ଟ୍ରେଣ୍ଡିଙ୍ଗ
ଓଡ଼ିଆ IAS ଅଫିସର୍ ଗିରୀଶ ଚନ୍ଦ୍ର ମୁର୍ମୁ ଦେଶର CAG ନିଯୁକ୍ତ ହେଲେ; ୟା ଆଗରୁ J&Kର ଉପରାଜ୍ୟପାଳ ଥିଲେ
ଜମ୍ମୁ-କଶ୍ମୀରର (Jammu & Kashmir) ପ୍ରଥମ ଲେଫ୍ଟନାଣ୍ଟ ଗଭର୍ଣ୍ଣର ଗିରିଶ ଚନ୍ଦ୍ର ମୁର୍ମୁଙ୍କୁ (Girish Chandra Murmu) ଭାରତର CAG (ମହାଲେଖା ନିୟନ୍ତ୍ରକ ଓ ମହା ସମୀକ୍ଷକ) ରୂପେ ନିଯୁକ୍ତି ଦିଆଯାଇଛି । ମୁର୍ମୁ ଓଡ଼ିଶାର ମୟୂରଭଞ୍ଜର ମୂଳ ବାସିନ୍ଦା ଓ PM ମୋଦିଙ୍କ ବିଶ୍ୱସ୍ତ IAS ଅଫିସର୍ମାନଙ୍କ ମଧ୍ୟରୁ ଜଣେ ।
ଅକ୍ଟୋବର ୨୦୧୯ରେ ଜମ୍ମୁ-କଶ୍ମୀର୍ ଏକ କେନ୍ଦ୍ର ଶାସିତ ଅଞ୍ଚଳ (ୟୁନିଅନ ଟେରିଟୋରୀ, Union Territory) ହେବା ପରେ ଗିରିଷ ଚନ୍ଦ୍ର ମୁର୍ମୁ (Girish Chandra Murmu) ସେଠାକାର ପ୍ରଥମ ଲେଫ୍ଟନାଣ୍ଟ ଗଭର୍ଣ୍ଣର (LG) ଭାବରେ ନିଯୁକ୍ତ ହୋଇଥିଲେ ।
ତାଙ୍କୁ ଜାମ୍ମୁ ଓ କାଶ୍ମୀର କେନ୍ଦ୍ରଶାସିତ ଅଞ୍ଚଳର ଉପରାଜ୍ୟପାଳ ଭାବେ ଶପଥ ପାଠ କରାଇଥିଲେ ଜାମ୍ମୁ ଓ କାଶ୍ମୀର ହାଇ କୋର୍ଟର ମୁଖ୍ୟ ବିଚାରପତି ଜଷ୍ଟିସ ଗୀତା ମିତ୍ତଲ ।
ଗୁଜୁରାଟ (Gujarat) କ୍ୟାଡରର ଆଇଏଏସ୍ ଅଧିକାରୀ ମୁର୍ମୁଙ୍କର ଆଇନ ଓ ବ୍ୟବସ୍ଥାର ଦୀର୍ଘ ଅଭିଜ୍ଞତା ରହିଛି । ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦୀ (Narendra Modi) ଗୁଜୁରାଟର ମୁଖ୍ୟ ମନ୍ତ୍ରୀ ଥିବା ସମୟରେ ମୁର୍ମୁ ସେଠାକାର ଗୃହ ବିଭାଗର ସଚିବ ଥିଲେ ଓ ପରେ ମୁଖ୍ୟ ମନ୍ତ୍ରୀଙ୍କ ଅଫିସରେ (CMO) ମୋଦୀଙ୍କ ସଚିବ ଥିଲେ ।
ମୟୂରଭଞ୍ଜ ଜିଲ୍ଲାର ମୂଳ ବାସିନ୍ଦା ମୁର୍ମୁ ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦିଙ୍କର ଅତି ଘନିଷ୍ଠ ଓ ବିଶ୍ୱସ୍ତ ଅଫିସର ଭାବେ ଜଣାଶୁଣା । ଜିଲ୍ଲାରେ ଝାଡଖଣ୍ଡର ରାଜ୍ୟପାଳ ଦୌପଦୀ ମୁର୍ମୁଙ୍କ (Jharkhand Governor Droupadi Murmu) ପରେ ଗିରିଶ ମୁର୍ମୁ ଜିଲ୍ଲା ପାଇଁ ଜାତୀୟ ଗୌରବ ଆଣିଛନ୍ତି I
