Olympics Gold: ନୀରଜ ଚୋପ୍ରା କେମିତି ହୋଇଥିଲେ ସେନାରେ ସୁବେଦାର? ତାଙ୍କ ବିଷୟରେ ୧୦ଟି ବଡ଼ କଥା

୨୩-ବର୍ଷୀୟ ଅଲିମ୍ପିକ୍ସ ସ୍ୱର୍ଣ୍ଣ ପଦକ ବିଜେତା ନୀରଜ ଚୋପ୍ରା (Neeraj Chopra)

ଟୋକିଓ ଅଲିମ୍ପିକ୍ସ (Tokyo Olympics) ଭାରତ ପାଇଁ ସ୍ମରଣୀୟ ଥିଲା । ଦେଶ ନିଜ ଅଲିମ୍ପିକ୍ ଇତିହାସରେ ସର୍ବାଧିକ ସାତୋଟି ପଦକ ଏହି ଟୋକିଓ ଅଲିମ୍ପିକ୍ସରେ ଜିତିଛି । ସବୁଠୁ ବଡ଼ କଥା ହେଉଛି ଯେ ଟ୍ରାକ୍ ଏବଂ ଫିଲ୍ଡ ଇଭେଣ୍ଟରେ ଭାରତକୁ ସର୍ବ ପ୍ରଥମ ସ୍ୱର୍ଣ୍ଣ ପଦକ ଟୋକିଓ ଅଲିମ୍ପିକ୍ସରେ ମିଳିଛି ଓ ଏହା ଦେଶ ପାଇଁ ଜିତିଛନ୍ତି ନୀରଜ ଚୋପ୍ରା (Neeraj Chopra) ।

ନୀରଜ ଚୋପ୍ରା ଜାଭେଲିନ୍ ଥ୍ରୋ (javelin throw) ଇଭେଣ୍ଟରେ ୮୭.୫୮ ମିଟର ଦୂରକୁ ଜାଭେଲିନ୍‌ ଫିଙ୍ଗି ଭାରତ ପାଇଁ ଓ ନିଜଜ ପାଇଁ ସ୍ୱର୍ଣ୍ଣ ପଦକ ଜିତିଥିଲେ । ଏହା ଦ୍ୱାରା ଦେଶର ୧୦୦ ବର୍ଷ ପୁରୁଣା ଅପେକ୍ଷା ଶେଷ ହୋଇଥିଲା । ନୀରଜଙ୍କ ପୂର୍ବରୁ ମିଲଖା ସିଂ ଓ ପି.ଟି. ଉଷା ଏହି ସୌଭାଗ୍ୟର ବହୁତ ନିକଟବର୍ତ୍ତୀ ହୋଇ ବି ସେଥିରୁ ବଞ୍ଚିତ ରହିଯାଇଥିଲେ । କିନ୍ତୁ ନୀରଜ ସେହି ଆଶା ପୂରଣ କରି ଆଥଲେଟିକ୍ସରେ ଦେଶକୁ ପ୍ରଥମ ସ୍ୱର୍ଣ୍ଣ ପଦକ ଜିତାଇଥିଲେ । ତାଙ୍କ ପୂର୍ବରୁ ଅଭିନବ ବିନ୍ଦ୍ରା ୨୦୦୮ ବେଜିଂ ଅଲିମ୍ପିକ୍ସରେ ବ୍ୟକ୍ତିଗତ ଶୁଟିଂ ଇଭେଣ୍ଟରେ ସ୍ୱର୍ଣ୍ଣ ପଦକ ଜିତିଥିଲେ ।

ଆଥଲେଟ୍ ନୀରଜ ଚୋପ୍ରା ଭାରତୀୟ ସେନାରେ ସୁବେଦାର ଚାକିରି କରନ୍ତି । ଏଇଠି ଜାଣନ୍ତୁ ତାଙ୍କ ସେନା କରିୟର ସହିତ ଜଡି଼ତ ପାଞ୍ଚଟି ମଜାଦାର ତଥ୍ୟ ।

