ଶ୍ରୀମନ୍ଦିର ପରମ୍ପରା ବେଶ ସ୍ୱତନ୍ତ୍ର: ଶାଢ଼ୀ ବାନ୍ଧିବା ନେଇ ସେବାୟତଙ୍କ ପାଇଁ ସ୍ୱତନ୍ତ୍ର ନିୟମାବଳୀ

ଶ୍ରୀମନ୍ଦିର ପରମ୍ପରା ବେଶ ସ୍ୱତନ୍ତ୍ର । ଜଣେ ସେବାୟତ, ମହାପ୍ରଭୁଙ୍କ ସେବା କରିବା ପାଇଁ ଯୋଗ୍ୟ ହେଲେ, ତାଙ୍କ ମସ୍ତକରେ ଶାଢ଼ୀ ବାନ୍ଧିବା ପରମ୍ପରା ବିଧି ରହିଛି । ଆଉ ଏହା ହେବା ପରେ ହିଁ, ସମ୍ପୃକ୍ତ ସେବାୟତ ଶ୍ରୀମନ୍ଦିର ସତ୍ଵଲିପି ଆଧାରରେ କରିପାରିବ ମହାପ୍ରଭୁଙ୍କ ସେବା । ତେବେ କିଛି ନିର୍ଦ୍ଧିଷ୍ଟ ସେବାୟତଙ୍କ ଶାଢ଼ୀ ବନ୍ଧା ଥିବା ବେଳେ ଦଇତାପତିଙ୍କ କିନ୍ତୁ ୨୧ ଦିନର ଛୁଆବି ମହାପ୍ରଭୁଙ୍କ ସେବାରେ ନିୟୋଜିତ ହୋଇପାରିବ । ତେଣୁ ଶ୍ରୀମନ୍ଦିର ପ୍ରଶାସନର ଅନୁମତି କ୍ରମେ ଗତକାଲି ଓ ଆଜି ଦୁଇଜଣ ଖୁଣ୍ଟିଆ ସେବାୟତ ଶାଢ଼ୀ ବାନ୍ଧିବା ପରେ ଆଜିଠାରୁ ମହାପ୍ରଭୁଙ୍କ ସେବକ ଭାବେ ଯୋଗ୍ୟତା ଅର୍ଜନ କରିଛନ୍ତି ।

ସ୍ବତନ୍ତ୍ର ନୀତିକାନ୍ତି ଓ ନିଆରା ବିଧିବ୍ୟବସ୍ତାକୁ ନେଇ ନିଆରା ହେଉଛି ଶ୍ରୀମନ୍ଦିର ଓ ଶ୍ରୀଜଗନ୍ନାଥ ସଂସ୍କୃତି । ଚାରିଧାମ ମଧ୍ୟରୁ ଶ୍ରେଷ୍ଠ ଧାମ ହେଉଛି ଜଗନ୍ନାଥ ଧାମ। ଶ୍ରୀମନ୍ଦିରରେ ମହାପ୍ରଭୁଙ୍କ ସେବା, ପୂଜା, ନୀତି କାନ୍ତି ସ୍ବତନ୍ତ୍ର ଥିବାବେଳେ ମହାପ୍ରଭୁଙ୍କ ସେବା ପୂଜା ଓ ନୀତି କାନ୍ତି କରୁଥିବା ସେବାୟତ ମାନେ ମଧ୍ୟ ସ୍ବତନ୍ତ୍ର । ତେବେ ଶ୍ରୀମନ୍ଦିରରେ ଯେଉଁ ସେବାୟତ ମାନେ ମହାପ୍ରଭୁଙ୍କ ସେବା ପୂଜା କରିଥାନ୍ତି ସେମାନଙ୍କୁ ପ୍ରଥମେ ଶାଢ଼ୀ ବନ୍ଧାଇବାକୁ ପଡ଼ିଥାଏ ।

