ପହିଲି ରଜରେ କାହିଁକି ମନ ଉଦାସ ହେଲା? ଭଦ୍ରକରେ ଭଡ଼ା ଘରେ ପଙ୍ଖାରୁ ଝୁଲି ଜୀବନ ଦେଲେ ଯୁବତୀ

ରଜ ପର୍ବ ଜଣେ ଯୁବତୀଙ୍କ ଜୀବନର ଶେଷ ଯାତ୍ରାର ସାକ୍ଷୀ ହୋଇଛି ।

ସାରା ଓଡ଼ିଶାର ଯୁବକଯୁବତୀମାନେ ରଜ ପର୍ବ ପାଳନ କରୁଥିବା ବେଳେ ଭଦ୍ରଖରେ ଜଣେ ଯୁବତୀ ନିଜ ହାତରେ ନିଜ ଜୀବନ ନେଇଛନ୍ତି । (ପ୍ରତୀକାତ୍ମକ ଛବି)

ଏକ ଭଡା ଘରୁ ସିଲିଂ ଫ୍ୟାନରୁ ଯୁବତୀଙ୍କ ମୃତ ଦେହ ଝୁଲୁଥିବା ଅବସ୍ଥାରେ ଉଦ୍ଧାର କରିଛି ଟାଉନ ପୋଲିସ । ଏହି ଭଡ଼ା ଘର ଭଦ୍ରକ ଟାଉନ୍ ଥାନା ଜାନୁଗଞ୍ଜ ଦୁର୍ଗାମଣ୍ଡପ ସାମନାରେ ଅଛି ।

ମୃତା ଯୁବତୀଙ୍କ ନାଁ ସଙ୍ଗୀତା ପୃଷ୍ଟି ବୋଲି ଜଣା ପଡ଼ିଛି । ତାଙ୍କ ଘର ତିହିଡି ବ୍ଲକ ସିନ୍ଦୋଳ ଗାଁରେ । ସେ ଏହି ଭଡ଼ା ଘରେ ତିନି ଜଣ ରୁମ୍-ମେଟଙ୍କ ସହ ଦୀର୍ଘ ଦିନ ଧରି ରହି ଆସୁଥିଲେ । ରଜ ପାଇଁ ଦୁଇ ଜଣ ରୁମ୍-ମେଟ୍ ନିଜ ନିଜ ଘରକୁ ପଳେଇ ଯାଇଥିବା ବେଳେ ସଙ୍ଗୀତା ଏକୁଟିଆ ରହୁଥିଲେ ।

ଭଦ୍ରକରେ ଏକ ଘରୋଇ ସଂସ୍ଥାରେ କାମ କରୁଥିଲେ ସଙ୍ଗୀତା । ତା’ ସହ ସେ କମ୍ପିଟେଟିଭ୍ ପରୀକ୍ଷା ପାଇଁ ବି ପ୍ରସ୍ତୁତ ହେଉଥିଲେ । ପହିଲି ରଜ ଦିନ ଅପରାହ୍ହ୍ଣରେ ସଙ୍ଗୀତା ଖାଇ ପିଇ ନିଜ ରୁମରେ ଥିଲେ । ସନ୍ଧ୍ୟାରେ ଭିତର ପଟୁ ସେ କବାଟ ନ ଖୋଲିବାରୁ ତାଙ୍କ ଘର ମାଲିକଙ୍କ ସନ୍ଦେହ ହୋଇଥିଲା । ଯେତେ ଡାକ ପକାଇଲେ ବି ଭିତରୁ ସେ କବାଟ ଖୋଲି ନ ଥିଲେ । ସ୍କାଇଲାଇଟ୍ ବାଟେ ଦେଖିବା ବେଳକୁ ଫ୍ୟାନରେ ଓଢ଼ଣୀରେ ତାଙ୍କ ଦେହ ଝୁଲୁଥିବା ଦେଖିବାକୁ ମିଳିଥିଲା ।

ଏହି ଆତ୍ମହତ୍ୟାର କାରଣ ଜଣାପଡି଼ ନାହିଁ । ଭଦ୍ରକ ଟାଉନ୍ ପୋଲିସ ମୃତ ଦେହ ଉଦ୍ଧାର କରି ତଦନ୍ତ ଆରମ୍ଭ କରିଛି । ସଙ୍ଗୀତାଙ୍କ ରୁମରୁ କୌଣସି ସୁଇସାଇଡ୍ ନୋଟ୍ ମିଳି ନାହିଁ ।

ଧ୍ୟାନ ଦିଅନ୍ତୁ: ଯଦି ଆପଣ ବା ଆପଣ ଜାଣିଥିବା କୌଣସି ବ୍ୟକ୍ତି କୌଣସି ବି କାରଣରୁ ଖୁବ୍‌ ଦୁଃଖ ଅନୁଭବ କରୁଛନ୍ତି ଓ ସାହାଯ୍ୟ ଲୋଡ଼ୁଛନ୍ତି, ତାହେଲେ ନିମ୍ନଲିଖିତ ଯେକୌଣସି ହେଲ୍ପଲାଇନକୁ କଲ୍‌ କରନ୍ତୁ: ଆସ୍ରା (ମୁମ୍ବାଇ) 022-27546669, ସ୍ନେହା (ଚେନ୍ନାଇ) 044-24640050, ସୁମୈତ୍ରୀ (ଦିଲ୍ଲୀ) 011-23389090, କୁଜ (ଗୋଆ) 0832- 2252525, ଜୀବନ (ଜାମସେଦପୁର) 065-76453841, ପ୍ରତୀକ୍ଷା (କୋଚି) 048-42448830, ମୈତ୍ରୀ (କୋଚି) 0484-2540530, ରୋଶନି (ହାଇଦ୍ରାବାଦ) 040-66202000, ଲାଇଫ୍ ଲାଇନ୍ 033-64643267 (କୋଲକାତା) ।