ଖୋଲିବ ପରୀ ହତ୍ୟା ରହସ୍ୟ: SIT ତଦନ୍ତ ଜୋର୍ ଧରିଲା, ବାବୁଲି ନାୟକକୁ ୨ ଘଣ୍ଟା ଜେରା କରାଗଲା

ଅରୁଣ ବୋଥ୍ରା ଓ ତାଙ୍କ ଟିମ୍ ପରୀର ଘରକୁ ଯାଇ ତା’ ବାପା ଅଟୋ ଚାଳକ ଅଶୋକ ସାହୁ ଓ ମା’ ସୌଦାମିନୀ ସାହୁଙ୍କ ସହ କଥା ହୋଇଥିଲେ । ସେମାନଙ୍କ ଠାରୁ ତଦନ୍ତକାରୀ ଟିମ୍ କିଛି ଗୁରୁତ୍ୱପୂର୍ଣ୍ଣ ତଥ୍ୟ ସଂଗ୍ରହ କରିଥିବା ଜଣାପଡ଼ିଛି ।

SIT ତଦନ୍ତର ଦ୍ବିତୀୟ ଦିନରେ ବୋଥ୍ରାଙ୍କ ଟିମ୍‌ ପରୀର ବାପା ଓ ମାଆଙ୍କ ଅଭିଯୋଗକୁ ଭିତ୍ତି କରି ଏହି ମାମଲାର ଅଭିଯୁକ୍ତ ବାବୁଲି ନାୟକଙ୍କୁ ଟାଉନ୍‌ ଥାନାକୁ ଡାକି ଦୁଇ ଘଣ୍ଟା ଜେରା କରିଥିଲା । (ଫଟୋରେ ବାବୁଲି ନାୟକ)

ପରୀ ନିଖୋଜ ହେବା ଠାରୁ ତା’ ହାଡ଼ କଙ୍କାଳ ମିଳିବା ପର୍ଯ୍ୟନ୍ତ ବାବୁଲିର ଗତିବିଧି ଅନୁସନ୍ଧାନ କରିଥିଲା କ୍ରାଇମ ବ୍ରାଞ୍ଚ । ପରୀର ବାପା ଓ ମାଆଙ୍କ ଉପରେ ଆକ୍ରମଣ ଘଟଣାରେ ବି ବାବୁଲିକୁ ପଚରା ଉଚାର କରାଯାଇଥିଲା । ତା’ ପରେ SITର ଟିମ୍‌ ଯଦୁପୁର ଗାଁକୁ ଯାଇ ତଦନ୍ତ କରିବା ସହ ଗାଁ ଲୋକଙ୍କୁ ପଚରାଉଚରା କରିଥିଲା । (ଫଟୋରେ ପରୀର ମା’ ସୌଦାମିନୀ ସାହୁ)

ଏହି ଘଟଣାରେ ସଦର ଥାନା ପୋଲିସ ଠାରୁ ଆରମ୍ଭ କରି SDPO ଓ ଅତିରିକ୍ତ SPଙ୍କୁ ମଧ୍ୟ ଜେରା କରାଯାଇଥିଲା ।

SIT ମୁଖ୍ୟ ଅରୁଣ ବୋଥ୍ରା ପୂରା ତଦନ୍ତ ନିଜେ ଦେଖୁଥିବା ବେଳେ ଜେରା ପରେ ପ୍ରତିକ୍ରିୟା ଦେବାକୁ ମନା କରିଦେଇଥିଲେ ।

“ମୁଁ ଏବେ କିଛି କହି ପାରିବି ନାହିଁ । ସମୟ ଆସିଲେ ଆପଣଙ୍କୁ କହିବି । ମୋତେ କିଛି ସମୟ ଦିଅନ୍ତୁ । କାମ କରିବାକୁ ଆସିଛୁ, କାମ କରିବୁ…,’’ ସାମ୍ବାଦିକଙ୍କ ପ୍ରଶ୍ନର ଉତ୍ତରରେ କହିଥିଲେ ବୋଥ୍ରା ।

