ରିଆଲିଟି କମ୍ପାନୀ ସୁପର୍ ଟେକ୍ ବିଲ୍ଡର୍ସକୁ (Supertech Builders) ଲାଗିଛି ସୁପ୍ରିମ୍ ଝଟକା । ନୋଏଡ଼ାରେ ସୁପର୍ ଟେକ୍ ବିଲ୍ଡର୍ସ ନାମକ କନଷ୍ଟ୍ରକସନ୍ କମ୍ପାନୀ ତିଆରି କରିଥିବା ୪୦ ମହଲା ବିଶିଷ୍ଟ ଟ୍ବିନ୍ ଟାୱାର୍ ଭାଙ୍ଗିବାକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମ୍ କୋର୍ଟ୍ । ଏତେ ବଡ଼ ବିଲ୍ଡିଂର ନିର୍ମାଣ ପଛରେ ନୋଏଡ଼ା ଡେଭଲପମେଣ୍ଟ ଅଥରିଟି ଓ ସୁପରଟେକ୍ ଜାଣିଶୁଣି ଆଇନ୍ ଉଲ୍ଲଙ୍ଘନ କରିଛନ୍ତି ବୋଲି ଅଗଷ୍ଟ ମାସରେ ସୁପ୍ରିମ୍ କୋର୍ଟ କହିଛନ୍ତି । ପରିବେଶ ଆଇନର ଉଲ୍ଲଂଘନ କରାଯାଇ ଏହି ଟ୍ବିନ୍ ଟାୱାର୍ ନିର୍ମାଣ କରାଯାଇଥିଲା । ଆସନ୍ତା ତିନି ମାସ ମଧ୍ୟରେ ଏହି ୪୦ ମହଲା ବିଶିଷ୍ଟ ଟାୱାର୍ ଭାଙ୍ଗିବାକୁ ସୁପ୍ରିମ୍ କୋର୍ଟର ବିଚାରପତି ଜଷ୍ଟିସ୍ ଡି. ୱାଇ. ଚନ୍ଦ୍ରଚୂଡ଼ (ଫଟୋରେ ବାମ) ଓ ଜଷ୍ଟିସ୍ ଏମ୍. ଆର୍. ଶାହଙ୍କ ଦୁଇ-ଜଣିଆ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି । ଭାଙ୍ଗିବା ପୂର୍ବରୁ ଦୁଇ ମାସ ମଧ୍ୟରେ ଫ୍ଲାଟ୍ ମାଲିକମାନଙ୍କୁ ସେମାନଙ୍କ ଟଙ୍କା ୧୨ ପ୍ରତିଶତ ସୁଧ ସହ ଫେରାଇବାକୁ କଡ଼ା ନିର୍ଦ୍ଦେଶ ଦେଇଛନ୍ତି ସୁପ୍ରିମ କୋର୍ଟ। ଟ୍ୱିନ୍ ଟାୱାରର ରେସିଡେଣ୍ଟ ୱେଲଫେୟାର୍ ଆସୋସିଏସନକୁ ମଧ୍ୟ ୨ କୋଟି ଟଙ୍କା ଦେବ ସୁପରଟେକ୍ କନଷ୍ଟ୍ରକସନ୍ କମ୍ପାନୀ। ହଜାରେ ଫ୍ଲାଟ୍ ଥିବା ଏହି ଟ୍ବିନ୍ ଟାୱାର୍ ଭାଙ୍ଗିବାକୁ ପୂର୍ବରୁ ୨୦୧୪ ଏପ୍ରିଲ ୧୧ ତାରିଖରେ ଆହ୍ଲାବାଦ ହାଇ କୋର୍ଟ ନିର୍ଦ୍ଦେଶ ଦେଇଥିଲେ । ସେତେବେଳେ ଚାରି ମାସ ମଧ୍ୟରେ ଟାୱାର୍ ଭାଙ୍ଗିବାକୁ ନିର୍ଦ୍ଦେଶ ଦିଆଯାଇଥିଲା । ତା’ ପରେ ଏହି ମାମଲା ସୁପ୍ରିମ୍ କୋର୍ଟକୁ ଆସିଥିଲା । ଏବେ ସୁପ୍ରିମ କୋର୍ଟ ତଳ କୋର୍ଟଙ୍କ ରାୟ କାଏମ୍ ରଖିଛନ୍ତି । ହେଲେ ଏହି ରାୟର ପୁନର୍ବିଚାର ପାଇଁ କୋର୍ଟରେ ଆବେଦନ କରିବାକୁ ପ୍ରସ୍ତୁତ ହେଉଛି ସୁପରଟେକ୍ କମ୍ପାନୀ ।
