ଗତ ଜୁନ୍ ୨୩ ତାରିଖରେ ନୟାଗଡ଼ ସଦର ଥାନା ଯଦୁପୁର ଅଞ୍ଚଳରେ ଘଟିଥିଲା ଲୋମହର୍ଷକ ହତ୍ୟା । ଗାଁର ଅଶୋକ ସାହୁଙ୍କ ପାଞ୍ଚ ବର୍ଷର ଝିଅ ଅମ୍ରିତା ସାହୁ ଓରଫ ପରୀର ଗଳିତ ମୃତ ଦେହ ମିଳିଥିଲା ଅନ୍ୟ ଜଣେ ଗ୍ରାମବାସୀଙ୍କ ପରିତ୍ୟକ୍ତ ପୋଖରୀ ହୁଡ଼ାରୁ । ମୃତ ଦେହ ମିଳିବାର ୧୦ ଦିନ ପୂର୍ବରୁ ଅର୍ଥାତ୍ ଜୁନ୍ ୧୪ରେ ପରି ହଠାତ୍ ନିଖୋଜ ହୋଇଯାଇଥିଲା ପରୀ । ଝିଅକୁ କେହି ଅପହରଣ କରିଛି ବୋଲି ଥାନାରେ ଅଭିଯୋଗ କରିଥିଲେ ପରିବାର ଲୋକେ ।
ପରୀ ନିଖୋଜ ହେବାର ଦଶ ଦିନ ପରେ ତା’ ଗଳିତ ଶବ ମିଳିବା ପରେ ଏହା ଏକ ହତ୍ୟାକାଣ୍ଡ ବୋଲି ଅଭିଯୋଗ ହୋଇଥିଲା । ଏହି ହତ୍ୟାକାଣ୍ଡକୁ ନେଇ ଜିଲ୍ଲାରେ ଜୋର୍ ଧରିଥିଲା ଆନ୍ଦୋଳନ । ମୃତକଙ୍କ ପରିବାରକୁ ନ୍ୟାୟ ଦାବିରେ ରାଜରାସ୍ତାକୁ ଓହ୍ଲାଇଥିଲେ କଂଗ୍ରେସ ଓ ବିଜେପି । ପରିବାର ଲୋକେ ମଧ୍ୟ ନ୍ୟାୟ ପାଇଁ ଏସପିଙ୍କ ଦ୍ବାରସ୍ଥ ହୋଇଥିଲେ । ତଥାପି ପରି ହତ୍ୟାକାଣ୍ଡର ଖୁଲାସା ହୋଇପାରି ନ ଥିଲା ।
ପରୀର ହତ୍ୟାକାଣ୍ଡ ଘଟଣାରେ ପ୍ରମାଣ ନଷ୍ଟ କରିବା ପାଇଁ ହତ୍ୟାକାରୀମାନେ ମୃତ ଦେହକୁ ଖଣ୍ଡ ଖଣ୍ଡ କରି କାଟି ସେଥିରେ କେମିକାଲ ପକାଇ ପୋଡ଼ି ନଷ୍ଟ କରିବାର ବି ପ୍ରୟାସ କରିଥିଲେ ବୋଲି ପୋଲିସ କହିଥିଲା । ଏକ ଅଖା ଭିତରୁ ନିଖୋଜ ପରୀର ମୃତ ଦେହର ହାଡ଼ କଙ୍କାଳ ଜବତ କରିଥିଲା ପୋଲିସ । ହତ୍ୟାକାଣ୍ଡ ପଛରେ ଗାଁର ଓ ଗାଁ ବାହାରର କିଛି ଲୋକଙ୍କ ସମ୍ପୃକ୍ତି ରହିଥିବା ପରୀର ପରିବାର ପକ୍ଷରୁ ଅଭିଯୋଗ ହୋଇଥିଲା ।
