ସୁବର୍ଣ୍ଣପୁର: ୧୦ ମାସର ପୁଅ ମରିଯିବାର ୨ ଦିନ ପରେ ବି ଗୁଣିଆ କଥାରେ ପଡ଼ି ଘରେ ରଖିଥିଲେ ବାପା-ମା’

ବିଜ୍ଞାନର ଏତେ ପ୍ରଗତି ସତ୍ତ୍ୱେ ଆଜି ବି ଅନେକ ଲୋକ ଅନ୍ଧବିଶ୍ବାସର ଶିକାର ହୋଇ ଅଛନ୍ତି ।

ସୁବର୍ଣ୍ଣପୁର ଜିଲ୍ଲାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଥିଲା । ଗୋଟିଏ ପରିବାର ୧୦ ମାସର ଶିଶୁ ପୁତ୍ରର ମୃତ୍ୟୁର ଦୁଇ ଦିନ ପରେ ବି ସେ ବଞ୍ଚିଯିବ ବୋଲି ଭାବି ତାକୁ ଘରେ ରଖିଥିଲା ।

ଦୁଇ ଜଣ ଗୁଣିଆଙ୍କ କଥାରେ ପଡ଼ି ତରଭା ବ୍ଲକ୍ ନାରାୟଣପୁର ଗାଁର ନବଘନ କର୍ମୀ ଓ ତାଙ୍କ ସ୍ତ୍ରୀ ମୃତ ଶିଶୁ ପୁତ୍ରର ଶବ ସତ୍କାର କରିବା ବଦଳରେ ତା’ ଦେହରେ ହଳଦୀ ଓ ଚନ୍ଦନ ଲଗାଇ ତାକୁ ଘରେ ରଖିଥିଲେ । ଦୁଇ ଗୁଣିଆ କହିଥିଲେ ମୃତ ଶିଶୁ ୨୫ ଘଣ୍ଟାରେ ଜୀବିତ ହୋଇ ଉଠିବ । କିନ୍ତୁ କୌଣସି ଗୁଣିଆର ମନ୍ତ୍ର କାମ ଦେଲାନି ।

ଶିଶୁଟିକୁ ଝାଡ଼ାବାନ୍ତି ହେବାରୁ ରାତି ଅଧରେ ତା’ ବାପା ମା’ ତାକୁ ବୁର୍ଲା ଡାକ୍ତରଖାନାକୁ ନେଇଥିଲେ । ସେଠାରେ ଡାକ୍ତରମାନେ ଶିଶୁଟିକୁ ମୃତ ଘୋଷଣା କରିବା ପରେ ତା’ ବାପା ବାପାମାଆଙ୍କ ମନ ମାନି ନ ଥିଲା । ନିଜ ସନ୍ତାନର ମୃତ୍ୟୁକୁ କେଉଁ ବାପମା’ ସହଜରେ ଗ୍ରହଣ କରିପାରିବେ?

ସେଠାରୁ ଫେରିବା ବାଟରେ ସେମାନେ ନାଇକେନପାଲି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଡାକ୍ତରଙ୍କୁ ଦେଖାଇଥିଲେ । ସେଠାରେ ବି ଶିଶୁଟିର ମୃତ୍ୟୁ ହୋଇସାରିଥିବା କହିଥିଲେ ଡାକ୍ତର ।

ତା’ ପରେ ଅନ୍ଧବିଶ୍ବାସର ବଶବର୍ତ୍ତୀ ହୋଇ ବାପା ଓ ମା’ ଗୁଣିଆର ଶରଣ ପଶିଥିଲେ । ଗୁଣିଆ କହିଥିଲା ମୃତ ଦେହରେ ହଳଦୀ ଓ ଚନ୍ଦନ ଲଗାଇ ରଖିଲେ ୨୫ ଘଣ୍ଟାରେ ପୁଅ ଜୀବିତି ହୋଇ ଉଠିବ । ତା’ ପରେ ବି ବାପା ଓ ମାଆ ଶବ ସତ୍କାର କରିବା ବଦଳରେ ବୌଦ୍ଧର ଆଉ ଏକ ଗୁଣିଆ ପାଖକୁ ମୃତ ଶିଶୁକୁ ନେଇଥିଲେ ।

ଏହି ଘଟଣାକୁ ସହଜରେ ଗ୍ରହଣ କରିପାରୁ ନାହାନ୍ତି ଗାଁ ଲୋକେ । ଏହି ଘଟଣା ଅନ୍ଧବିଶ୍ୱାସର ପରିଣତି ବୋଲି ସେମାନେ ହୃଦୟଙ୍ଗମ କରିଥିଲେ । ଶେଷରେ ଶିଶୁଟିର ପରିବାରକୁ ସେମାନେ ବୁଝାଇବା ପରେ ମୃତ ଦେହର ଅନ୍ତିମ ସତ୍କାର କରାଯାଇଥିଲା ।