୨୦୧୬ରେ କ୍ରୀଡ଼ା କୋଟା ଅଧୀନରେ ନୀରଜ ଚୋପ୍ରାଙ୍କୁ ଭାରତୀୟ ସେନାରେ ନାଏବ୍‌ ସୁବେଦାର୍‌ ଭାବରେ ନିଯୁକ୍ତ କରାଯାଇଥିଲା । ତାଙ୍କର ପ୍ୟାରେଣ୍ଟ୍ ୟୁନିଟ୍ ହେଉଛି ୪ ରାଜପୁତାନା ରାଇଫଲ୍ସ ।

ସାଧାରଣତଃ ସେନା ବାହିନୀରେ ନାଏବ୍‌ ସୁବେଦାର୍‌ ପଦରେ କୌଣସି ଖେଳାଳି ସିଧାସଳଖ ନିଯୁକ୍ତ ହୁଅନ୍ତି ନାହିଁ । କିନ୍ତୁ ନୀରଜଙ୍କ ଖେଳ ରେକର୍ଡ ଏତେ ଉତ୍ତମ ଓ ସୁନ୍ଦର ଥିଲା ଯେ ତାଙ୍କୁ ସିଧାସଳଖ ନାଏବ୍‌ ସୁବେଦାର୍‌ ପଦବୀ ଦିଆଯାଇଥିଲା ।

ପୁଣେର ମିଶନ୍ ଅଲିମ୍ପିକ୍ ୱିଙ୍ଗ୍ ଓ ଆର୍ମି ସ୍ପୋର୍ଟସ୍ ଇନଷ୍ଟିଚ୍ୟୁଟରେ ତାଲିମ ପାଇଁ ନୀରଜଙ୍କୁ ଚୟନ କରାଯାଇଥିଲା । ମିଶନ୍ ଅଲିମ୍ପିକ୍ ୱିଙ୍ଗ ହେଉଛି ଉଦୀୟମାନ କ୍ରୀଡ଼ାବିତମାନଙ୍କୁ ତାଲିମ ଦେବା ପାଇଁ ଭାରତୀୟ ସେନାର ଏକ ପଦକ୍ଷେପ ।

୨୦୧୦ କମନୱେଲଥ୍‌ ଗେମ୍ସରେ ଜାଭେଲିନ୍ ଥ୍ରୋରେ ବ୍ରୋଞ୍ଜ ପଦକ ଜିତିଥିବା ସୁବେଦାର କାଶୀନାଥ ନାୟକ ନୀରଜ ଚୋପ୍ରାଙ୍କ ପ୍ରାରମ୍ଭିକ ପ୍ରଶିକ୍ଷକ ଥିଲେ ।

ଟୋକିଓ ଅଲିମ୍ପିକ୍ସ ପୂର୍ବରୁ ମଧ୍ୟ ନୀରଜ ଚୋପ୍ରା ଜର୍ମାନ୍‌ ପ୍ରଶିକ୍ଷକ ଉମେ ହୋନଙ୍କ (Ume Hohn) ଅଧୀନରେ ତାଲିମ୍‌ ନେଇଥିଲେ ।

୨୦୧୮ କମନୱେଲଥ୍‌ ଗେମ୍ସ ଓ ଏସୀୟାନ୍‌ ଗେମ୍ସରେ ନୀରଜ ଚୋପ୍ରା ସ୍ୱର୍ଣ୍ଣ ପଦକ ଜିତିଥିଲେ ।

କମନୱେଲଥ ଗେମ୍ସ ଓ ଏସୀୟାନ୍‌ ଗେମ୍ସରେ ସ୍ୱର୍ଣ୍ଣ ପଦକ ଜିତିବା ପରେ ହିଁ ନୀରଜ ଚୋପ୍ରାଙ୍କୁ ସେନାରେ ସୁବେଦାର ପଦବୀରେ ନିଯୁକ୍ତ କରାଯାଇଥିଲା ।

ନୀରଜ ଚୋପ୍ରାଙ୍କୁ ୨୦୧୮ରେ ଅର୍ଜୁନ ପୁରସ୍କାର ଓ ଭାରତୀୟ ସେନାର ବିଶିଷ୍ଟ ସେବା ସେବା ପଦକ ମଧ୍ୟ ପ୍ରଦାନ କରାଯାଇଥିଲା ।

