photo gallery: ବଢେଇବାଙ୍କରେ ଅଟକିଲା ମହାପ୍ରଭୁ ଲିଙ୍ଗରାଜଙ୍କ ରୁକୁଣା ରଥ

ପବିତ୍ର ଅଶୋକାଷ୍ଟମୀ ତିଥିରେ ପ୍ରଭୁ ଲିଙ୍ଗରାଜଙ୍କ ରୁକୁଣା ରଥଯାତ୍ରା । ଦେବଦଳନ ରଥରେ ବସି ରାମେଶ୍ବର ମନ୍ଦିର ଅଭିମୁଖେ ଯାଇଛନ୍ତି ପ୍ରଭୁ ଲିଙ୍ଗରାଜ, ଭଉଣୀ ରୁକ୍ମିଣୀ ଏବଂ ପ୍ରଭୁ ଦୋଳଗୋବିନ୍ଦ ।

ପୂର୍ବ ରାତିରେ ଲିଙ୍ଗରାଜଙ୍କ ନୀତିକାନ୍ତିରେ ବିଳମ୍ବ ଓ ଠିକ୍ ସମୟରେ ମହାରଣା ସେବାୟତ ପ୍ରଶାସନକୁ ରଥ ହସ୍ତାନ୍ତର କରି ନ ପାରିବାରୁ, ରୁକୁଣା ରଥଯାତ୍ରା ନୀତିକାନ୍ତିରେ ବହୁ ବିଳମ୍ବ ଘଟିଥିଲା ।

ଭୋର ୫ଟାରୁ ମଙ୍ଗଳ ଆଳତି ଆରମ୍ଭ ହୋଇ ସକାଳ ଧୂପ ୯ଟା ୪୫ ସୁଦ୍ଧା ଶେଷ ହେବାକୁ ନିର୍ଘଣ୍ଟ ସ୍ଥିର ହୋଇଥିଲା । କିନ୍ତୁ ପୂର୍ବାହ୍ନ ୧୧ଟା ସୁଦ୍ଧା ଏସବୁ ପୂଜା ଓ ଧୂପ ସରି ପାରି ନ ଥିଲା । ସାଢ଼େ ୧୨ଟା ପରିବର୍ତ୍ତେ ପହଣ୍ଡି ସାଢ଼େ ୨ଟା ବେଳକୁ ଆରମ୍ଭ ହୋଇଥିଲା । ଛେରା ପହଁରା ଓ ରଥପୂଜା ସରି ଅପରାହ୍ନ ୫ଟା ୧୦ରେ ହୋଇଥିଲା ରଥଟଣା ।

ଝିପି ଝିପି ବର୍ଷାରେ ଭିଜିଥିଲେ ଭକ୍ତ । ପ୍ରବଳ ଉତ୍ସାହର ସହ ଟାଣିଥିଲେ ପ୍ରଭୁ ଲିଙ୍ଗରାଜଙ୍କ ରଥ । ରଥଦାଣ୍ଡ ପାଲଟି ଯାଇଥିଲା ଜନସମୁଦ୍ର । ଘଣ୍ଟଘଣ୍ଟା, ହରିବୋଲ ହୁଳୁହୁଳିରେ ପ୍ରକମ୍ପିତ ହୋଇଥିଲା ।

ରୁକୁଣା ରଥ ପାଇଁ ମୁତୟନ ହୋଇଛନ୍ତି ୧୨ ପ୍ଲାଟୁନ ଫୋର୍ସ । ଏଥର ରଥ ଯେଉଁଠି ଅଟକିବ, ପରଦିନ ସେଠାରୁ ଟଣାଯିବ ବୋଲି କହିଛନ୍ତି ପୋଲିସ କମିଶନର ।

ରଥ ଆଗରେ ଚାଲିଥିଲା ଗୋଟିପୁଅ ନୃତ୍ୟ । ଅତ୍ୟନ୍ତ ମନୋରମ ଥିଲା ରୁକୁଣା ରଥଟଣାର ପରିବେଶ ।

ନୀତିରେ ବିଳମ୍ବ ଘଟିଥିଲା ସତ କିନ୍ତୁ ଭକ୍ତି ଓ ଉତ୍ସାହରେ ପଡ଼ି ନ ଥିଲା ଭଟ୍ଟା । ରଥାରୂଢ଼ ଦିଅଁଙ୍କୁ ଦର୍ଶନ ପାଇଁ ଭକ୍ତ ଅପେକ୍ଷା କରିଥିଲେ । ତାସତ୍ତ୍ବେ ରଥଦାଣ୍ଡରେ କମି ନ ଥିଲା ଭକ୍ତଙ୍କ ଭିଡ଼ । ଜନସମୁଦ୍ର ଭିତରେ ଗଡ଼ି ଚାଲିଥିଲା ରୁକୁଣା ରଥ ।