ଅଯୋଧ୍ୟା ରାମ ମନ୍ଦିର ନିର୍ମାଣ: ଭୂମି ପୂଜନ ଉତ୍ସବ ପାଇଁ ଶ୍ରାବଣ ମାସରେ ହିଁ ଦୀପାବଳିର ଚମକ ଦିଶୁଛି

ରାମ ମନ୍ଦିର ନିର୍ମାଣ ପାଇଁ ଅଯୋଧ୍ୟାରେ ନାହିଁନଥିବା ଉତ୍ସାହ ଦେଖିବାକୁ ମିଳିଛି । ୫୫୦ ବର୍ଷର ଲମ୍ବା ଅପେକ୍ଷା ପୂରଣ ହେବାକୁ ଯାଉଛି । ମର୍ଯ୍ୟାଦା ପୁରୁଷ ଶ୍ରୀ ରାମଚନ୍ଦ୍ରଙ୍କ ଭବ୍ୟ ମନ୍ଦିରର ଶିଳାନ୍ୟାସର ଶୁଭ ସମୟ ପାଖେଇ ଆସିଛି । ଅଗଷ୍ଟ ୫ରେ ଭୂମି ପୂଜନ କରିବେ ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି ।

ମୋଦି ସର୍ବପ୍ରଥମେ ହନୁମାନଗଢ଼ି ଯିବେ। ସେଠାରେ ସେ ମାତ୍ର ୧୦ ମିନିଟ୍‌ ରହିବେ । ପରେ ଭୂମି ପୂଜନ କାର୍ଯ୍ୟକ୍ରମରେ ଯୋଗଦେବେ । ଏଥି ପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି ।

ପୂରା ଅଯୋଧ୍ୟାକୁ ସୁନ୍ଦର ଭାବେ ସଜା ଯାଇଛି । ଶିଳାନ୍ୟାସ ପୂର୍ବରୁ ଭଗବାନ ରାମଙ୍କ ନଗରୀରେ ଦୀପୋତ୍ସବ ଆରମ୍ଭ ହୋଇଯାଇଛି । ଶ୍ରାବଣ ମାସରେ ହିଁ ଦୀପାବଳିର ଚମକ ଦେଖିବାକୁ ମିଳିଛି । ସପ୍ତାହେ ଯାଏଁ ପାଳନ ହେବ ଦୀପୋତ୍ସବ । ସରଯୁ କୂଳରେ ଚମକିବ ଅଯୋଧ୍ୟା ।

୫ ଅଗଷ୍ଟରେ ଭୂମି ପୂଜା ଦିନ ରାମଲଲାଙ୍କ ପାଇଁ ଦୁଇଟି ବସ୍ତ୍ର ପ୍ରସ୍ତୁତ କରାଯାଇଛି । ପ୍ରଥମଟି ନବରତ୍ନରେ ତିଆରି ସବୁଜ ଏବଂ ଦ୍ବିତୀୟଟି କମଳା ରଙ୍ଗର ବସ୍ତ୍ର ପ୍ରସ୍ତୁତ ହୋଇଛି । ଗୋଟିଏ ଦିନରେ ହିଁ ରାମଲଲା ଦୁଇଟି ଯାକ ବସ୍ତ୍ର ପରିଧାନ କରିବେ ।

ଅଯୋଧ୍ୟାରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି । କୋଣ ଅନୁକୋଣରେ ସୁରକ୍ଷା କର୍ମୀ ମୁତୟନ ହୋଇଛନ୍ତି । ୪ ଅଗଷ୍ଟ ସନ୍ଧ୍ୟାରୁ ଅଯୋଧ୍ୟାରେ ପ୍ରବେଶ ଉପରେ କଟକଣା ଜାରି କରାଯାଇଛି ।

ରାମ ଜନ୍ମଭୂମିକୁ ସଂଯୋଗ କରୁଥିବା ରାସ୍ତା ସିଲ୍‌ କରାଯିବ । ଘର ଗୁଡ଼ିକର ଛାତ ଉପରେ ସ୍ନାଇପର ମୁତୟନ ରହିବେ । ମୋଟ ୩,୫୦୦ ସୁରକ୍ଷା କର୍ମୀଙ୍କୁ ମୁତୟନ କରାଯାଇଛି ।