ପୁରୀରେ ଏକ ସ୍କୁଲ୍ ହତାରେ ଏକ ଅଭାବନୀୟ ଘଟଣା ଘଟିଛି । ଜଣେ ଶ୍ରେଣୀର ଛାତ୍ରଙ୍କୁ ଛୁରା ମାଡ଼ କରିଛନ୍ତି ସେହି ଶ୍ରେଣୀର ଦୁଇ ଛାତ୍ର । ଭୋଳାନାଥ ବିଦ୍ୟାପୀଠରେ ଜଣେ ଛାତ୍ରଙ୍କୁ ମାଡ଼ି ବସି ଅନ୍ୟ ଦୁଇ ଜଣ ଛାତ୍ର ଛୁରା ମାଡ଼ କରୁଥିବା ଦେଖାଯାଇଥିଲା । ଏହି ଦୃଶ୍ୟ ଦେଖି ଆଖ ପାଖରେ ଥିବା ଲୋକେ ଚକିତ ହୋଇଯାଇଥିଲେ । ଗୁରୁତର ଅବସ୍ଥାରେ ଥିବା ଆହତ ଛାତ୍ରଙ୍କୁ ପୁରୀ ସଦର ହସ୍ପିଟାଲରେ ଭର୍ତ୍ତି କରାଯାଇଥିଲା । ଦୁଇ ଅଭିଯୁକ୍ତ ଛାତ୍ରଙ୍କୁ ଅଟକ ରଖିଥିଲା କୁମ୍ଭାରପଡ଼ା ଥାନା ପୋଲିସ । ପରେ ସେମାନଙ୍କୁ ଜୁଭେନାଇଲ ଜଷ୍ଟିସ୍ ବୋର୍ଡ଼ରେ ହାଜର କରାଯାଇଥିଲା । ଏହି ଘଟଣା ପୁରୀ ଗୁଣ୍ଡିଚା ମନ୍ଦିର ପାଖରେ ଥିବା ଭୋଳାନାଥ ବିଦ୍ୟାପୀଠରେ ବୁଧବାର ଦିନ (ମାର୍ଚ୍ଚ ୩୧) ସକାଳ ସାଢ଼େ ୯ଟାରେ ଘଟିଥିଲା । ଘଟଣାକୁ ନେଇ ସ୍କୁଲ୍ ପକ୍ଷରୁ ଥାନାରେ ଅଭିଯୋଗ କରାଯିବା ପରେ ପୋଲିସ ମାମଲା ରୁଜୁ କରିଥିଲା । ଥାନାରେ ହୋଇଥିବା ଅଭିଯୋଗ ଅନୁଯାୟୀ ପୂର୍ବ ଗଣ୍ଡଗୋଳର ପ୍ରତିଶୋଧ ନେବା ପାଇଁ ନବମ ଶ୍ରେଣୀର ଦୁଇ ଜଣ ଛାତ୍ର ଅନ୍ୟ ଜଣେ ଛାତ୍ରଙ୍କୁ ସ୍କୁଲ ଫାଟକ ଯାଏ ଘୋଷାରି ଘୋଷାରି ଆଣିଥିଲେ । ତାଙ୍କୁ ତଳେ ପକାଇ ତାଙ୍କ ବାମ ହାତକୁ ପେନସିଲ୍ କଟା ଛୁରୀରେ ବାରମ୍ବାର ଆଘାତ କରିଥିଲେ । ଜଣେ ଅଭିଯୁକ୍ତ ଛାତ୍ରଙ୍କ ମା’ କହିଛନ୍ତି ଯେ ସେ ଏହି ଘଟଣାର କାରଣ ଜାଣି ନାହାନ୍ତି । ‘‘ସେମାନେ ସବୁ ସାଙ୍ଗ । ସm୍କୁଲ୍ ଛୁଟି ସମୟରେ ବାହାରକୁ ଯାଉଥିବା ବେଳେ ଜଣେ କହିଲା ତୁ ତାକୁ ଧର । ସେ (ତାଙ୍କ ପୁଅ) ଧରିବା ପରେ ସେ (ଅନ୍ୟ ଅଭିଯୁକ୍ତ) ତା’ ହାତ କାଟିଦେଲା ।’’ ସ୍କୁଲ କ୍ୟାମ୍ପସରେ ପିଲାଙ୍କ ଭିତରେ ଛୁରା ମାଡ଼ ପରି ଅତି ସାଙ୍ଘାତିକ ଘଟଣା ବିଷୟରେ ପୁରୀ ବି.ଇ.ଓ. ଶରତ ମିଶ୍ର କହିଛନ୍ତି ଯେ ସେ ଏହି ଘଟଣା ବିଷୟରେ ତଥ୍ୟ ମାଗିଛନ୍ତି । ହେଲେ ଘଟଣା ସ୍କୁଲ୍ ହତା ବାହାରେ ହୋଇଛି ବୋଲି ସେ କହିଛନ୍ତି । ପୂର୍ବରୁ ଗଞ୍ଜାମ ଜିଲ୍ଲାରେ ଏଭଳି ଏକ ଘଟଣା ଘଟିଥିଲା । ଏବେ ପୁରୀରେ ସେହି ଘଟଣାର ପୁନରାବୃତ୍ତି ହେବାରୁ ସମାଜରେ ଚିନ୍ତା ବଢ଼ିଛି ।
