ଭାରତୀୟ କ୍ରିକେଟ ଜଗତରେ ବାପା-ପୁଅ ଯୋଡ଼ି; କିଏ ସଫଳ, ଆଉ କିଏ ବିଫଳ

ଇଫତିଖାର ଅଲି ଖାନ ପଟୌଦି-ମନସୁର ଅଲି ଖାନ ପଟୌଦି- ଭାରତୀୟ କ୍ରିକେଟ ଦଳରେ ଇଫତିଖାର ଅଲି ଖାନ ପଟୌଦି ବେଶ ଜଣାଶୁଣା। ଅଳ୍ପ କିଛି କ୍ରିକେଟ ଲଭର୍ସ ହୁଏତ ଜାଣିଥିବେ ଇଫତିଖାର ଅଲି ଉଭୟ ଭାରତ ଏବଂ ଇଂଲଣ୍ଡ ପାଇଁ ଖେଳିଛନ୍ତି। ଆଉ ସିଡନୀରେ ନିଜର ପଦାର୍ପଣ ଟେଷ୍ଟରେ ୧୦୨ ରନର ଇନିଂସ ଖେଳିଥିଲେ ।

ଲାଲା ଅମରନାଥ-ମହିନ୍ଦର ଅମରନାଥ- ଲାଲା ଅମରନାଥ ଭାରତୀୟ କ୍ରିକେଟ ଇତିହାସରେ ଆଉ ଜଣେ ଜଣାଶୁଣା ନାଁ। ସ୍ବାଧୀନ ଭାରତର ପ୍ରଥମ ଅଧିନାୟକ ଥିଲେ ସେ। ଭାରତ ପାଇଁ ୨୪ଟି ଟେଷ୍ଟ ଖେଳିବା ସହ ୮୭୮ ରନ୍ ସଂଗ୍ରହ କରିଥିଲେ। ବାପାଙ୍କ ପରି ମହିନ୍ଦର ଅମରନାଥ ବି ଜଣେ ସଫଳ ଭାରତୀୟ କ୍ରିକେଟର। ୧୯୮୩ ବିଶ୍ବକପରେ ଭାରତକୁ ଐତିହାସିକ ବିଶ୍ବ ଚାମ୍ପିଅନ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଭାରତ ପାଇଁ ୬୯ଟି ଟେଷ୍ଟରୁ ୪ ହଜାର ୩୭୮ ରନ୍ ସଂଗ୍ରହ କରିଛନ୍ତି। ଯେଉଁଥିରେ ୧୧ଟି ଶତକ ଥିଲା।

ବିଜୟ ମଞ୍ଜେରକର ଏବଂ ସଞ୍ଜୟ ମଞ୍ଜେରକର- ବାପା-ପୁଅ କ୍ରିକେଟରଙ୍କ ସମସ୍ତେ ଜାଣନ୍ତି। ୧୯୫୧ରେ ବିଜୟ ମଞ୍ଜେରକର ଇଂଲଣ୍ଡ ବିପକ୍ଷରେ ଟେଷ୍ଟ କ୍ୟାରିଅର ଆରମ୍ଭ କରିଥିଲେ। ଭାରତ ପାଇଁ ୫୫ଟି ଟେଷ୍ଟ ଖେଳି ୩ ହଜାର ୨୦୮ ରନ୍ କରିଛନ୍ତି। ଯେଉଁଥିରେ ରହିଛି ୭ଟି ଶତକ। ତାଙ୍କ ପୁଅ ସଞ୍ଜୟ ମଧ୍ୟ ଭାରତୀୟ ଦଳ ପାଇଁ କ୍ରିକେଟ ଖେଳିବା ସହ ଏବେ ଭାଷ୍ୟକାର ଭାବେ ବେଶ ପରିଚିତ ନାଁ। ମିଡିଲ ଅର୍ଡର ବ୍ୟାଟସମ୍ୟାନ ସଞ୍ଜୟ ୩୭ଟି ଟେଷ୍ଟରୁ ୨ ହଜାର ୪୩ ରନ୍ ଏବଂ ୭୪ଟି ଦିନିକିଆରୁ ୧ ହଜାର ୯୯୪ ରନ୍ ସଂଗ୍ରହ କରିଛନ୍ତି।

