କ୍ରିକେଟ୍ ଖେଳାଳି ଶିଖର ଧାୱନ୍ ପତ୍ନୀ ଆୟେଶା ମୁଖାର୍ଜୀଙ୍କୁ ଛାଡ଼ପତ୍ର ଦେଲେ; ‘‘…ବହୁତ ଭୟାନକ ଥିଲା’’

ଭାରତୀୟ ଓପନର୍ ଶିଖର ଧାୱନ (Shikhar Dhawan) ଓ ପତ୍ନୀ ଆୟେଶା ମୁଖାର୍ଜୀ (Aesha Mukherjee)

ଟିମ୍ ଇଣ୍ଡିଆର ଓପନର୍ ଶିଖର ଧାୱନ (Shikhar Dhawan) ନିଜ ପତ୍ନୀ ଆୟେଶା ମୁଖାର୍ଜୀଙ୍କଠାରୁ ଛାଡ଼ପତ୍ର ନେବା ପରେ ଆୟେଶା ଇନଷ୍ଟାଗ୍ରାମରେ ଏକ ଲମ୍ବା ପୋଷ୍ଟ ଲେଖିଛନ୍ତି। ଏହି ପୋଷ୍ଟରେ ଆୟେଶା ଛାଡପତ୍ର ବିଷୟରେ ନିଜର ମତ ଦେଇଛନ୍ତି ଓ ଦୁଇଥର ଛାଡପତ୍ର ହେବା ପରେ ସେ କିପରି ଅନୁଭବ କରୁଛନ୍ତି ତାହା ମଧ୍ୟ ଲେଖିଛନ୍ତି ।

ଶିଖର୍ ଧାୱନ ଓ ଆୟେଶା ୨୦୦୯ ମସିହାରେ ନିର୍ବନ୍ଧ କରିଥିଲେ ଓ ଏହାର ତିନି ବର୍ଷ ପରେ ସେମାନେ ବିବାହ ବନ୍ଧନରେ ଆବଦ୍ଧ ହୋଇଥିଲେ । 

ଶିଖରଙ୍କୁ ବିବାହ କରିବା ପୂର୍ବରୁ ଆୟେଶା ନିଜ ପ୍ରଥମ ସ୍ୱାମୀଙ୍କୁ ଛାଡପତ୍ର ଦେଇଥିଲେ, ଯାହାଙ୍କ ସହ ତାଙ୍କର ଦୁଇଟି ଝିଅ ଅଛନ୍ତି ।

ଯେତେବେଳେ ଶିଖର୍ ଧାୱନ ତାଙ୍କଠାରୁ ପ୍ରାୟ ୧୦ ବର୍ଷ ବଡ ଆୟେଶାଙ୍କୁ ବିବାହ କରିଥିଲେ, ସେତେବେଳେ ଲୋକେ ତାଙ୍କୁ ବହୁତ ସମାଲୋଚନା କରିଥିଲେ । ହେଲେ ଧାୱନଙ୍କ ପରିବାର ତାଙ୍କୁ ସମର୍ଥନ କରିଥିଲା । ୨୦୧୪ରେ ଆୟେଶା ଏକ ପୁତ୍ର ସନ୍ତାନ ଜନ୍ମ ଦେଇଥିଲେ, ଯାହାର ନାଁ ଜୋରାବର ଧାୱନ ।

ଆୟେଶାଙ୍କୁ ବିବାହ କରିବା ପରେ ତାଙ୍କ ଜୀବନ କିପରି ବଦଳିଗଲା ସେ ବିଷୟରେ ଧାୱନ ଅନେକ ଥର କହିଛନ୍ତି। ଆୟେଶାଙ୍କୁ ଭେଟିବା ପରେ ସେ ଜଣେ ବ୍ୟକ୍ତି ଓ ଜଣେ କ୍ରିକେଟର୍ ଭାବରେ କିପରି ଉନ୍ନତି କରିଛନ୍ତି ସେ କଥା ବି ସେ ଅନେକ ଥର କହିଛନ୍ତି ।

ଆୟେଶାଙ୍କଠାରୁ ଛାଡପତ୍ର ସମ୍ପର୍କରେ ଶିଖର ଧୱନ କୌଣସି ସୂଚନା ଦେଇନାହାଁନ୍ତି କିମ୍ବା ସୋସିଆଲ ମିଡିଆରେ କୌଣସି ପୋଷ୍ଟ ଶେୟାର୍ କରିନାହାଁନ୍ତି। ପୂର୍ବରୁ ଖବର ଆସିଥିଲା ଯେ ଶିଖର ଓ ଆୟେଶା ସୋସିଆଲ ମିଡି଼ଆ ପ୍ଲାଟଫର୍ମ ଇନଷ୍ଟାଗ୍ରାମରେ ପରସ୍ପରକୁ ଫଲୋ କରିଛନ୍ତି। ପରେ ଆୟେଶା ଶିଖରଙ୍କର ସବୁ ଫଟୋ ନିଜ ଫିଡରୁ ଡିଲିଟ କରିଦେଇଥିଲେ ।

