ବିବାହର ମାତ୍ର ତିନି ମାସ ପରେ ମା’ ହେଲେ ବଲିଉଡ୍ ଅଭିନେତ୍ରୀ ଦିଆ ମିର୍ଜା; ପୁତ୍ର ଜନ୍ମ ଦେଲେ

ବଲିଉଡ ଅଭିନେତ୍ରୀ ଦିଆ ମିର୍ଜାଙ୍କ (Dia Mirza) ଘରେ ଏବେ କୁନି ଶିଶୁର ସ୍ୱର ଶୁଭୁଛି । ନିକଟରେ ସେ ଏକ ସୁନ୍ଦର ପୁତ୍ରକୁ ଜନ୍ମ ଦେଇଛନ୍ତି । ସୋସିଆଲ ମିଡି଼ଆରେ ସେ ନିଜ ପ୍ରଶଂସକମାନଙ୍କୁ ଏହି ଖୁସି ଖବର ଦେଇଛନ୍ତି ।

ଚଳିତ ବର୍ଷ ଫେବୃଆରୀ ୧୫ ତାରିଖରେ ଦିଆ ମିର୍ଜା ବ୍ୟବସାୟୀ ତଥା ନିବେଶକ ବୈଭବ ରେଖୀଙ୍କୁ (Vaibhav Rekhi) ବିବାହ କରିଥିଲେ । ବିବାହର ଦେଢ଼ ମାସ ପରେ ସେ ଗର୍ଭବତୀ ଥିବା ଖବର ନିଜ ପ୍ରଶଂସକମାନଙ୍କୁ ଜଣାଇଥିଲେ ।

ଏବେ ଦିଆ ମିର୍ଜା ନିଜ ପ୍ରଶଂସକମାନଙ୍କ ସହ ଏକ ଖୁସି ଖବର ଶେୟାର୍ କରିଛନ୍ତି । ନିଜ ଇନଷ୍ଟାଗ୍ରାମ ଆକାଉଣ୍ଟରେ ପୁଅର ଏକ ଝଲକ ଦେଇ ଦିଆ କହିଛନ୍ତି ଯେ ତାଙ୍କ ପୁଅ ୧୪ ମଇରେ ଜନ୍ମ ହୋଇଥିଲା । ବିଦେଶୀ ଲେଖକ ଏଲିଜାବେଥ ଷ୍ଟୋନଙ୍କ ଲେଖାରୁ କେତେକ ଧାଡି଼ ଶେୟାର୍ କରି ଦିଆ ଲେଖିଛନ୍ତି, ‘‘ଏକ ସନ୍ତାନ ପାଇବାର ଅର୍ଥ ଆପଣଙ୍କୁ ନିଷ୍ପତ୍ତି ନେବାକୁ ପଡ଼େ ଯେ ଆପଣଙ୍କ ହୃଦୟ ସର୍ବଦା ଆପଣଙ୍କ ଶରୀରରୁ ବାହାରି ଆଖପାଖରେ ଚାଲବୁଲ କରୁଥିବ।’’

ଦିଆ ଆହୁରି ଲେଖିଛନ୍ତି, ‘‘ଏହି ଶବ୍ଦଗୁଡ଼ିକ ବୈଭଭ ଓ ମୋ’ ଅନୁଭବର ଏକ ସମ୍ପୂର୍ଣ୍ଣ ଉଦାହରଣ ।ଆମର ହାର୍ଟଥ୍ରୋବ୍, ଆମ ପୁଅ ଅଭୟନ୍ ଆଜାଦ ରେଖୀ (AVYAAN AZAAD REKHI) ୧୪ ମଇରେ ଜନ୍ମଗ୍ରହଣ କରିଛି । ହସପିଟାଲରେ ଶୀଘ୍ର ପହଞ୍ଚିବା ପରେ ଆମର ଛୋଟ ଚମତ୍କାରକୁ ନବଜାତ ଆଇସିୟୁରେ ନର୍ସ ଓ ଡାକ୍ତରମାନେ ଯତ୍ନ ନେଇଥିଲେ ।’’

