ତାଲିବାନ ଭୟରେ ରାତାରାତି ଆଫଗାନିସ୍ତାନ ଛାଡ଼ି ପଳାଇ ଥିଲେ ଦେଶର ପ୍ରଥମ ମହିଳା ନିର୍ଦ୍ଦେଶିକା କରିମି

କାବୁଲ: ୨୩ ବର୍ଷ ପରେ ତାଲିବାନର ଶାସନ ଆଫଗାନିସ୍ତାନକୁ ପୁଣି ଫେରିଛି। ଏହାର ଖରାପ ପ୍ରଭାବ ସେଠାରେ ଥିବା ମହିଳା ଓ ବାଳିକାମାନଙ୍କ ଉପରେ ଦେଖାଯାଉଛି। ମହିଳା ଓ ବାଳିକାମାନେ ପୁନର୍ବାର ଶାରିଆ ନିୟମ ଅନୁଯାୟୀ କଠୋର ନିୟମ ପାଳନ କରିବାକୁ ବାଧ୍ୟ ହେଉଛନ୍ତି। ଦେଶ ଛାଡ଼ିବାକୁ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଛି। ଏହି ସମୟରେ ଆଫଗାନିସ୍ତାନର ପ୍ରସିଦ୍ଧ ଚଳଚ୍ଚିତ୍ର ନିର୍ଦ୍ଦେଶିକା ଶାହାରା କରିମି ତାଙ୍କ ଦୁଃଖ ବଖାଣିଛନ୍ତି ।

ଇଣ୍ଡିପେଣ୍ଡେଟ ସହ କଥାବାର୍ତ୍ତା କରି କରିମି ଆଫଗାନିସ୍ତାନର ଅବସ୍ଥା କିପରି ଅଛି ତାହା କହିଛନ୍ତି। ସେ କହିଛନ୍ତି, ‘‘ଏହା ଭୟାନକ। ଏହି ଘଟଣାଗୁଡ଼ିକର ଦସ୍ତାବିଜ ହେବା ଅତ୍ୟନ୍ତ ଜରୁରୀ, ଯାହା ଦ୍ବାରା ଭବିଷ୍ୟତରେ ଆଫଗାନିସ୍ତାନର ଏହି କଷ୍ଟଦାୟକ ସମୟକୁ ଭୁଲି ନ ଯାଆନ୍ତୁ ।

କରିମି ପୂର୍ବରୁ ତାଲିବାନର ଅତ୍ୟାଚାର ବିରୋଧରେ ସ୍ୱର ଉତ୍ତୋଳନ କରିବାକୁ ସାରା ବିଶ୍ୱରେ ଚଳଚ୍ଚିତ୍ର ସମ୍ପ୍ରଦାୟକୁ ଏକ ଚିଠି ଲେଖିଥିଲେ। ତାଙ୍କ ଚିଠି ସୋସିଆଲ ମିଡ଼ିଆରେ ଭାଇରାଲ ହୋଇଥିଲା। ସେ କହିଥିଲେ ଯେ ଅଗଷ୍ଟ ୧୫ରେ ସେ ଟଙ୍କା ଉଠାଇବା ପାଇଁ ବ୍ୟାଙ୍କରେ ପହଞ୍ଚିଥିଲେ। ଦୀର୍ଘ ସମୟ ଅପେକ୍ଷା କରିବା ପରେ ମଧ୍ୟ ସେମାନେ ଟଙ୍କା ପାଇଲେ ନାହିଁ। ହଠାତ୍ ଗୁଳିର ଶବ୍ଦ ସେ ଶୁଣିବାକୁ ପାଇଥିଲେ ।

ବ୍ୟାଙ୍କ ମ୍ୟାନେଜର କରିମିଙ୍କୁ ଯିବାକୁ କହିଥିଲେ। ମ୍ୟାନେଜର ତାଙ୍କୁ କହିଥିଲେ ଯେ ଆଫଗାନିସ୍ତାନର ସମସ୍ତେ ଆପଣଙ୍କୁ ଜାଣନ୍ତି, ତାଲିବାନ କାବୁଲର ଅତି ନିକଟତର ହୋଇଛି, ତେଣୁ ଆପଣ ଏଠାରୁ ଚାଲିଯିବା ଉଚିତ୍। ଫିଲ୍ମ ନିର୍ଦ୍ଦେଶିକା କହିଛନ୍ତି ଯେ ବ୍ୟାଙ୍କ ମ୍ୟାନେଜର ପଛ କବାଟ ଖୋଲି ତାଙ୍କୁ ସେଠାରୁ ପଳାଇବାକୁ କହିଥିଲେ ।

ତାଲିବାନ ଆଫଗାନିସ୍ତାନକୁ କାବୁ କରିବା ପରେ କରିମିଙ୍କୁ ୩୮ ବର୍ଷୀୟ କରିମିଙ୍କୁ ରାତାରାତି କାବୁଲ ଛାଡ଼ିବାକୁ ପଡ଼ିଲା। ସେ ବର୍ତ୍ତମାନ ୟୁକ୍ରେନର ରାଜଧାନୀ କିଭରେ ଅଛନ୍ତି। ସେ ଏହା ପୂର୍ବରୁ କାବୁଲ ରାସ୍ତାରେ ବୁଲୁଥିବା ଏକ ଭିଡିଓ ରେକର୍ଡ କରି ସେଠାରେ ଥିବା ପରିସ୍ଥିତି ବିଷୟରେ କହିଥିଲେ।

କରିମି ଆଫଗାନିସ୍ତାନ ଚଳଚ୍ଚିତ୍ର ସଙ୍ଗଠନର ପ୍ରଥମ ମହିଳା ନିର୍ଦ୍ଦେଶିକା । କରିମି ‘ହାୱା’, ‘ମରିୟମ’, ‘ଆୟଶା’ ପରି ପ୍ରସିଦ୍ଧ ଚଳଚ୍ଚିତ୍ର ନିର୍ମାଣ କରିଛନ୍ତି । ଏହି ଚଳଚ୍ଚିତ୍ରଗୁଡିକରେ ଆଫଗାନିସ୍ତାନର ମହିଳାମାନଙ୍କ ଜୀବନ ବିଷୟରେ କୁହାଯାଇଛି ।