ରମାଦେବୀ ମହିଳା ବିଶ୍ୱବିଦ୍ୟାଳୟର ଛାତ୍ରୀ ଝରାଫୁଲ ନାୟକଙ୍କ ସନ୍ଦେହଜନକ ମୃତ୍ୟୁର କାରଣ ଓ ସେଥିରେ ତାଙ୍କ ପୁରୁଷ ବନ୍ଧୁ ତଥା ପ୍ରେମିକ ରାକେଶ ସ୍ୱାଇଁଙ୍କ ଭୂମିକାକୁ ନେଇ ଧନ୍ଦି ହେଉଛି ପୋଲିସ । ତାଙ୍କ ମୃତ୍ୟୁକୁ ଛଅ ଦିନ ବିତିଯାଇଥିଲେ ବି ପୋଲିସ ପାଖରେ କିଛି ଶକ୍ତ ସୁରାକ ଏ ପର୍ଯ୍ୟନ୍ତ ଲାଗିପାରି ନ ଥିବା ଜଣାପଡ଼ିଛି । ଅଭିଯୁକ୍ତ ପ୍ରେମିକ ରାକେଶ ସ୍ୱାଇଁଙ୍କୁ ତିନି-ଦିନିଆ ରିମାଣ୍ଡରେ ନେଇ ଯାଜପୁର ପୋଲିସ ଜେରା କରିବା ଆରମ୍ଭ କରିଛି । ଏଥି ସହ ଝରାଫୁଲଙ୍କ ମୃତ ଦେହକୁ ସେ ଓ ତା’ ବନ୍ଧୁ ଶେଖର ନେଇ ଫିଙ୍ଗିଥିବା ସ୍ଥାନ କୁଆଖିଆର ମୂଳାପାଳକୁକୁ ରାକେଶକୁ ନେଇ ଡେମୋ କରାଇଛି ଯାଜପୁର ପୋଲିସ । ମୃତ ଦେହ ଫିଙ୍ଗାଯାଇଥିବା ସ୍ଥାନରେ ପୋଲିସ ରାକେଶକୁ ନେଇ ପହଞ୍ଚିବା ପରେ ରାକେଶ ପୋଲିସ ଗାଡ଼ିରୁ ଓହ୍ଲାଇ ନ ଥିଲା, କିନ୍ତୁ କେଉଁଠି ମୃତ ଦେହ ସେ ଫିଙ୍ଗିଥିଲା ତାହା ଦେଖାଇଥିଲା । ସେଠାରେ ବହୁ ଖୋଜାଖୋଜି ପରେ ବି ମିଳି ନ ଥିଲା ଝରାଫୁଲଙ୍କ ମୋବାଇଲ୍ ଫୋନ୍ । ଝରାଫୁଲଙ୍କ ମୃତ୍ୟୁ କେମିତି ହେଲା ତା’ର ଖୁଲାସା ଅଭିଯୁକ୍ତ ପ୍ରେମିକ ରାକେଶ ସ୍ବାଇଁ କରିବ ବୋଲି ଆଶା ଥିଲେ ବି ଏ ପର୍ଯ୍ୟନ୍ତ ପୋଲିସ କୌଣସି ନିର୍ଦ୍ଦିଷ୍ଟ ନିଷ୍କର୍ଷର ପାଖ ପହଞ୍ଚିପାରିନି । ମୟୂରଭଞ୍ଜର ଯଶୀପୁରରୁ ଝରାଫୁଲଙ୍କ ବାପା ରମାକାନ୍ତ ନାୟକଙ୍କୁ ଡକାଇ ରାକେଶ ସହ ମୁହାଁମୁହିଁ ଜେରା କରିଛି ପୋଲିସ । ଏଥିରୁ ପୋଲିସକୁ ବିଶେଷ କିଛି ହାସଲ ହୋଇ ନ ଥିବା ଜଣାପଡ଼ିଛି । ଝରାଫୁଲ; (ଡାହାଣ) ତୃତୀୟ ସିସିଟିଭି ଫୁଟେଜରେ ରେସ୍ତୋରାଁ ବାହାରେ ସେ ରାକେଶଙ୍କ ସହ ଦିଶୁଛନ୍ତି । ରାକେଶ ସହ ସ୍କୁଟିରେ ଝରାଫୁଲଙ୍କ ମୃତ ଦେହ ନେଇ ଯାଇଥିବା ଅନ୍ୟ ଯୁବକ ଶେଖରର ଏ ପର୍ଯ୍ୟନ୍ତ ପତ୍ତା ମିଳୁନି । ସେ ସାମ୍ନାକୁ ଆସିଲେ ଝରାଫୁଲଙ୍କ ମୃତ୍ୟୁ ରହସ୍ୟ ଖୋଲିବ ବୋଲି ଆଶା ରଖିଛନ୍ତି ଶୋକାତୁର ବାପା ରମାକାନ୍ତ ନାୟକ । ଝରାଫୁଲ ଓ ରାକେଶ ଥିବା ତିନି ତିନିଟି ସିସିଟିଭି ଫୁଟେଜ୍ ସାମନାକୁ ଆସିବା ଯୋଗୁଁ ହିଁ ପୋଲିସ ଝରାଫୁଲଙ୍କ ପ୍ରେମିକ ରାକେଶ ପାଖରେ ସହଜରେ ପହଞ୍ଚି ପାରିଛି । ହେଲେ ଶେଖର ଏ ପର୍ଯ୍ୟନ୍ତ ପୋଲିସ ହାତରେ ଲାଗି ନ ଥିବାରୁ ତଦନ୍ତର କାର୍ଯ୍ୟକ୍ଷମତା ଓ ନିଷ୍ଠା ଉପରେ ପ୍ରଶ୍ନ ଉଠିବା ଆରମ୍ଭ ହୋଇଛି । ଝରାଫୁଲଙ୍କ ମୃତ ଦେହର ପୋଷ୍ଟ ମର୍ଟମ ରିପୋର୍ଟକୁ ପୋଲିସ ଗୋପନ ରଖିଥିବା ଓ ଭିସେରା ନମୁନା ପରୀକ୍ଷାର ରିପୋର୍ଟକୁ ଅପେକ୍ଷା କରାଯାଉଥିବା ବେଳେ ତଦନ୍ତକାରୀ ପୋଲିସ ଅଧିକାରୀଙ୍କ ସାମନାରେ ମୃତ୍ୟୁର କାରଣ ବିଷୟରେ ଅନେକ ଜଟିଳ ଓ ଅସମାହିତ ପ୍ରଶ୍ନ ଠିଆ ହୋଇଛି ବୋଲି ପୋଲିସ ସୂତ୍ରରୁ ଜଣା ପଡ଼ିଛି । ପ୍ରଥମ ବଡ଼ ପ୍ରଶ୍ନ ହେଉଛି ଭୀଷଣ ପେଟ ଖରାପ ଥିବା ଯୋଗୁଁ ଅସୁସ୍ଥ ଥିବା ଝରାଫୁଲଙ୍କ ମୃତ୍ୟୁ ସେହି କାରଣରୁ, ଅର୍ଥାତ ଫୁଡ୍ ପଏଜନିଂ ଯୋଗୁଁ, ହୋଇଥିଲା ନା ତାଙ୍କୁ ହତ୍ୟା କରାଯାଇଥିଲା? (ଫଟୋରେ ଅଭିଯୁକ୍ତ ରାକେଶ ସ୍ୱାଇଁ) ଦ୍ୱିତୀୟ ବଡ଼ ପ୍ରଶ୍ନ ହେଉଛି ରାକେଶ ସ୍ୱାଇଁ ଅସୁସ୍ଥ ଝରାଫୁଲଙ୍କୁ କୌଣସି ଡାକ୍ତରଙ୍କୁ ଦେଖାଇବାକୁ ନ ନେଇ ତାଙ୍କ ସହ କାହିଁକି ହୋଟେଲରେ ରାତ୍ରି ଯାପନ କରିଥିଲେ? ତାଙ୍କୁ ହତ୍ୟା କରାଯାଇଥିବାର ପ୍ରମାଣ ନ ମିଳିଲେ ବି ରାକେଶଙ୍କୁ ଦାୟିତ୍ୱହୀନତା ଯୋଗୁଁ ମୃତ୍ୟୁରେ ସହଯୋଗ କରିଥିବା ଅଭିଯୋଗର ସାମନା କରିବାକୁ ହେବ । ତୃତୀୟ ବଡ଼ ପ୍ରଶ୍ନ ହେଉଛି ଅତ୍ୟଧିକ ନିଶା ସେବନ ଯୋଗୁଁ ବା ନିଶାସକ୍ତ ଅବସ୍ଥାରେ ଶାରୀରିକ ସମ୍ପର୍କ ରଖିଥିବା ଯୋଗୁଁ ଝରାଫୁଲଙ୍କ ମୃତ୍ୟୁ ହୋଇ ନ ଥିଲା ତ? ଝରାଫୁଲଙ୍କ ମୃତ ଦେହକୁ ସ୍କୁଟିରେ ବସାଇ ଯାଜପୁର ଅଭିମୁଖେ ନେଇ ସେଠାରେ ଫିଙ୍ଗିଦେଇଥିବା ଅଭିଯୋଗରେ ରାକେଶ ଓ ତାଙ୍କ ବନ୍ଧୁଙ୍କୁ ଆଇ.ପି.ସି.ର ଧାରା ଅନୁସାରେ ଟ୍ରାଏଲର ସାମନା କରିବାକୁ ପଡ଼ିବ । ଝରାଫୁଲଙ୍କ ପୋଷ୍ଟମର୍ଟମ୍ ରିପୋର୍ଟ ଓ ଭିସେରା ରିପୋର୍ଟ ଅନେକ ଏହି ଜଟିଳ ମାମଲାରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ସାମନାକୁ ଆଣିବ । ଭିସେରା ରିପୋର୍ଟ ପାଇଁ ମୃତ ଦେହର ଅଂଶ ବିଶେଷ ଭୁବନେଶ୍ଵର ଫରନେସିକ ଲାବରୋଟାରୀକୁ ପଠାଯାଇଛି । ରମାଦେବୀ ବିଶ୍ବବିଦ୍ୟାଳୟରେ (Ramadevi University) ଯୁକ୍ତ ତିନି ଦ୍ବିତୀୟ ବର୍ଷର ଫିଲୋସୋପି ଅନର୍ସ ଛାତ୍ରୀ ଥି୍ଲେ ଝରାଫୁଲ ନାୟକ । ତାଙ୍କ ଘର ମୟୁରଭଞ୍ଜ ଜିଲ୍ଲା ଯଶୀପୁର ଥାନା ମରୁଣ୍ଡେଇପଶି ଗାଁରେ । ତାଙ୍କ ବାପାଙ୍କ ନାଁ ରମାକାନ୍ତ ନାୟକ ବୋଲି ଜଣାପଡ଼ିଛି । ଜାନୁଆରୀ ୨୭ ତାରିଖ ସକାଳେ ତାଙ୍କ ମୃତ ଦେହ ମିଳିଥିଲା ଯାଜପୁର କୁଆଖିଆ ଥାନା ମୂଳାପାଳ ନିକଟ ରାସ୍ତା କଡ଼ରୁ । ରାକେଶ ନିଜ ସାଙ୍ଗ ଶେଖର ସହ ଝରାଫୁଲଙ୍କ ମୃତ ଦେହକୁ ଆଣି ମୂଳପାଳ ଛକ ନିକଟରେ ରାସ୍ତା କଡ଼ରେ ଫିଙ୍ଗିଥିଲା । ଜାନୁଆରୀ ୨୭ ତାରିଖ ସକାଳେ ରାସ୍ତାରେ ରାକେଶ ଓ ଶେଖର ମୃତ ଦେହକୁ ଏକ ନାଲି ସ୍କୁଟିରେ ନେଉଥିବାର ଦୃଶ୍ୟ ସିସିଟିଭି କ୍ୟାମେରାରେ କୈଦ ହୋଇଥିଲା ।