ପରୀର ହତ୍ୟା ଘଟଣାକୁ ଚାରି ମାସ ବିତିଯାଇଥିଲେ ବି ତା’ ହତ୍ୟାକାରୀଙ୍କୁ ଗିରଫ କରିବାରେ ପୋଲିସର ନିଷ୍କ୍ରିୟତାରେ ଅତିଷ୍ଠ ହୋଇ ପରୀର ବାପା ଓ ମା’ ବିଧାନସଭା ବାହାରେ ଆତ୍ମାହୂତି କରିବାକୁ ଉଦ୍ୟମ କରିଥିଲେ ।

ସେମାନେ ପୋଲିସ ତଦନ୍ତରେ ରାଜନୈତିକ ହସ୍ତକ୍ଷେପର ଆରୋପ ଲଗାଇ କୃଷି ମନ୍ତ୍ରୀ ଅରୁଣ ସାହୁଙ୍କ ନାମ ନେଇଥିଲେ ।

ଏହି ମାମଲାରେ ରାଜ୍ୟବ୍ୟାପୀ ଅସନ୍ତୋଷ ପ୍ରକାଶ ପାଇବା ପରେ ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକ ଏସଆଇଟି ଦ୍ୱାରା ତଦନ୍ତର ଆଦେଶ ଦେଇଥିଲେ ।

ପରୀ ହତ୍ୟା ମାମଲାରେ ରାଜ୍ୟପାଳଙ୍କ ହସ୍ତକ୍ଷେପ ଲୋଡ଼ିଛି ବିଜେପି । ବିରୋଧୀ ଦଳ ନେତା ପ୍ରଦୀପ୍ତ ନାୟକଙ୍କ ନେତୃତ୍ବରେ ବିଜେପିର ଏକ ପ୍ରତିନିଧି ମଣ୍ଡଳୀ ରାଜଭବନକୁ ଯାଇ ରାଜ୍ୟପାଳଙ୍କୁ ସାକ୍ଷାତ କରିଥିଲେ ।

ବିଜେପି ନେତା ପ୍ରଦୀପ୍ତ ନାୟକ ଅଭିଯୋଗ କରିଛନ୍ତି ଯେ ପରୀ ହତ୍ୟାକାଣ୍ଡରେ ରାଜନେତାଙ୍କ ସଂପୃକ୍ତି ଥିବାରୁ ଏହାର ତଦନ୍ତ ସଠିକ୍ ବାଟରେ କରିବାକୁ ଚାହୁଁନାହାନ୍ତି ରାଜ୍ୟ ସରକାର । ସେଇଥି ପାଇଁ ରାଜ୍ୟରେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହୋଇଛି ବୋଲି ଦଳ କହିଛି ।

ଏହି ଘଟଣାରେ କୃଷି ମନ୍ତ୍ରୀ ଅରୁଣ ସାହୁଙ୍କ ଇସ୍ତଫା ଦାବି କରି ରାଜଧାନୀ ଭୁବନେଶ୍ୱରରେ ଗର୍ଜିଛନ୍ତି ଏବିଭିପି କର୍ମୀମାନେ ।

ଏବିଭିପି କର୍ମୀମାନେ ମନ୍ତ୍ରୀ ଅରୁଣ ସାହୁଙ୍କ ବାସଭବନ ଘେରାଉ ଉଦ୍ୟମ କରିବା ବେଳେ ପୋଲିସ ସେମାନଙ୍କୁ ରୋକିଥିଲା ।

ସେହି ଦାବି ଉଠାଇ ନୟାଗଡ଼ରେ ଜିଲ୍ଲାପାଳଙ୍କ ଅଫିସ ବି ଘେରାଉ କରିଥିଲେ କଂଗ୍ରେସ କର୍ମୀମାନେ ।