ସେଲଫି ନେବାକୁ ମନା କରିବାରୁ ପୃଥ୍ଵୀ ସଙ୍କୁ ଆକ୍ରମଣ

ସେଲଫି ନେବାକୁ ମନା କରିବାରୁ ପୃଥ୍ଵୀ ସ’ଙ୍କୁ ଆକ୍ରମଣ । ଟିମ୍ ଇଣ୍ଡିଆର ବ୍ୟାଟ୍ସମ୍ୟାନ ପୃଥ୍ଵୀ ସ’ଙ୍କ ଉପରେ ଆକ୍ରମଣ ସହ ତାଙ୍କ କାର ଭଙ୍ଗାରୁଜା କରିଛନ୍ତି କିଛି ଯୁବକ ।

କେବଳ ଏତିକି ନୁହେଁ ତାଙ୍କ ସାଙ୍ଗଙ୍କ କାର ମଧ୍ୟ ଭଙ୍ଗାରୁଜା କରାଯାଇଥିଲା । ଏହି ମାମଲାରେ ୮ ଜଣଙ୍କ ବିରୋଧରେ ପୋଲିସ ମାମଲା ରୁଜୁ କରିଛି। ପୃଥ୍ଵୀ ସ ଏବଂ ତାଙ୍କ ସାଙ୍ଗଙ୍କୁ ହୋଟେଲ ବାହାରେ କିଛି ଯୁବକ ଆକ୍ରମଣ କରିଥିଲେ ।

ସେଲ୍ଫି ନେବାକୁ ମନା କରିବାରୁ ଏହି ଘଟଣା ଘଟିଛି ବୋଲି ପ୍ରାଥମିକ ତଦନ୍ତରୁ ଜଣାପଡିଛି । ପ୍ରତ୍ୟକ୍ଷଦର୍ଶୀଙ୍କ ସୂଚନା ମୁତାବକ ମୁମ୍ବାଇର ଏକ ପଞ୍ଚତାରକା ହୋଟେଲକୁ ପୃଥ୍ଵୀ ସ ତାଙ୍କ ସାଙ୍ଗଙ୍କ ସହ ଆସିଥିଲେ ।

ହୋଟେଲ ପରିସରରେ ୨ ଜଣଙ୍କ ସହ ସେ ସେଲଫି ନେଇଥିଲେ। ଏହା ପରେ ଅଧିକ ଲୋକ ଆସି ପୁଣି ସେଲଫି ନେବାକୁ କହିଥିଲେ। ପୃଥ୍ଵୀ ମନା କରି କହିଥିଲେ ଯେ ସେ ବ୍ୟକ୍ତିଗତ କାର୍ଯ୍ୟ ପାଇଁ ଏଠାକୁ ଆସିଛନ୍ତି। ଓଶିୱାରା ପୋଲିସ ମାମଲାରେ ୮ ଜଣଙ୍କ ବିରୋଧରେ ମାମଲା ରୁଜୁ କରିଛି ।

ଅଭିଯୋଗ ଅନୁଯାୟୀ, ଯେତେବେଳେ ଅଭିଯୁକ୍ତମାନେ ସେଲଫି ନେବାକୁ ଜିଦ୍ଦି କରିଥିଲେ, ସେତେବେଳେ ପୃଥ୍ଵୀଙ୍କର ସାଙ୍ଗ ହୋଟେଲ ମ୍ୟାନେଜରଙ୍କୁ ଡାକିଥିଲେ। ଏହା ପରେ ମ୍ୟାନେଜର ଅଭିଯୁକ୍ତଙ୍କୁ ଯିବାକୁ କହିଥିଲେ। ଏହା ପରେ ଯେତେବେଳେ ପୃଥ୍ଵୀ ହୋଟେଲରୁ ବାହାରକୁ ଆସିଲେ, କିଛି ଲୋକ ତାଙ୍କୁ ଆକ୍ରମଣ କରିଥିଲେ । ସେପଟେ ପୃଥ୍ଵୀଙ୍କ ନାଁରେ ଅସଦାଚରଣ ଅଭିଯୋଗ ଆଣିଛନ୍ତି ଜଣେ ମହିଳା ।