁଥିବା ବେଳେ ଗତ ୧୦ ଦିନ ମଧ୍ୟରେ ଭୁବନେଶ୍ୱରରେ ସୁନା ୧୦ ଗ୍ରାମ ପିଛା ଦର ୪ ହଜାର ୯୦୦ ଟଙ୍କା ବୃଦ୍ଧି ପାଇଛି। ସେହିପରି ରୂପା କିଲୋ ଦାମ ୫ ହଜାର ବୃଦ୍ଧି ପାଇଛି।