ଆଜିକାଲି ଆଧାର କାର୍ଡ (Aadhaar Card) ଏକ ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟରେ ପରିଣତ ହୋଇଛି । ଅଧିକାଂଶ ସରକାରୀ ଯୋଜନାର ଲାଭ ପାଇବା ପାଇଁ ଲୋକଙ୍କ ପାଖରେ ଆଧାର କାର୍ଡ଼ ଥିବା ବାଧ୍ୟତାମୂଳକ କରାଯାଇଛି । ଏ ପର୍ଯ୍ୟନ୍ତ ନିୟମ ଅନୁସାରେ ଯଦି କେହି ପ୍ରଥମ ଥର ପାଇଁ ନିଜର ଆଧାର କାର୍ଡ଼ ତିଆରି କରାଉଛନ୍ତି, ତେବେ ଏଥି ପାଇଁ ତାଙ୍କ ପାଖରେ ଫଟୋ ପରିଚୟ ପତ୍ର ଓ ନିଜ ଠିକଣାର ପ୍ରମାଣ ଥିବା ID କାର୍ଡ଼ ଥିବା ଆବଶ୍ୟକ ଥିଲା । ହେଲେ ଏବେ ଯଦି ଆପଣଙ୍କ ପାଖରେ କୌଣସି ପରିଚୟ ପତ୍ର ନାହିଁ, ତଥାପି ଆପଣ ନିଜର ଆଧାର କାର୍ଡ଼ ତିଆରି କରାଇପାରିବେ । ଆସନ୍ତୁ ଜାଣିବା କେମିତି । ଆପଣ ବିନା ଡକ୍ୟୁମେଣ୍ଟରେ ବି ନିଜର ଆଧାର କାର୍ଡଡ ତିଆରି କରାଇ ପାରିବେ । ଏଥି ପାଇଁ ଆପଣଙ୍କୁ ନିକଟସ୍ଥ ସେବା କେନ୍ଦ୍ରକୁ ଯିବାକୁ ପଡି଼ବ । ସେଠାରେ କୌଣସି ଜଣେ ପରିଚୟକାରୀଙ୍କ (ଇଣ୍ଟ୍ରୋଡ୍ୟୁସର୍, introducer) ସାହାଯ୍ୟରେ ଆପଣ ସହଜରେ ନିଜର ଆଧାର କାର୍ଡ ବନାଇପାରିବେ । ଏହି ପରିଚୟକାରୀଙ୍କୁ (ଇଣ୍ଟ୍ରୋଡ୍ୟୁସର୍, introducer) UIDAIର ଆଞ୍ଚଳିକ କାର୍ଯ୍ୟାଳୟ ଦ୍ୱାରା ନିଯୁକ୍ତ କରାଯାଇଛି । ପରିଚୟକାରୀଙ୍କ ପାଖରେ ତାଙ୍କର ନିଜର ଆଧାର କାର୍ଡ଼ ରହିଥିବା ଆବଶ୍ୟକ । ଆଧାର କେନ୍ଦ୍ରରେ ସାଧାରଣ ପ୍ରକ୍ରିୟା ମାଧ୍ୟମରେ ଆଧାର କାର୍ଡ଼ ସୃଷ୍ଟି କରିହେବ । ୯୦ ଦିନ ମଧ୍ୟରେ ଆଧାର କାର୍ଡ଼ ଆପଣ ଦେଇଥିବା ଠିକଣାକୁ ଡାକ ମାଧ୍ୟମରେ ପଠାଯିବ । ଆବେଦନକାରୀଙ୍କ ପରିଚୟ ଓ ଠିକଣା ନିଶ୍ଚିତ କରିବା ପାଇଁ ପରିଚୟକାରୀ କାର୍ଯ୍ୟ କରନ୍ତି । ସେ ନାମଲେଖା ଫର୍ମରେ (enrolment form) ଦସ୍ତଖତ କରିବା କାମ ବି କରନ୍ତି । UIDAIର ନିର୍ଦ୍ଦେଶାବଳୀ ଅନୁଯାୟୀ ପରିଚୟକାରୀଙ୍କୁ ଆବେଦନକାରୀଙ୍କ ନାମରେ ଏକ ସାର୍ଟିଫିକେଟ୍ ଦେବାକୁ ପଡ଼େ, ଯାହା ତିନି ମାସ ପାଇଁ ବୈଧ ରହେ । ଆଧାର କାର୍ଡ଼ ଆବେଦନ ପ୍ରକ୍ରିୟା ସମୟରେ ପରିଚୟକାରୀଙ୍କ ଉପସ୍ଥିତ ରହିବା ବାଧ୍ୟତାମୂଳକ ।
