ଗରମ ଗରମ ଚା’ ପିଇବାକୁ କାହାକୁ ଭଲ ନ ଲାଗେ? ଆଜି ଆନ୍ତର୍ଜାତୀୟ ଚା ଦିବସରେ (International Tea Day 2021) ଆମେ ଚା’ ବିଷୟରେ ଏକ ଆଶ୍ଚର୍ଯ୍ୟ କରିବା ପରି କଥା ଜାଣିବା । (ଫଟୋ: ରୟଟର୍ସ ଓ ଆଲାମି) ଚମକିଗଲେ ନା? ଗୋଟିଏ କପ୍ ଚା’ର ଦାମ୍ ଏକ ହଜାର ଟଙ୍କା । ଇଏ କୌଣସି ପଞ୍ଚ-ତାରକା ହୋଟେଲ ନୁହେଁ, ବରଂ ପଶ୍ଚିମ ବଙ୍ଗରେ ଏକ ରାସ୍ତା କଡ଼ରେ ଥିବା ଏକ ଚା’ ଷ୍ଟଲ୍ । ସେଇଠି ବସି ଆପଣ ଏହି ଚା’ ପିଇପାରିବେ । ଏହି ରାସ୍ତା କଡ଼ର ଚା’ ଦୋକାନରେ ଆପଣ ଜାପାନର ସିଲଭର୍ ନିଡଲ୍ ହ୍ୱାଇଟ୍ ଟି ଠାରୁ ଆରମ୍ଭ କରି ଆଫ୍ରିକୀୟ କାରାମେଲ୍, ନାଇଜେରିଆର ରେଡ୍ ୱାଇନ୍ ଚା’ ଆଉ ଅଷ୍ଟ୍ରେଲିଆର ଲାଭେଣ୍ଡର୍ ପର୍ଯ୍ୟନ୍ତ ବିଭିନ୍ନ ପ୍ରକାରର ଚା’ ପିଇପାରିବେ । ଏହି ଦୋକାନର ମାଲିକ ପାର୍ଥପ୍ରତୀମ ଗାଙ୍ଗୁଲି । ଚା’ ପ୍ରତି ତାଙ୍କର ଭୀଷଣ ଭଲପାଇବା ଯୋଗୁଁ ସେ ଚାକିରି ଛାଡ଼ି ଚା’ ଦୋକାନି ହୋଇଛନ୍ତି । ତାଙ୍କ ଚା’ ଦୋକାନରେ ସାରା ବିଶ୍ୱରୁ ପ୍ରାୟ ୧୧୫ ପ୍ରକାରର ଚା’ ମିଳେ । ସିଲଭର୍ ନିଡଲ୍ ହ୍ୱାଇଟ୍ ଟି’ର ଦାମ୍ କିଲୋଗ୍ରାମ୍ ପିଛା ୨ ଲକ୍ଷ ୮୦ ହଜାର ଟଙ୍କା ହୋଇଥିବା ବେଳେ କେମୋମାଇଲ୍ ଚା’ର ଦାମ୍ କିଲୋଗ୍ରାମ ପିଛା ୧୪ ହଜାର ଟଙ୍କା । ପାର୍ଥପ୍ରତୀମ ଗାଙ୍ଗୁଲି ଦାବି କରିଛନ୍ତି ଯେ ପ୍ରତି ୧,୦୦୦ ଲୋକଙ୍କ ମଧ୍ୟରୁ ୧୦୦ ଜଣ ତାଙ୍କ ଦୋକାନକୁ ଆସନ୍ତି । ‘‘ପ୍ରଥମ ଥର ପାଇଁ ଆସୁଥିବା ଲୋକେ କେବଳ ଚା’ର ସ୍ୱାଦ ପାଇଁ ଆସନ୍ତି, ଆଉ ତା’ପରେ ପୁଣି ବେଳେ ବେଳେ ଆସନ୍ତି,’’ ସେ କହିଛନ୍ତି । କେତେକ ଲୋକ ତ ଚା ’ପାଇଁ ପାର୍ଥବାବୁଙ୍କ ଦୋକାନକୁ ନିୟମିତ ଆସନ୍ତି । ସେମାନଙ୍କ ମଧ୍ୟରୁ କେତେ ଜଣ ତାଙ୍କ ଷ୍ଟଲ୍ ଖୋଲା ଅଛି କି ନାହିଁ ତାହା ଜାଣିବାକୁ ତାଙ୍କୁ ପୂର୍ବରୁ ଫୋନ୍ କରି ଆସନ୍ତି ।
