ଟ୍ରେଣ୍ଡିଙ୍ଗ
ଅଯୋଧ୍ୟା ରାମ ମନ୍ଦିର ଭୂମି ପୂଜନ: PM ମୋଦି ରାମଲାଲାଙ୍କ ଆଗରେ ଦଣ୍ଡବତ ହେଲେ, ଦେଖନ୍ତୁ ଫଟୋ
Ram Mandir Bhumi Pujan: ଅଯୋଧ୍ୟାରେ ରାମ ମନ୍ଦିର ନିର୍ମାଣ ପାଇଁ ଅନେକ ବର୍ଷର ଅପେକ୍ଷାର ଆଜି ଅନ୍ତ ହେଲା । ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି ମନ୍ଦିର ପାଇଁ ଭୁମି ପୂଜନ କଲେ ଓ ମନ୍ଦିରର ଶିଳାନ୍ୟାସ କଲେ । ଏବେ ମନ୍ଦିର ନିର୍ମାଣ ଆରମ୍ଭ ହେବ । ଭୁମି ପୂଜନ ପୂର୍ବରୁ ମୋଦି ହନୁମାନଗଢ଼ୀ ଦର୍ଶନ କରି ରାମଲାଲାଙ୍କୁ ପୂଜା କରିଥିଲେ। ଦେଖନ୍ତୁ କିଛି ବିଶେଷ ଫଟୋ ।
ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି (Prime Minister Narendra Modi) ସକାଳ ୯:୩୦ରେ ଦିଲ୍ଲୀରୁ ଲକ୍ଷ୍ନୌ ଅଭିମୁଖେ ଯାତ୍ରା କରିଥିଲେ । ତା’ପରେ ସେଠାରୁ ସାଢ଼େ ୧୦ଟା ବେଳେ ହେଲିକପ୍ଟରରେ ଆସି ଅଯୋଧ୍ୟାରେ ପହଞ୍ଚିଥିଲେ । ଉତ୍ତର ପ୍ରଦେଶର ମୁଖ୍ୟ ମନ୍ତ୍ରୀ ଯୋଗୀ ଆଦିତ୍ୟନାଥ (Yogi Adityanath) ପ୍ରଧାନ ମନ୍ତ୍ରୀ ମୋଦିଙ୍କୁ ସ୍ୱାଗତ କରିଥିଲେ ।
ଅଯୋଧ୍ୟାରେ ରାମ ମନ୍ଦିର ନିର୍ମାଣ ପାଇଁ ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି ଭୂମି ପୂଜନ କଲେ । ଭୁମି ପୂଜନ ପୂର୍ବରୁ ସେ ପ୍ରଥମେ ଦଶମ ଶତାବ୍ଦୀର ପ୍ରାଚୀନ ମନ୍ଦିର ହନୁମାନଗଢ଼ୀ ବୁଲି ଦେଖିଥିଲେ ।
ହନୁମାନଗଢ଼ୀର ମୁଖ୍ୟ ପୁରୋହିତ ମୋଦିଙ୍କୁ ପଗଡ଼ି, ରୂପାର ମୁକୁଟ ଓ ଷ୍ଟୋଲ୍ ପିନ୍ଧାଇ ସମ୍ମାନିତ କରିଥିଲେ । କରୋନା କାରଣରୁ ମୋଦିଙ୍କୁ ଟୀକା ଲଗାଯାଇ ନ ଥିଲା ।
ହନୁମାନଗଢ଼ୀ ପରେ ପ୍ରଧାନ ମନ୍ତ୍ରୀ ମୋଦି ରାମ ଜନ୍ମଭୂମି ପହଞ୍ଚିଥିଲେ । ସେଠାରେ ସେ ରାମଲାଲାଙ୍କୁ ଷଷ୍ଠାଙ୍ଗ ପ୍ରଣାମ କରି ତାଙ୍କ ଦର୍ଶନ କରିଥିଲେ । ଏହି ସମୟରେ ସାମାଜିକ ଦୂରତା ଉପରେ ବିଶେଷ ଧ୍ୟାନ ଦିଆଯାଇଥିଲା ।
