ଓଡ଼ିଶା
ବଲାଙ୍ଗିର: ଗୋଟିଏ ପରିବାରର ୬ ଜଣଙ୍କୁ ହତ୍ୟା ପଛରେ ପୋତାହୋଇ ଥିବା ଗୁପ୍ତ ଧନ ନ ଥିଲା ତ?
ପାଟଣାଗଡ଼ରେ ଗୋଟିଏ ପରିବାରର ୬ ଜଣ ସଦସ୍ୟଙ୍କ ହତ୍ୟା ଘଟଣାର ତଦନ୍ତରେ ପୋଲିସକୁ ସେହି ଘର ଭିତରେ ଖୋଳାଯାଇଥିବା ଅଢେଇ ଫୁଟର ଏକ ଗାତ ଓ ଦୁଇଟି ଅଲଗା ବାଇକ୍ ଚାବି ମିଳିବା ପରେ ହତ୍ୟାକାଣ୍ଡର ରହସ୍ୟ ଉପରୁ ପରଦା ହଟିବ ବୋଲି ଆଶା ବଢ଼ିଛି ।
ଗୋଟିଏ ପରିବାରର ଛଅ ଜଣ ଲୋକଙ୍କ ନିର୍ମମ ହତ୍ୟା ଘଟଣାକୁ ଚାରି ଦିନ ବିତିଯିବା ପରେ ବି ଏହା ପଛରେ ଥିବା ରହସ୍ୟ ଉପରୁ ପରଦା ହଟି ନାହିଁ । ଏହି ଜଘନ୍ୟ ହତ୍ୟାକାଣ୍ଡ ବଲାଙ୍ଗିର ଜିଲ୍ଲା ପାଟଣାଗଡ଼ ସଅଁରାପଡ଼ାରେ ଘଟିଥିଲା ।
ନଭେମ୍ବର ୧୧ ତାରିଖ ଦିନ କୁସମପଡ଼ାର ବୁଲୁ ଜାନୀଙ୍କ ଘରୁ ଛଅଟି ମୃତ ଦେହ ମିଳିଥିଲା । ସମସ୍ତେ ଗୋଟିଏ ପରିବାରର ସଦସ୍ୟ । ସେମାନେ ହେଲେ ବୁଲୁ ଜାନୀ (୫୦), ତାଙ୍କ ସ୍ତ୍ରୀ ଜ୍ୟୋତି (୪୮) ଓ ସେମାନଙ୍କ ପିଲାମାନେ – ସରିତା (୧୨), ବିଦ୍ୟା (୫), ଶ୍ରୀୟା (୩) ଓ ସଞ୍ଜୀବ (୨) ।
ଏହି ଜଘନ୍ୟ ହତ୍ୟାକାଣ୍ଡର କାରଣ ଜାଣିବା ପାଇଁ ପୋଲିସ ସନ୍ଦେହରେ ସଅଁରାପଡ଼ାର ମୋଟ ଚାରି ଜଣ ଲୋକଙ୍କୁ – ଶିବା, ଭୋଳା, ବବଲୁ ଜାନି ଓ ସୁରେଶ ମାଝୀ – ଅଟକ ରଖି ଜେରା କରୁଛି ।
ସେମାନେ କେହି ହତ୍ୟାକାଣ୍ଡ ସମ୍ପର୍କରେ ମୁହଁ ଖୋଲୁନାହାନ୍ତି । କେବଳ ହତ୍ୟାକାଣ୍ଡ ପଛରେ ସେମାନଙ୍କ ସଂପୃକ୍ତି ନାହିଁ ବୋଲି କହୁଛନ୍ତି ।
ହେଲେ ପୋଲିସର ତଦନ୍ତରେ ସେହି ଘର ଭିତରେ ଖୋଳାଯାଇଥିବା ଅଢେଇ ଫୁଟର ଏକ ଗାତ ଓ ଦୁଇଟି ଅଲଗା ବାଇକ୍ ଚାବି ମିଳିବା ପରେ ହତ୍ୟାକାଣ୍ଡ ପଛର ରହସ୍ୟ ଉନ୍ମୋଚିତ ହେବ ବୋଲି ଆଶା ବଢ଼ିଛି ।
ମୃତ ଗୃହସ୍ୱାମୀ ବୁଲୁ ଜାନିଙ୍କ ଘର ଭିତରେ ତନ୍ନ ତନ୍ନ ଯାଞ୍ଚ କରିବା ପରେ ପୋଲିସ ଦେଖିବାକୁ ପାଇଛି ଯେ ହତ୍ୟାକାଣ୍ଡ ସ୍ଥଳରେ ଏକ ଅଢେଇ ଫୁଟର ଗାତ ରହିଛି ।
ଘର ଭିତରେ ଥିବା ବାଇକର ପେଟ୍ରୋଲ ପାଇପକୁ ଏକ ବ୍ଲେଡରେ କଟାଯାଇଥିବା ଜଣାପଡ଼ିଛି । ଘର ବାହାରେ ଏକ ପେଟ୍ରୋଲ ବୋତଲ ପଡ଼ିଥିବା ପୋଲିସ ଦେଖିବାକୁ ପାଇଛି ।
ଏ ସବୁ ସୁରାକରୁ ପୋଲିସ ଠଉରାଉଛି ଯେ ଘର ଭିତରେ କିଛି ଗୁପ୍ତ ଧନ ବା ଚୋରି ଜିନିଷ ପୋତା ହୋଇ ରଖାଯାଇଥିଲା । ତାକୁ ନେଇ ହତ୍ୟାକାରୀଙ୍କ ସହ ବୁଲୁ ଜାନିର ବିବାଦ ଥାଇପାରେ । ସେହି କାରଣରୁ ବୁଲୁ ଜାନି ଓ ତା’ ପରିବାରର ପାଞ୍ଚ ଜଣ ସଦସ୍ୟଙ୍କୁ କେହି ହତ୍ୟା କରିଥାଇପାରେ । ତେବେ ଏ ସମ୍ପର୍କରେ ପୋଲିସକୁ ଏ ପର୍ଯ୍ୟନ୍ତ କୌଣସି ନିର୍ଦ୍ଦିଷ୍ଟ ପ୍ରମାଣ ମିଳିପାରିନାହିଁ ।
କିନ୍ତୁ ଶବ ସଂସ୍କାର ପରେ ପାଞ୍ଚ ପୁଅ ଓ ତାଙ୍କ ପରିବାର ସେହି ଘରକୁ ଯାଇଥିଲେ ବି ଘରର ବୀଭତ୍ସ ଦୃଶ୍ୟ ଦେଖି ସେଠାରେ ରହିବା ପାଇଁ ସାହସ ଜୁଟାଇ ପାରି ନ ଥିଲେ ।