ସ୍ଥଳ ସେନାର ମୁଖ୍ୟ ଜେନେରାଲ୍‌ ଏମ୍‌.ଏମ୍‌. ନରଭାଣେ ଓ ଭାରତୀୟ ସେନାର ସବୁ ରାଙ୍କର ସୁବେଦାରମାନେ ଜାଭେଲିନ୍ ଥ୍ରୋରେ ଦେଶର ପ୍ରଥମ ସ୍ୱର୍ଣ୍ଣ ପଦକ ଜିତିଥିବାରୁ ନୀରଜ ଚୋପ୍ରାଙ୍କୁ ଅଭିନନ୍ଦନ ଜଣାଇଛନ୍ତି । ସେନା ନିଜ ଅଫିସିଆଲ୍ ହ୍ୟାଣ୍ଡେଲରୁ ଟ୍ୱିଟ୍ କରି ଏହି କଥା କହିଛି ।

ଚିଫ୍‌ ଅଫ୍‌ ଡିଫେନ୍ସ ଷ୍ଟାଫ୍ ଜେନେରାଲ୍ ବିପିନ ରାୱତ କହିଛନ୍ତି ଯେ ନୀରଜ କେବଳ ସେନା ବାହିନୀକୁ ନୁହେଁ, ସାରା ଦେଶକୁ ନିଜ ଉପରେ ଗର୍ବ କରିବାର ସୁଯୋଗ ଦେଇଛନ୍ତି ।

ନୀରଜ ଚୋପ୍ରା ଆଜି ବିଶ୍ୱର ଶ୍ରେଷ୍ଠ ଜାଭେଲିନ୍‌ ଥ୍ରୋଅର୍‌ ହେବା ପଛରେ ହରିୟାଣାର ରୁଡ଼କୀର ନସୀମ ଅହମଦଙ୍କ (Naseem Ahmed) ପାଠଶାଳାର ବଡ଼ ଯୋଗଦାନ ରହିଛି । ହରିୟାଣାର ପଞ୍ଚକୁଲାରେ ରହି ନୀରଜ ଜାଭେଲିନ୍‌ ଫିଙ୍ଗିବାର ସବୁ କୌଶଳ ଶିଖିଥିଲେ ।

୧୪ ବର୍ଷ ପୂର୍ବେ ହରିୟାଣା ସରକାର ରୁଡ଼କୀର ତୋଡ଼ା କଲ୍ୟାଣପୁର ବାସିନ୍ଦା ନସିମ ଅହମ୍ମଦଙ୍କୁ ପଞ୍ଚକୁଲାର ଆବାସିକ ହଷ୍ଟେଲକୁ କୋଚ ଭାବରେ ପଠାଇଥିଲେ । ୨୦୧୧ ମସିହାରେ ନୀରଜ ଚୋପ୍ରା ନସିମ ଅହମ୍ମଦଙ୍କଠାରୁ ପ୍ରଶିକ୍ଷଣ ନେଇଥିଲେ ।

କୋଚ୍ ନସିମ ଅହମ୍ମଦ କହିଛନ୍ତି ଯେ ନୀରଜ ସର୍ବ ପ୍ରଥମେ ୨୦୧୬ରେ ପୋଲାଣ୍ଡରେ ଆୟୋଜିତ ଅଣ୍ଡର୍‌-୨୦ଏସୀୟାନ୍‌ ଟ୍ରାକ ଆଣ୍ଡ୍‌ ଫିଲ୍ଡ ପର୍ତିଯୋଗିତାରେ ସ୍ୱର୍ଣ୍ଣ ପଦକ ଜିତିବା ପରେ ସେ ବହୁତ ଖୁସି ହୋଇଥିଲେ ଓ ଆଜି ଟୋକିଓ ଅଲିମ୍ପିକ୍ସ ପରେ ତାଙ୍କ ଖୁସିର ସୀମା ନାହିଁ ।