ଦେଶର ସ୍ୱାଧୀନତା ପରେ ପ୍ରଥମ ଥର ପାଇଁ ପ୍ରଧାନ ମନ୍ତ୍ରୀ ଭାବରେ ଜଣେ ନେତା ରାମଲାଲାଙ୍କୁ ଦର୍ଶନ କରିଛନ୍ତି । ଯଦିଓ ନରେନ୍ଦ୍ର ମୋଦିଙ୍କ ପୂର୍ବରୁ ଇନ୍ଦିରା ଗାନ୍ଧୀଙ୍କ ଠାରୁ ରାଜୀବ ଗାନ୍ଧୀ ଓ ଅଟଳ ବିହାରୀ ବାଜପେୟୀ ପ୍ରଧାନ ମନ୍ତ୍ରୀ ଭାବରେ ଅଯୋଧ୍ୟା ଗସ୍ତ କରିଥିଲେ, ତଥାପି ସେମାନେ ରାମ ଜନ୍ମଭୂମି ଠାରୁ ଦୂରତ୍ୱ ରଖିଥିଲେ । ନରେନ୍ଦ୍ର ମୋଦି ଦେଶର ପ୍ରଧାନ ମନ୍ତ୍ରୀ ରୂପେ ଆଜି ରାମ ମନ୍ଦିରର ଭୁମି ପୂଜନ କରିଛନ୍ତି ।
୧୯୯୨ରେ ପ୍ରଥମ ଥର ନରେନ୍ଦ୍ର ମୋଦି ଅଯୋଧ୍ୟାକୁ ଆସିଥିଲେ । ତା’ ପରେ ୨୦୧୯ ଲୋକ ସଭା ନିର୍ବାଚନରେ ପ୍ରଧାନ ମନ୍ତ୍ରୀ ଭାବରେ ଅଯୋଧ୍ୟା ଜିଲ୍ଲାର ଏକ ସାଧାରଣ ସଭା ସମ୍ବୋଧିତ କରିବାକୁ ସେ ଆସିଥିଲେ, କିନ୍ତୁ ରାମଲାଲାଙ୍କ ଦର୍ଶନ କରି ନ ଥିଲେ ।
୨୯ ବର୍ଷ ପରେ ଅଯୋଧ୍ୟା ଆସିବା ପାଇଁ ମୋଦି ପାରମ୍ପାରିକ ପୋଷାକ ଚୟନ କରିଥିଲେ । ସାଧାରଣତଃ ଚୁଡ଼ିଦାର ପାଇଜାମା ଓ କୁର୍ତ୍ତା ପିନ୍ଧୁଥିବା ପ୍ରଧାନ ମନ୍ତ୍ରୀ ଧୋତି ଓ କୁର୍ତ୍ତା ପିନ୍ଧି ଅଯୋଧ୍ୟାରେ ପହଞ୍ଚିଥିଲେ ।
ଭୂମି ପୂଜନ କରିବା ପରେ ପ୍ରଧାନ ମନ୍ତ୍ରୀ ମୋଦି ଶୁଭ ମୁହୂର୍ତ୍ତରେ ରାମ ମନ୍ଦିରର ଶିଳାନ୍ୟାସ କରିଥିଲେ । ଏହି ଅବସରରେ ଆରଏସଏସ ମୁଖ୍ୟ ମୋହନ ଭଗବତ (RSS chief Mohan Bhagwat) ଓ ଉତ୍ତର ପ୍ରଦେଶ ମୁଖ୍ୟ ମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସମେତ କେତେକ ବିଶେଷ ବ୍ୟକ୍ତି ସେଠାରେ ଉପସ୍ଥିତ ଥିଲେ।
ଅଯୋଧ୍ୟାକୁ ୪୦୦ କ୍ୱିଣ୍ଟାଲ ଫୁଲରେ ସଜାଯାଇଥିଲା । ଥାଇଲ୍ୟାଣ୍ଡରୁ ଅର୍କିଡ଼ ଓ ବେଙ୍ଗାଲୁରୁରୁ ଅପାରାଜିତା ଫୁଲ ଅଣାଯାଇଥିଲା । କମଳା ଓ ନାଲି ରଙ୍ଗର ଗେଣ୍ଡୁଫୁଲ କୋଲକାତାରୁ ଆସିଥିଲା ।
ଭୂମି ପୂଜନର ସାଢ଼େ ତିନି ବର୍ଷ ଭିତରେ ମନ୍ଦିର ନିର୍ମାଣ ପୂରା ହେବ ବୋଲି ରାମ ମନ୍ଦିର ନିର୍ମାଣ ଟ୍ରଷ୍ଟ ଲକ୍ଷ୍ୟ ରଖିଛି । ପ୍ରଥମ ଦେଢ଼ ବର୍ଷ ମଧ୍ୟରେ ମନ୍ଦିରର ଭୂତଳ ମହଲାରେ ନିର୍ମାଣ କାର୍ଯ୍ୟ ଶେଷ କରିବାକୁ ନିଷ୍ପତ୍ତି ନିଆଯାଇଛି । ଏହା ପରେ ପରବର୍ତ୍ତୀ ଦୁଇ ବର୍ଷ ମଧ୍ୟରେ ଉପର ଦୁଇଟି ମହଲାର ନିର୍ମାଣ କାର୍ଯ୍ୟ ସମାପ୍ତ କରିବାର ଲକ୍ଷ୍ୟ ରଖାଯାଇଛି ।