ସୁନୀଲ ଗାଭାସ୍କର-ରୋହନ ଗାଭାସ୍କର- ଭାରତରେ କିମ୍ବଦନ୍ତୀ କ୍ରିକେଟର ଭାବେ ଜଣାଶୁଣା ନାଁ ହେଉଛି ସୁନୀଲ ଗାଭାସ୍କର। ଲିଟିଲ ମାଷ୍ଟର ଭାବେ ବି ପରିଚିତ। ସୁନୀଲ ମନୋହର ଗାଭାସ୍କର ୧୯୭୧ରୁ ୧୯୮୭ ପର୍ଯ୍ୟନ୍ତ ଭାରତ ପାଇଁ ଖେଳିଛନ୍ତି। ୱେଷ୍ଟଇଣ୍ଡିଜ ବିପକ୍ଷରେ ଟେଷ୍ଟ ଜୀବନ ଆରମ୍ଭ କରିଥିଲେ। ଭାରତ ପାଇଁ ୧୨୫ ଟେଷ୍ଟ ଖେଳି ୧୦ ହଜାର ୧୨୨ ରନ୍ ସଂଗ୍ରହ କରିଥିଲେ । ଗାଭାସ୍କରଙ୍କ ପୁଅ ରୋହନ ଗାଭାସ୍କର କିନ୍ତୁ ଏତେଟା ସଫଳ ହୋଇନାହାନ୍ତି। ଦେଶ ପାଇଁ ୧୧ଟି ଦିନିକିଆ ଖେଳିଛନ୍ତି ରୋହନ।

ଯୋଗରାଜ ସିଂ-ଯୁବରାଜ ସିଂ- ଭାରତୀୟ କ୍ରିକେଟର ଆଉ ଏକ ବାପ-ପୁଅ ଯୋଡ଼ି ହେଲେ ଯୋଗରାଜ ସିଂ ଓ ଯୁବରାଜ ସିଂ। ଯୋଗରାଜ ସିଂ ଭାରତ ପାଇଁ ଗୋଟିଏ ଟେଷ୍ଟ ଏବଂ ୬ଟି ଦିନିକିଆ ଖେଳିଛନ୍ତି। ହେଲେ ପୁଅ ଯୁବରାଜ ସିଂ କିନ୍ତୁ ବେଶ ସଫଳ । ୧୯ ବର୍ଷରୁ କମ୍ ବିଶ୍ବକପ ବିଜୟୀ ଦଳର ସଦସ୍ୟ ଥିବା ଯୁବରାଜ ପରେ ୨୦୦୭ ଟି-୨୦ ଏବଂ ୨୦୧୧ ଦିନିକିଆ ବିଶ୍ବକପ ଜିତାଇବାରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥିଲେ । ଜଣେ ଦକ୍ଷ ଅଲରାଉଣ୍ଡର ଭାବେ ଜଣାଶୁଣା । ଫିଲଡିଂରେ ବି ବିଚକ୍ଷଣ।

