ସୁବର୍ଣ୍ଣପୁର: ରାସ୍ତା କଡ଼ରେ ଥିବା ଟେଲିଫୋନ ମରାମତି ଗାଡ଼ିରେ କାର୍ ଧକ୍କା ଦେଲା; ୧ ମୃତ, ୧ ଆହତ
ଭୁବନେଶ୍ବରରୁ ବାହାରି ଏକ କାରରେ ବଲାଙ୍ଗିରକୁ ଯାଉଥିଲେ ଦୁଇ ବନ୍ଧୁ । ଦୃତ ଗତିରେ ଗାଡ଼ି ଚାଳନା ଯୋଗୁଁ ଘଟିଗଲା ମର୍ମନ୍ତୁଦ ସଡ଼କ ଦୁର୍ଘଟଣା । କାରରେ ଥିବା ୨୨ ବର୍ଷୀୟ ଯୁବକଙ୍କ ମୃତ୍ୟୁ ଘଟିଲା । ତାଙ୍କ ସାଥୀ ଏବେ ଚିକିତ୍ସାଧୀନ ଅଛନ୍ତି ।

ସୁବର୍ଣ୍ଣପୁର ଜିଲ୍ଲାରେ ଖୋର୍ଦ୍ଧା-ବଲାଙ୍ଗିର ଜାତୀୟ ରାଜପଥର ଅର୍ଜୁନପୁର ଛକ ପାଖରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି ।

ରାସ୍ତା କଡ଼ରେ ଛିଡ଼ା ହୋଇଥିବା ଏକ ଟେଲିଫୋନ ମରାମତି ପାଇଁ ବ୍ୟବହାର ହେଉଥିବା ଗାଡ଼ିରେ ଏକ କାର୍ ଦୃତ ଗତିରେ ଆସି ଧକ୍କା ଦେଇଥିଲା ।

କାରରେ ଥିବା ଦୁଇ ଜଣଙ୍କ ମଧ୍ୟରୁ ଜଣଙ୍କର ମୃତ୍ୟୁ ହୋଇଛି ଓ ଅନ୍ୟ ଜଣକ ଗୁରୁତର ଆହତ ହୋଇଛନ୍ତି । ମୃତକ ଜଣକ ହେଲେ ବୌଦ୍ଧ ଜିଲ୍ଲା ପୁରୁଣାକଟକ ଅଞ୍ଚଳର ୨୨ ବର୍ଷୀୟ ଶୁଭ୍ରାଂଶୁ ଯୋଷୀ ।

ଆହତ ଯୁବକ ଜଣଙ୍କ ଘର ସମ୍ବଲପୁରରେ । ତାଙ୍କ ନାଁ ବିକାଶ ରାୟ ବୋଲି ଜଣାପଡ଼ିଛି । ସୁଭ୍ରାଂଶୁ ଓ ବିକାଶ ମଙ୍ଗଳବାର ରାତିରେ ଏକ କାର ଯୋଗେ ଭୁବନେଶ୍ବରରୁ ବାହାରି ବଲାଙ୍ଗିରକୁ ଯାଉଥିଲେ ।

ବୁଧବାର ଭୋର୍ ତାଙ୍କ କାରଟି ଭାରସାମ୍ୟ ହରାଇ ଟେଲିଫୋନ ମରାମତି ପାଇଁ ରାସ୍ତା କଡ଼ରେ ଛିଡା ହୋଇଥିବା ଗାଡି ସହିତ ଜୋରରେ ଧକ୍କା ଦେଇଥିଲା ।

ଗାଡ଼ିରେ ବସିଥିବା ଦୁଇ ଜଣଙ୍କୁ ଗରୁତର ଅବସ୍ଥାରେ ଉଦ୍ଧାର କରି ସୋନପୁର ଜିଲ୍ଲା ମୁଖ୍ୟ ଡାକ୍ତରଖାନାକୁ ଅଣାଯାଇଥିଲା । ଚିକିତ୍ସାଧୀନ ଅବସ୍ଥାରେ ଶୁଭ୍ରାଂଶୁଙ୍କ ମୃତ୍ୟୁ ହୋଇଥିଲା ।