ଇଏ ଓଡ଼ିଆ ଝିଅ ଅପ୍ସରା ରାଣୀ; ରାମ ଗୋପାଳ ବର୍ମାଙ୍କ ନୂଆ ଫିଲ୍ମରେ ସେ ହିରୋଇନ୍

ରାମ ଗୋପାଳ ବର୍ମା ସୋସିଆଲ୍ ମିଡ଼ିଆରେ କହିଥିଲେ: ‘‘ଅପ୍ସରାଙ୍କୁ ଭେଟିବା ପୂର୍ବରୁ ଓଡ଼ିଶା ବିଷୟରେ ମୁଁ ୧୯୯୯ର ବାତ୍ୟା ପର ଠାରୁ କିଛି ଶୁଣି ନ ଥିଲି । କିନ୍ତୁ ତାଙ୍କୁ ଭେଟିବା ପରେ ମୁଁ ଅନୁଭବ କଲି ଯେ ଓଡ଼ିଶା ସବୁ ପ୍ରକାର ବାତ୍ୟା ସୃଷ୍ଟି କରିଛି । ଏହା ଜାଣି ମୋ’ ଆଖି ଖୋଲିଗଲା ଯେ ଓଡ଼ିଶାରେ ଏମିତି ସୁନ୍ଦରୀ ଝିଅ ଅଛନ୍ତି ।’’

ଏହି ଟ୍ୱିଟରେ ବର୍ମା ଅପ୍ସରା ରାଣୀଙ୍କ ଫଟୋ ଲଗେଇଥିଲେ । ନିଜ ଟ୍ୱିଟରେ ଓଡ଼ିଶାର ଇଂରାଜୀ ବନାନ ଭୁଲ୍ (ପୂର୍ବବତ୍ Orissa) ଲେଖିଥିବାରୁ ଓ ଓଡ଼ିଶାରେ ‘‘ସୁନ୍ଦରୀ ଝିଅ’’ ଥିବା ସେ ଆଗରୁ ଜାଣି ନ ଥିଲେ ବୋଲି କହିଥିବାରୁ ସେ ସମାଲୋଚନାର ଶରବ୍ୟ ହୋଇଥିଲେ ।

ଉଦୀୟମାନ ଅଭିନେତ୍ରୀ ଅପ୍ସରା ରାଣୀ ସୋସିଆଲ୍ ମିଡ଼ିଆରେ ନିଜର ଅନେକ ବୋଲ୍ଡ ଫଟୋ ଛାଡ଼ିବା କାରଣରୁ ଚର୍ଚ୍ଚାରେ ରହନ୍ତି ।

ଅଭିନେତ୍ରୀ ଅପ୍ସରା ରାଣୀଙ୍କ ପ୍ରକୃତ ନାମ ହେଉଛି ଅଙ୍କିତା ମହାରଣା । ରାମ ଗୋପାଳ ବର୍ମା ନିଜ ଫିଲ୍ମ ‘ଥ୍ରୀଲର୍’ ପାଇଁ ତାଙ୍କୁ ସାଇନ୍ କରିବା ବେଳେ ତାଙ୍କ ନାଁ ପରିବର୍ତ୍ତନ କରି ଅପ୍ସରା ରାଣୀ ରଖିଛନ୍ତି । ଅଙ୍କିତାଙ୍କୁ ଏଥିରେ ଜମ୍ମା ଆପତ୍ତି ନାହିଁ । ସେ ବର୍ମାଙ୍କ ଏହି ଫିଲ୍ମରେ କାମ ପାଇଥିବାରୁ ଖୁବ୍‌ ଖୁସି ।

ଅପ୍ସରା ରାଣୀ ଓଡ଼ିଶାର ଝିଅ । ‘‘ସେ ଦେହରାଡୁନର ପାର୍ବତୀୟ ଅଞ୍ଚଳରେ ବଢ଼ିଥିଲେ ଓ ବର୍ତ୍ତମାନ ହାଇଦ୍ରାବାଦରେ ରହୁଛନ୍ତି । ସେ ଜଣେ ଉତ୍କୃଷ୍ଟ ନୃତ୍ୟ ଶିଳ୍ପୀ ଓ ଜଣେ ଆହୁରି ଉତ୍ତମ ଅଭିନେତ୍ରୀ,’’ ରାମୁ କହିଛନ୍ତି ।

ଅପ୍ସରା ରାଣୀ ୨୦୧୯ରେ ହିଁ ଫିଲ୍ମ ଇଣ୍ଡଷ୍ଟ୍ରିରେ ଡେବ୍ୟୁ କରିଥିଲେ । ‘ଥ୍ରୀଲର୍’ ପୂର୍ବରୁ ତେଲୁଗୁ ଫିଲ୍ମ ‘ଫୋର୍ ଲେଟର୍ସ୍’ (4 Letters) ଓ ଓଡ଼ିଆ-ତେଲୁଗୁ-ହିନ୍ଦୀ ଫିଲ୍ମ ‘ପାଟଣାଗଡ଼’ରେ ଅଭିନୟ କରିଥିଲେ । ‘ପାଟଣାଗଡ଼’ ଫିଲ୍ମ ୨୦୧୮ରେ ବଲାଙ୍ଗିର ଜିଲ୍ଲାର ପାଟଣାଗଡ଼ରେ ହୋଇଥିବା ପାର୍ସଲ୍ ବୋମା ବିସ୍ଫୋରଣ ଉପରେ ଆଧାରିତ ।

ଏକ ସାକ୍ଷାତକାରରେ ଅପ୍ସରା ରାଣୀ କହିଥିଲେ ଯେ ରାମ ଗୋପାଳ ବର୍ମାଙ୍କୁ ସେ ପିତାତୁଲ୍ୟ ବ୍ୟକ୍ତିତ୍ୱ ବୋଲି ଭାବନ୍ତି । ସେ ଆହୁରି ବି କହିଥିଲେ ଯେ ବାସ୍ତବରେ ସେ ତାଙ୍କ ଫିଲ୍ମର ନିର୍ଦ୍ଦେଶକ ହୋଇଥିବାରୁ ତାଙ୍କ ସହ କଥା ହେବାକୁ ସେ ଡରନ୍ତି ।

ରାମ ଗୋପାଳ ବର୍ମା କହିଥିଲେ ଯେ ଅପ୍ସରାଙ୍କୁ ଭେଟିବା ଆଗରୁ ଫିଲ୍ମ ଇଣ୍ଡଷ୍ଟ୍ରି ପାଇଁ ଓଡିଶାରେ ପ୍ରତିଭା ଅଛନ୍ତି ବୋଲି ସେ କେବେ ଭାବି ନ ଥିଲେ । ତାଙ୍କର ଏମିତି କହିବା ପରେ ଓଡ଼ିଶାରେ ଲୋକେ ତାଙ୍କୁ ଥଟ୍ଟା କରିବା ଆରମ୍ଭ କରିଥିଲେ । ଲୋକେ କହିଥିଲେ ଯେ ରାମୁ ଓଡ଼ିଶାକୁ ଯଥେଷ୍ଟ ଜାଣି ନାହାନ୍ତି ଓ ସୌନ୍ଦର୍ଯ୍ୟ ବିଷୟରେ ବି ହୁଏତ ତାଙ୍କର ଯଥେଷ୍ଟ ଜ୍ଞାନ ନାହିଁ ।