ଆପଣଙ୍କ ଦରମା ସମ୍ପର୍କୀୟ ଏହି ନିୟମଗୁଡ଼ିକ ଏପ୍ରିଲରୁ ବଦଳିଯିବ; ଅନେକ ପ୍ରଭାବିତ ହେବେ

ଏପ୍ରିଲ୍‌ ମାସରୁ କର୍ମଚାରୀମାନଙ୍କ ଦରମା, ପିଏଫ୍ ଓ ଗ୍ରାଚ୍ୟୁଇଟି ନିୟମ ପରିବର୍ତ୍ତନ ହେବାକୁ ଯାଉଛି । ନୂଆ କମ୍ପେନସେସନ୍‌ (କ୍ଷତିପୂରଣ) ନିୟମ ଲାଗୁ କରିବାକୁ କେନ୍ଦ୍ର ସରକାର ଯୋଜନା କରୁଛନ୍ତି । ସେହି କାରଣରୁ କମ୍ପାନୀଗୁଡ଼ିକର ବାଲାନ୍ସ ସିଟରେ ପରିବର୍ତ୍ତନ ଦେଖାଯିବ ।

ଏହି ନୂଆ ନିୟମଗୁଡ଼ିକ ଯୋଗୁଁ କର୍ମଚାରୀମାନଙ୍କ ସ୍ୟାଲାରୀ ସ୍ଲିପ୍, ପ୍ରୋଭିଡେଣ୍ଟ୍ ଫଣ୍ଡ୍‌, ଗ୍ରାଚ୍ୟୁଇଟି ଓ ହାତକୁ ଆସୁଥିବା ଦରମା ବି ବଦଳିଯିବ ।

ଏହି ନିୟମଗୁଡ଼ିକ ଗତ ବର୍ଷ ସଂସଦ ଦ୍ୱାରା ପାସ୍ ହୋଇଥିବା ୱେଜ୍ କୋଡ଼ର ଏକ ଅଂଶ । ଦରମା ସ୍କେଲର ଏକ ନୂଆ ସଂଜ୍ଞା ଆସନ୍ତା ଆର୍ଥିକ ବର୍ଷରୁ ଆରମ୍ଭ ହେବାକୁ ଯାଉଛି । ନୂଆ ନିୟମରେ ଭତ୍ତାର (ଆଲାଓନ୍ସର) ସୀମା ସ୍ଥିର କରାଯାଇଛି । ଏହା ମୋ’ଟ ବେତନର ୫୦ ପ୍ରତିଶତରୁ ଅଧିକ ହେବ ନାହିଁ ।

ଇକୋନୋମିକ୍ ଟାଇମ୍ସର ଖବର ଅନୁଯାୟୀ ଏହି ନିୟମ ସବୁ ଲାଗୁ ହେବା ପରେ ଅଧିକାଂଶ କମ୍ପାନୀମାନଙ୍କର ବେତନ ସଂରଚନାରେ (ପେ ଷ୍ଟ୍ରକଚରରେ) ପରିବର୍ତ୍ତନ ଦେଖାଯିବ । ଉଭୟ କର୍ମଚାରୀ ଓ କମ୍ପାନୀର PF ଅବଦାନରେ ବୃଦ୍ଧି ଘଟିବ । PF ଅବଦାନ ବୃଦ୍ଧି ହେଉଥିବା ଯୋଗୁଁ ଅନେକ କର୍ମଚାରୀଙ୍କ ଦରମା କମ୍‌ ହୋଇଯାଇପାରେ ।