ମୁର୍ମୁ ଜଣେ ୧୯୮୫ ବ୍ୟାଚ୍ IAS ଅଧିକାରୀ । ତାଙ୍କ ଜନ୍ମ ୨୧ ନଭେମ୍ବର ୧୯୫୯ରେ ହୋଇଥିଲା । ସେ ରାଜନୀତି ବିଜ୍ଞାନରେ ସ୍ନାତକ ଓ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି । ସେ ବ୍ରିଟେନର ବର୍ମିଂହାମ ୟୁନିଭରସିଟିରୁ ଏମବିଏ ଡିଗ୍ରୀ ବି ହାସଲ କରିଛନ୍ତି ।
ମୁର୍ମୁଙ୍କ ମାଆ ପାର୍ବତୀ ଦେବୀ ଜଣେ ଅବରସରପ୍ରାପ୍ତ ପୋଷ୍ଟ୍ ମାଷ୍ଟର । ମୁର୍ମୁ ଜାମ୍ମୁ-କଶ୍ମୀରର LG ହେବା ପରେ ନିଜ ପୁଅ ଏତେ ବଡ଼ ପଦରେ ନିଯୁକ୍ତି ପାଇଛି ଜାଣି ସେ ବହୁତ ଖୁସି ହୋଇଥିଲେ । ‘‘ଗୋଟେ ଆଦିବାସୀ ପିଲା ଏତେ ବଡ଼ ସୁଯୋଗ ପାଇଲା ଏଇଟା ବହୁତ ବଡ଼ ଖୁସିର କଥା,’’ ସେ କହିଥିଲେ । ମୁର୍ମୁମାନେ ସାନ୍ତାଳ ଜନଜାତିର ଲୋକ ।
ପାର୍ବତୀ ଓ ତାଙ୍କ ସ୍ୱର୍ଗତ ପତି ଭାଗବତ ମୁର୍ମୁଙ୍କ ଛଅ ପୁଅ ଓ ଦୁଇ ଝିଅଙ୍କ ଭିତରେ ଗିରିଶ ସବୁ ଠୁ ବଡ଼ । ଭାଗଭତ ମୁର୍ମୁ ରେଳ ଷ୍ଟେସନ୍ ମ୍ୟାନେଜର୍ ଭାବେ କାର୍ଯ୍ୟ କରି ଅବସର ନେଇଥିଲେ । ୨୦୧୭ ରେ ତାଙ୍କର ଦେହାନ୍ତ ହୋଇଥିଲା ।
ମୁର୍ମୁ ଅଗଷ୍ଟ ୫ରେ ନିଜ ଇସ୍ତଫା ରାଷ୍ଟ୍ରପତି ରାମ ନାଥ କୋଭିନ୍ଦଙ୍କ ପାଖକୁ ପଠେଇଥିଲେ । ବିଦାୟୀ ସିଏଜି (CAG) ରାଜୀବ ମେହେର୍ଷିଙ୍କ ସ୍ଥାନରେ ମୁର୍ମୁଙ୍କୁ ନିଯୁକ୍ତି ଦିଆଯାଇଛି ।
ଅଗଷ୍ଟ ୫ରେ କାଶ୍ମୀରରୁ ଧାରା ୩୭୦ ହଟାଇବାକୁ ଭାରତ ସରକାରଙ୍କ ନିଷ୍ପତ୍ତିର ଏକ ବର୍ଷ ପୂରଣ ହୋଇଛି । ଅଗଷ୍ଟ ୫, ୨୦୧୯ରେ କେନ୍ଦ୍ରର ନରେନ୍ଦ୍ର ମୋଦୀ ସରକାର କାଶ୍ମୀରରୁ ଧାରା ୩୭୦ର ଅଧିକାଂଶ ବ୍ୟବସ୍ଥା ପ୍ରତ୍ୟାହାର କରି ଏହାର ସ୍ୱତନ୍ତ୍ର ରାଜ୍ୟ ମାନ୍ୟତା ପ୍ରତ୍ୟାହାର କରିଥିଲେ ଓ ରାଜ୍ୟକୁ ଦୁଇଟି ୟୁନିଅନ ଟେରିଟୋରୀରେ – ଜାମ୍ମୁ କାଶ୍ମୀର (Jammu Kashmir) ଏବଂ ଲଦ୍ଦାଖ (Ladakh) – ବିଭକ୍ତ କରିଥିଲେ । ଏହା ପରେ ମୁର୍ମୁ ୟୁନିଅନ ଟେରିଟୋରୀର ପ୍ରଥମ ଏଲ୍.ଜି. ଭାବରେ ନିଯୁକ୍ତ ହୋଇଥିଲେ ।
