ଯେଉଁ ସ୍ଥାନରେ ଡାକ୍ତରାଣୀକୁ ଗ୍ୟାଙ୍ଗ୍ ରେପ୍ କରି ଜାଳି ମାରିଥିଲେ, ସେଇଠି ହିଁ ସେମାନଙ୍କର ମୃତ୍ୟୁ ହେଲା PHOTOS

ପୋଲିସ ଅପରାଧ ସ୍ଥଳରେ ଘଟଣାକୁ ରିକ୍ରିଏଟ୍ କରି ଅନୁସନ୍ଧାନ କରିବା ପାଇଁ ଚାରିଜଣଯାକ ଅଭିଯୁକ୍ତଙ୍କୁ ଗୁରୁବାର ମଧ୍ୟ ରାତ୍ରିରେ ସେହି ସ୍ଥାନକୁ ନେଇ ଯାଇଥିଲା । ଏହି ସମୟରେ ଚାରିଜଣଯାକ ଖସି ପଳେଇବାକୁ ଚେଷ୍ଟା କରିବାରୁ ପୋଲିସ ଉପାୟହୀନ ହୋଇ ଗୁଳି ଚଳେଇ ଥିଲା ।

ଏହି ଏନ୍କାଉଣ୍ଟର୍ ବେଙ୍ଗାଲୁରୁ-ହାଇଦ୍ରାବାଦ ଜାତୀୟ ରାଜପଥ ୪୪ରେ ଭୋର୍ ସାଢ଼େ ତିନିଟା ପାଖାପାଖି ଘଟିଥିଲା । ପ୍ରାଣୀ ଡାକ୍ତରାଣୀଙ୍କ ଜଳିଯାଇଥିବା ମୃତ ଦେହ ବି ଏଇ ହାଇୱେରେ ଗୋଟେ ଅଣ୍ଡରପାସ୍ ପାଖରେ ମିଳିଥିଲା । ନଭେମ୍ବର ୨୭-୨୮ ରାତିରେ ଡାକ୍ତରାଣୀଙ୍କୁ ଏଇ ଚାରିଜଣ ଯୁବକ ଗଣଦୁଷ୍କର୍ମ କରିବା ପରେ ନିଆଁରେ ଜଳେଇ ହତ୍ୟା କରିଥିଲେ ।

ଏହି ଏନ୍କାଉଣ୍ଟର୍କୁ ନେଇ ହାଇଦ୍ରାବାଦ ପୋଲିସର ଭୁରିଭୁରି ପ୍ରଶଂସା ହେଉଛି । ଲୋକେ ଏନ୍କାଉଣ୍ଟର୍ ସ୍ଥଳ ପହଞ୍ଚି ପୋଲିସ ଉପରେ ଫୁଲ ଫିଙ୍ଗୁଥିବାର ଦେଖିବାକୁ ମିଳିଛି ।

ଶମଶାବାଦର ଡିସିପି ପ୍ରକାଶ ରେଡ୍ଡୀ କହିଛନ୍ତି ଯେ ସାଇବରାବାଦ ପୋଲିସ ଚାରିଜଣଯାକ ଅଭିଯୁକ୍ତଙ୍କୁ ଗୁରୁବାର ମଧ୍ୟ ରାତ୍ରିରେ ଅପରାଧ ସ୍ଥଳରେ ଘଟଣାକୁ ରିକ୍ରିଏଟ୍ କରି ଅନୁସନ୍ଧାନ କରିବା ପାଇଁ ସେହି ସ୍ଥାନକୁ ନେଇ ଯାଇଥିଲା ।

ଏନ୍କାଉଣ୍ଟର୍ରେ ଚାରିଜଣଯାକ ଅଭିଯୁକ୍ତଙ୍କ ମୃତ୍ୟୁ ହୋଇଛି ବୋଲି ଜାଣି ପ୍ରାଣୀ ଡାକ୍ତରାଣୀଙ୍କ ପରିବାର ଭାରି ଖୁସି । ମୃତ ଡାକ୍ତରାଣୀଙ୍କ ବାପା କହିଛନ୍ତି ଯେ ଆଜି ତାଙ୍କ ଝିଅର ଆତ୍ମାକୁ ଶାନ୍ତି ମିଳିଥିବ । ଧର୍ଷଣର ଶିକାର ଅନ୍ୟ ଝିଅମାନଙ୍କ ମାମଲାରେ ଅଭିଯୁକ୍ତମାନଙ୍କୁ ଠିକ୍ ଏମିତି ସଜା ମିଳିବା ଉଚ଼ିତ ବୋଲି ସେ କହିଛନ୍ତି ।

ହାଇଦ୍ରାବାଦ ରେଳ ଷ୍ଟେଶନରୁ ୨୪ କି.ମି. ଦୂର ଶମ୍ଶାବାଦ୍ ଟୋଲ୍ ପ୍ଲାଜା ଅଛି, ଯେଉଁଠି ଡାକ୍ତରାଣୀଜଣକ ନିଜ ସ୍କୁଟି ଅଟକେଇଥିଲା । ପାଖରେ ଥିବା ଗୋଟେ ଖାଲି ପଡ଼ିଆରେ ତା’ ସହ ଗଣଦୁଷ୍କର୍ମ କରାଯାଇଥିଲା । ଘଟଣାସ୍ଥଳ ପାଖରେ ଅଛି ରାଜୀବ ଗାନ୍ଧୀ ଆନ୍ତର୍ଜାତୀୟ ଏୟାର୍ପୋର୍ଟ ।

ହାଇଦ୍ରାବାଦରେ ଡାକ୍ତରାଣୀଙ୍କ ସହ ଗଣଦୁଷ୍କର୍ମ କରି ତାଙ୍କୁ ହତ୍ୟା କରିଥିବା ଚାରିଜଣଯାକ ଅଭିଯୁକ୍ତଙ୍କର ପୋଲିସ ଏନକାଉଣ୍ଟରରେ ମୃତ୍ୟୁ ହେବା ଘଟଣା ଉପରେ ଭିନ୍ନଭିନ୍ନ ମତ ସାମନାକୁ ଆସୁଛି । ସମାଜର ଗୋଟେ ବଡ଼ ବର୍ଗ ହାଇଦ୍ରାବାଦ ପୋଲିସକୁ ପ୍ରଶଂସା କରୁଥିବା ବେଳେ ବେଶ୍ କିଛି ଲୋକ ଏଇ ଏନକାଉଁଟର ଉପରେ ପ୍ରଶ୍ନ ଚିହ୍ନ ବି ଉଠାଉଛନ୍ତି ।