ସମ୍ବଲପୁରରେ ଏକ ମାସ ୭ ଦିନର ଶିଶୁକୁ ୧୫,୦୦୦ ଟଙ୍କାରେ ବିକିଲା ତା’ ମାଆ; ତଦନ୍ତ ଜାରି

ସମ୍ବଲପୁର ଜିଲ୍ଲାର ଚାରମାଲ ଥାନା ଅଞ୍ଚଳରେ ଏକ ମାସ ସାତ ଦିନର ଗୋଟିଏ ଶିଶୁ କନ୍ୟାକୁ ତା’ ମା’ ବିକ୍ରି କରିଦେଇଥିବା ଅଭିଯୋଗ ହୋଇଛି ।

କଅଁଳା ଶିଶୁ କନ୍ୟାକୁ ବିକି ପ୍ରତିବଦଳରେ ତା’ର ୨୮ ବର୍ଷୀୟା ମା’ ନଳିନୀ କର୍ଣ୍ଣ ୧୫ ହଜାର ଟଙ୍କା ନେଇଥିବା ଅଭିଯୋଗ ହୋଇଛି ।

ଶିଶୁଟିର ମା’ କେଉଁଟିବାହାଲ ଗାଁର ବାସିନ୍ଦା । ସେ ରେଢ଼ାଖୋଲ ଥାନା ଅନ୍ତର୍ଗତ ତ୍ରିବଣପୁର ପଞ୍ଚାୟତର କୁସାପାଲି ଗାଁର ଲଳିତ ପ୍ରଧାନଙ୍କୁ ଶିଶୁଟିକୁ ବିକ୍ରି କରିଥିବା ଅଭିଯୋଗ ହୋଇଛି ।

ଏହି ବେଆଇନ୍ ଓ ଅନୈତିକ କାର୍ଯ୍ୟ ବିଷୟରେ ଜାଣିବା ପରେ ରେଢ଼ାଖୋଲ ଚାଇଲ୍ଡଲାଇନର ଟିମ୍ ଲିଡର୍ ସଞ୍ଜୟ ସାଗର ଥାନାରେ ଏ ନେଇ ଏକ ମାମଲା ରୁଜୁ କରାଇଛନ୍ତି ।

ଶିଶୁ ବିକ୍ରି କରିଥିବା ମହିଳା ଲଳିତା କର୍ଣ୍ଣଙ୍କର ପୂର୍ବରୁ ପାଞ୍ଚଟି ସନ୍ତାନ ଅଛନ୍ତି । ବିକ୍ରି ହୋଇଥିବା ଏହି ଶିଶୁ କନ୍ୟାଟି ତାଙ୍କର ଷଷ୍ଠ ସନ୍ତାନ ବୋଲି ଜଣାପଡ଼ିଛି ।

ଶିଶୁ କନ୍ୟାକୁ ଅକ୍ଟୋବର ୧ ତାରିଖରେ ବିକ୍ରି କରାଯାଇଥିବା କୁହାଯାଉଛି । ପୋଲିସ ଶିଶୁକୁ ଉଦ୍ଧାର କରି ତା’ ନିଜ ମା’କୁ ଫେରାଇ ଦେଇଛି ଓ ଏହି ମାମଲାର ତଦନ୍ତ ଆରମ୍ଭ କରିଛି ।

ଶିଶୁର ମା’ ଲଳିତା କର୍ଣ୍ଣ କେଉଁ କାରଣରୁ ଶିଶୁକୁ ବିକ୍ରି କରିଥିଲା ତାହା ସ୍ପଷ୍ଟ ହୋଇ ନ ଥିଲେ ବି ଅଭାବ ଅନଟନ ଯୋଗୁଁ ସେ ଏପରି କରିଥିବା କୁହାଯାଉଛି ।