ପଶ୍ଚିମ ବଙ୍ଗର ଆୟେଶା ଶିଖର ଧାୱନଙ୍କଠାରୁ ଛାଡ଼ପତ୍ର ପରେ ଏକ ଲମ୍ବା ଇନଷ୍ଟାଗ୍ରାମ୍ ପୋଷ୍ଟରେ ଲେଖିଛନ୍ତି, ‘‘ଥରେ ଛାଡପତ୍ର ହେବା ପରେ ଲାଗୁଥିଲା ଯେ ଦ୍ୱିତୀୟ ଥର ଅନେକ କିଛି କଥା ବିପଦରେ ରହିଛି । ମୋତେ ପ୍ରମାଣ କରିବାକୁ ବହୁତ କିଛି ଅଛି । ତେଣୁ ଯେତେବେଳେ ମୋ’ର ଦ୍ୱିତୀୟ ବିବାହ ଭାଙ୍ଗିଗଲା ସେତେବେଳେ ବହୁତ ଭୟାନକ ଥିଲା ।ମୁଁ ଭାବୁଥିଲି ଛାଡପତ୍ର ଗୋଟେ ଭାରି ଖରାପ ଶବ୍ଦ, କିନ୍ତୁ ତା’ପରେ ମୋ’ର ଦୁଇ ଥର ଛାଡପତ୍ର ହୋଇଗଲା । ଯେତେବେଳେ ମୁଁ ପ୍ରଥମ ଥର ପାଇଁ ଛାଡପତ୍ର ଦେଲି, ମୁଁ ବହୁତ ଡରିଯାଇଥିଲି । ମୁଁ ଅନୁଭବ କରୁଥିଲି ଯେମିତି ମୁଁ ବିଫଳ ହୋଇଛି ।’’

ଆୟେଶା ଆହୁରି ଲେଖିଛନ୍ତି, ‘‘ମୋତେ ଲାଗୁଥିଲା ଯେ ମୁଁ ସମସ୍ତଙ୍କୁ ହରେଇଛି ଓ ସ୍ୱାର୍ଥପର ଅନୁଭବ କରୁଛି। ମୋତେ ଲାଗୁଥିଲା ଯେମିତି ମୁଁ ମୋ’ ପିତାମାତାଙ୍କୁ ନିରାଶ କରିଛି, ମୋ’ ପିଲାମାନଙ୍କୁ ଅପମାନିତ କରିଛି ଓ କିଛି ପରିମାଣରେ ମୁଁ ଭଗବାନଙ୍କୁ ବି ଅପମାନିତ କରିଛି ।ଛାଡପତ୍ର ମୋ’ ପାଇଁ ଏକ ଅତି ମଇଳା ଶବ୍ଦ ଥିଲା ।’’

ଲୋକେ ସୋସିଆଲ ମିଡିଆରେ ଶିଖର ଧାୱନଙ୍କ ବିଷୟରେ ପ୍ରଶ୍ନ ପଚାରୁଛନ୍ତି ଓ ତାଙ୍କୁ ଟ୍ୟାଗ୍ ବି କରୁଛନ୍ତି । କିନ୍ତୁ ଶିଖର ଏ ବିଷୟରେ କିଛି କହି ନାହାଁନ୍ତି ।

ୟୁଏଇରେ ଆଇପିଏଲ-୨୦୨୧ର ଦ୍ୱିତୀୟ ପର୍ଯ୍ୟାୟରେ ଶିଖର ଧାୱନଙ୍କୁ ଖେଳୁଥିବା ଦେଖିବାକୁ ମିଳିବ ।ସେ ଦିଲ୍ଲୀ ରାଜଧାନୀକୁ ପ୍ରତିନିଧିତ୍ୱ କରନ୍ତି ।

ଦିଲ୍ଲୀରୁ ଆସିଥିବା ଧାୱନ ନିଜ କରିୟରରେ ୩୪ଟି ଟେଷ୍ଟ, ୧୪୫ଟି ODI ଓ ୬୮ଟି ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ନିକଟରେ ସେ ଶ୍ରୀଲଙ୍କା ବିପକ୍ଷ ସୀମିତ ଓଭର ସିରିଜରେ ଟିମ୍ ଇଣ୍ଡିଆର ଅଧିନାୟକତ୍ୱ ଗ୍ରହଣ କରିଥିଲେ ।