ରୋଜର ବିନ୍ନି-ଷ୍ଟୁଆର୍ଟ ବିନ୍ନି- ବର୍ତ୍ତମାନ ବିସିସିଆଇ ସଭାପତି ଥିବା ରୋଜର ବିନ୍ନି ଭାରତୀୟ କ୍ରିକେଟ ଦଳର ଆଉ ଏକ ବଡ଼ ନାଁ। ଜଣେ ଦକ୍ଷ ଅଲରାଉଣ୍ଡର ଥିଲେ ରୋଜର ବିନ୍ନି । ୧୯୮୩ ବିଶ୍ବକପ୍ ବିଜୟୀ ଦଳର ପ୍ରମୁଖ ସଦସ୍ୟ ବି ଥିଲେ । ସେହି ବିଶ୍ବକପରେ ୧୮ଟି ୱିକେଟ ନେଇ ଟପରେ ଥିଲେ । ନିଜ ବାପାଙ୍କୁ ଅନୁସରଣ କରି ଷ୍ଟୁଆର୍ଟ ବିନ୍ନି ବି ଭାରତ ପାଇଁ ଖେଳିଛନ୍ତି। ମଧ୍ୟମଗତି ବୋଲର ଏବଂ ମିଡିଲ ଅର୍ଡର ବ୍ୟାଟସମ୍ୟାନ ଷ୍ଟୁଆର୍ଟ ବିନ୍ନି ୬ଟି ଟେଷ୍ଟ ଏବଂ ୧୪ଟି ଦିନିକିଆ ଖେଳିଛନ୍ତି।

ସଚିନ ତେନ୍ଦୁଲକର-ଅର୍ଜୁନ ତେନ୍ଦୁଲକର- ଭାରତୀୟ କ୍ରିକେଟର ସବୁଠୁ ବଡ଼ ନାଁ ସଚିନ ତେନ୍ଦୁଲକର। ଅନେକ ରେକର୍ଡର ଅଧିକାରୀ। ଟେଷ୍ଟ ହେଉ କି ଦିନିକିଆ, ସବୁଥିରେ ସେ ମାଷ୍ଟରବ୍ଲାଷ୍ଟର। ସଚିନଙ୍କ ପୁଅ ଅର୍ଜୁନ ତେନ୍ଦୁଲକର ବି କ୍ରିକେଟରେ କ୍ୟାରିୟର କରିଛନ୍ତି। ବାମହାତୀ ବୋଲର ସହ ବାମହାତୀ ବ୍ୟାଟର। ଜୁନିଅର ସ୍ତରରେ କ୍ରିକେଟ ଖେଳିବା ପରେ ଅର୍ଜୁନ ଏବେ ରଣଜୀ କ୍ୟାରିୟର ଆରମ୍ଭ କରିଛନ୍ତି।

ଭାରତୀୟ କ୍ରିକେଟ ଦଳର କୋଚ୍ ଥିବା ରାହୁଲ ଦ୍ରାବିଡ଼ଙ୍କ ପୁଅ ଅନଭୟ ଦ୍ରାବିଡ଼ ଜୁନିଅର ସ୍ତରରେ କ୍ରିକେଟ ଖେଳିବା ଜାରି ରଖିଛନ୍ତି। ଦକ୍ଷିଣାଞ୍ଚଳ ୧୪ ବର୍ଷରୁ କମ୍ କର୍ଣ୍ଣାଟକ ଦଳର ନେତୃତ୍ବ ବି ନେଇଛନ୍ତି। ଏଯାଏ ଦୁଇଟି ଦ୍ବିଶତକ ବି ହାସଲ କରିସାରିଛନ୍ତି ଅନଭୟ ଦ୍ରାବିଡ଼। ସେହିପରି ବିସ୍ଫୋରକ ବ୍ୟାଟସମ୍ୟାନ ବୀରେନ୍ଦ୍ର ସେହୱାଗଙ୍କ ପୁଅ ଆର୍ଯ୍ୟବୀର ମଧ୍ୟ ଜୁନି ଅରସ୍ତରର କ୍ରିକେଟ ଖେଳୁଛନ୍ତି। ୧୬ ବର୍ଷରୁ କମ୍ ବିଜୟ ମର୍ଚ୍ଚାଣ୍ଟ ଟ୍ରଫି ପାଇଁ ଦିଲ୍ଲୀ ଦଳରେ ସେ ସ୍ଥାନ ପାଇଛନ୍ତି।