ପଶ୍ଚିମ ବଙ୍ଗର ଜଲପାଇଗୁଡ଼ିରେ ବିକାନୀର୍ ଏକ୍ସପ୍ରେସ ଟ୍ରେନ୍ ଦୁର୍ଘଟଣାଗ୍ରସ୍ତ ହୋଇଛି । ଏହି ଟ୍ରେନ୍ ଲାଇନଚ୍ୟୁତ ହେବାରୁ ସାତ ଜଣ ଯାତ୍ରୀଙ୍କର ମୃତ୍ୟୁ ଘଟିଛି ଓ ୬୦ରୁ ଅଧିକ ଗୁରୁତର ଆହତ ହୋଇଛନ୍ତି । ଆହତ ଯାତ୍ରୀମାନଙ୍କ ମଧ୍ୟରୁ କେତେକଙ୍କର ଅବସ୍ଥା ସଙ୍କଟାପନ୍ନ ରହିଛି । କିଛି ଯାତ୍ରୀ ଟ୍ରେନ୍ ଭିତରେ ଚାପି ହୋଇ ରହିଥିବା ଆଶଙ୍କା କରାଯାଉଛି । ଏହି ଦୁର୍ଘଟଣାରେ ଟ୍ରେନର ୧୨ଟି ବଗି କ୍ଷତିଗ୍ରସ୍ତ ହୋଇଛି । ପ୍ରାୟ ୨୫୦ରୁ ଅଧିକ ଯାତ୍ରୀଙ୍କୁ ଉଦ୍ଧାର କରାଯାଇଛି । ରେଳ ଧାରଣାରେ ଥିବା ଏକ କ୍ରାକ୍ ଯୋଗୁଁ ଟ୍ରେନର କିଛି ବଗି ଅନ୍ୟ ବଗି ଉପରେ ଚଢ଼ି ଯାଇଥିଲା । ଏନ୍.ଡି.ଆର୍.ଏଫ୍., ଏସ୍.ଡି.ଆର୍.ଏଫ୍. ଓ ରେଳବାଇ ପୋଲିସ ଉଦ୍ଧାର କାର୍ଯ୍ଯରେ ନିୟୋଜିତ ହୋଇଛନ୍ତି । କଟର୍ ମେସିନରେ ବଗିଗୁଡ଼ିକୁ କଟାଯାଇ ଫସି ରହିଥିବା ଲୋକଙ୍କୁ ବାହାର କରାଯାଉଛି । ଏହି ଘଟଣାର ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦିଆଯାଇଛି । ପଶ୍ଚିମ ବଙ୍ଗ ମୁଖ୍ଯ ମନ୍ତ୍ରୀ ମମତା ବାନାର୍ଜୀ ଏହି ଦୁର୍ଘଟଣାର ସମୀକ୍ଷା କରିବା ସହିତ ରିଲିଫ୍ ଓ ରେସକ୍ୟୁ ପାଇଁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ବିକାନୀରରୁ ଗୁଆହାଟୀ ଯାଉଥିବା ଏହି ଏକ୍ସପ୍ରେସ୍ ଟ୍ରେନ୍ ଜଳପାଇଗୁଡ଼ିର ମୋୟନାଗୁଡ଼ିରେ ଲାଇନଚ୍ୟୁତ ହୋଇଥିଲା । ରେଳବାଇ ପକ୍ଷରୁ ହେଲପ୍-ଲାଇନ୍ ନମ୍ବର ଜାରି କରିଯାଇଛି । ସେଗୁଡ଼ିକ ହେଉଛି ୦୩୬୨୭୩୧୬୨୨ ଓ ୦୩୬୧୨୭୩୧୬୨୩ ।