ଏହି ପରିପ୍ରେକ୍ଷୀରେ ଶୁକ୍ରବାର ଦିନ ଶ୍ରୀମନ୍ଦିରର ନାୟକ ତଥା ପାଟ୍ଟଯୋଶୀ ମହାପାତ୍ର, ଯୁବ ସେବାୟତ ରାଜ୍ ନାରାୟଣ ଖୁଣ୍ଟିଆଙ୍କ ମୁଣ୍ଡରେ ଶାଢ଼ୀ ବାନ୍ଧିଛନ୍ତି । ଏମିକି ଶ୍ରୀମନ୍ଦିରରେ ରାଜ୍ ନାରାୟଣ ପାଳିଆ ସେବକ ଭାବେ ମହାପ୍ରଭୁଙ୍କ ସେବା ପୂଜା କରିପାରିବେ। ଏହି ସେବା ପାଇ ରାଜ୍ ନାରାୟଣ ନିଜକୁ ବେଶ ଭାଗ୍ୟବାନ ମନେ କରିଥିବା ବେଳେ ମହାପ୍ରଭୁଙ୍କ ପାଖରେ ସଂସାରର ମଙ୍ଗଳ କାମନା କରିଥିବା କହିଛନ୍ତି ।

ତେବେ ଶ୍ରୀମନ୍ଦିରରେ ନିଜ ସେବାପୂଜା ଅଧିକାର ପାଇଁ ପୂଜାପଣ୍ଡା ସେବାୟତମାନେ ପରୀକ୍ଷା ଦେଇ ସେବକ ମାନ୍ୟତା ପାଇଥାନ୍ତି । ସେହିଭଳି ଖୁଣ୍ଟିଆ ସେବାୟତମାନେ ବି ସେହିଭଳି ନିଯୋଗ ଜରିଆରେ ପ୍ରଥମେ ଶ୍ରୀମନ୍ଦିରର ସ୍ବୀକୃତି ବା ଅନୁମତି ପାଇବା ପରେ ଶାଢ଼ୀ ବନ୍ଧା କରାଯାଇଥାଏ ।

ସେହି ଆଧାରରେ ଶୁକ୍ରବାର ଦିନ ଶ୍ରୀମନ୍ଦିରରେ ଖୁଣ୍ଟିଆ ସେବାୟତ ରାଜ ନାରାୟଣ ଖୁଣ୍ଟିଆ ଓ ଶନିବାର ବଳରାମ ଖୁଣ୍ଟିଆଙ୍କୁ ଶାଢ଼ୀ ବନ୍ଧା ଯାଇଥିଲା । ଏବେ ଏମାନେ ନିଯୋଗକୁ ସହଯୋଗ କରିବା ସହ ସେବକ ଭାବେ ପାଳି ଖଟିବେ । ଆଉ ଶ୍ରୀମନ୍ଦିର ପ୍ରସାଶନ ପକ୍ଷରୁ ଶାଢ଼ୀ ବନ୍ଧା ସେବକଙ୍କୁ ପ୍ରାପ୍ୟ ପାଉଣା ସହ ଖେଇ ମିଳିବାର ବିଧି ରହିଛି ବୋଲି କହିଛନ୍ତି ଶ୍ରୀମନ୍ଦିର ପରିଚାଳନା କମିଟି ସଦସ୍ୟ।

ଶ୍ରୀମନ୍ଦିରରେ ପ୍ରାୟ ୧୦ ହଜାର ସେବକ ରହିଥିବା ବେଳେ ଶାଢ଼ୀ ବାନ୍ଧିବା ନେଇ ସେବାୟତଙ୍କ ପାଇଁ ଶ୍ରୀମନ୍ଦିର ସତ୍ଵଲିପିରେ ରହିଛି ସ୍ୱତନ୍ତ୍ର ନିୟମାବଳୀ । ତେଣୁ ତାହାକୁ ପ୍ରଶାସନ କଡ଼ାକଡ଼ି କରି କାର୍ଯ୍ୟ କରୁଥିବାରୁ ସେବାୟତଙ୍କ ମଧ୍ୟରେ ଅନେକ ଉତ୍ସାହ ସୃଷ୍ଟି କରିଛି ।