‘‘ମୋ’ ଗର୍ଭଧାରଣ ସମୟରେ ମୋତେ ହଠାତ୍ ମୋ’ ଉପରେ ଏକ ଅପରେସନ୍ କରିବାକୁ ପଡି଼ଥିଲା ।ସେହି କାରଣରୁ ମୋ’ର ଏକ ଗୁରୁତର ସଂକ୍ରମଣ ‘ସେପସିସ୍’ର ଆଶଙ୍କା ବଢ଼ିଯାଇଥିଲା ଓ ଏହା ମୋ’ ଜୀବନ ପ୍ରତି ବିପଦ ସୃଷ୍ଟି କରିଥିଲା । ଖୁସିର କଥା ଯେ ଆମର ଡାକ୍ତରଙ୍କ ସସମୟେ ଯତ୍ନ ଓ ହସ୍ତକ୍ଷେପ ସହିତ ଜରୁରୀକାଳୀନ ସି-ସେକ୍ସନ୍‌ ମାଧ୍ୟମରେ ଆମ ଶିଶୁର ନିରାପଦ ଜନ୍ମ ସୁନିଶ୍ଚିତ ହୋଇଥିଲା,’’ ଲେଖିଛନ୍ତି ଦିଆ ।

ସେ ଆହୁରି ଲେଖିଛନ୍ତି, ‘‘ଯେତେବେଳେ ଆମେ ଏହି ଦୁନିଆରେ ଆମର ଛୋଟ ପ୍ରାଣକୁ ଆଶ୍ଚର୍ଯ୍ୟରେ ଦେଖିଲୁ, ଆମେ ତା’ଠାରୁ ଶିଖିଲୁ ଯେ ଆମକୁ ସବୁ ନମ୍ରତା ସହିତ ବ୍ରହ୍ମାଣ୍ଡ ଓ ଈଶ୍ୱରଙ୍କ ଉପରେ ବିଶ୍ୱାସ କରିବାକୁ ପଡି଼ବ, ଭୟ କରିବାକୁ ହେବ ନାହିଁ ।’’ 

ଦିଆ ଲେଖିଛନ୍ତି ଯେ ସେ ନିଜ ପ୍ରଶଂସକମାନଙ୍କୁ ଧନ୍ୟବାଦ ଦେବାକୁ ଚାହୁଁଛନ୍ତି । ‘‘ଆପଣମାନଙ୍କ ଚିନ୍ତା ଆମ ପାଇଁ ବହୁତ କିଛି ।ଯଦି ଏହି ଖବର ପୂର୍ବରୁ ଶେୟାର୍‌ କରିବା ସମ୍ଭବ ହୋଇଥାନ୍ତା, ଆମେ ନିଶ୍ଚିତ ତାହା କରିଥାନ୍ତୁ । ଆପଣମାନଙ୍କ ପ୍ରେମ, ବିଶ୍ୱାସ ଓ ପ୍ରାର୍ଥନା ପାଇଁ ଧନ୍ୟବାଦ ।’’

ଦିଆଙ୍କ ଏହି ପୋଷ୍ଟ ଉପରେ ମନ୍ତବ୍ୟ ଦେଇ ଅନେକ ସେଲିବ୍ରିଟି ତାଙ୍କୁ ଅଭିନନ୍ଦନ ଜଣାଇଛନ୍ତି । ମଲାଇକା ଅରୋଡ଼ା ଏକ ହୃଦୟ ଇମୋଜି ପୋଷ୍ଟ କରିଛନ୍ତି । ବିପାଶା ବସୁ ଲେଖିଛନ୍ତି, ‘‘ପ୍ରେମ, ପ୍ରେମ, ପ୍ରେମ ଓ ବହୁତ ପ୍ରେମ ।’’

ଏହା ଉଭୟ ଦିଆ ଓ ବୈବଭଙ୍କର ଦ୍ୱିତୀୟ ବିବାହ ।ବିବାହ ସମୟରେ ଦିଆ ଗର୍ଭବତୀ ଥିଲେ ।

ଦିଆ ମିର୍ଜା

ନିଜ ପ୍ରଥମ ସ୍ୱାମୀ ସାହିଲ ସଙ୍ଘୀଙ୍କ (Sahil Sanghi) ସହ ଦିଆ ମିର୍ଜା । ଦୁହେଁ ୨୦୧୪ରେ ବିବାହ କରିଥିଲେ ଓ ୨୦୧୯ରେ ସେମାନଙ୍କର ଛାଡ଼ପତ୍ର ହୋଇଥିଲା ।