ଗଞ୍ଜାମରେ ମଦ୍ୟପ ପୁଅ ହାତୁଡ଼ିରେ ପିଟି ପିଟି ନିଜ ମା’କୁ ହତ୍ୟା କଲା; ଗିରଫ ହେଲା

ମଦ୍ୟପ ପୁଅ ହାତରେ ଯାଇଛି ଜନ୍ମକଲା ମା’ର ଜୀବନ । ଏହି ଜଘନ୍ୟ ହତ୍ୟାକାଣ୍ଡ ଘଟିଛି ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ତଥା ବାଲିଛାଇ ଫାଣ୍ଡି ଅନ୍ତର୍ଗତ ବଣପଲ୍ଲୀ ଗାଁରେ । ମଦ୍ୟପ ପୁଅ ସନ୍ନ୍ୟାସୀ ପୋଲାଇ ନିଶାଶକ୍ତ ଅବସ୍ଥାରେ ମଙ୍ଗଳବାର ରାତିରେ ନିଜ ମା’ ସରସ୍ଵତୀ ପୋଲଇଙ୍କୁ ହତ୍ୟା କରିଛି । (ଫଟୋରେ ସନ୍ନ୍ୟାସୀ ପୋଲାଇ )

ମଙ୍ଗଳବାର ରାତିରେ ସନ୍ନ୍ୟାସୀ ପୋଲାଇ ନିଶାଶକ୍ତ ଅବସ୍ଥାରେ କୌଣସି କାରଣରୁ ନିଜ ମା’ଙ୍କ ସହ ପାଟିତୁଣ୍ଡ କରିଥିଲା । ପାଟିତୁଣ୍ଡ ଉଗ୍ର ରୂପ ଧାରଣ କରିବା ପରେ ସେ ଏକ ହାତୁଡିରେ ନିଜ ମା’ ସରସ୍ଵତୀଙ୍କୁ ପିଟିପିଟି ହତ୍ୟା କରିଥିଲା । ହତ୍ୟା ପରେ ନିଜ ସ୍ତ୍ରୀକୁ ଫୋନ ମାଧ୍ୟମରେ ଜଣାଇ ଦେଇ ସନ୍ନ୍ୟାସୀ ଫେରାର ହୋଇଯାଇଥିଲା ।

ବୁଧବାର ସକାଳେ ଘଟଣା ପ୍ରଘଟ ହେବା ପରେ କବିସୂର୍ଯ୍ୟନଗର ଓ ବାଲିଛାଇ ପୋଲିସ ପହଞ୍ଚି ମୃତା ସରସ୍ଵତୀଙ୍କ ଶବକୁ ଜବତ କରିବା ସହ ଏକ ହତ୍ୟା ମାମଲା ରୁଜୁ କରି ହତ୍ୟାକାରୀ ପୁଅକୁ ଧରିବା ପାଇଁ ବିଭିନ୍ନ ସ୍ଥାନରେ ଚଢାଉ ଆରମ୍ଭ କରିଥିଲା ।

ହତ୍ୟାକାରୀ ପୁଅ ସନ୍ନ୍ୟାସୀ କବିସୂର୍ଯ୍ୟନଗର ସହର ମର୍ଦ୍ଧରାଜ ହାଇସ୍କୁଲ ସାମ୍ନାରେ ପ୍ରଚୁର ମଦ୍ୟପାନ କରି ଶୋଇଥିଲା ।

ଗଣମାଧ୍ୟମ ପ୍ରତିନିଧିମାନେ ସନ୍ନ୍ୟାସୀକୁ କାହିଁକି ମା’କୁ ହତ୍ୟା କଲା ବୋଲି ପଚାରିବାରୁ ସେ ବେପରୁଆ ଭାବରେ ଉତ୍ତର ଦେଇଥିଲା । ହାତ ହଲେଇ ସେମାନଙ୍କୁ ସେଠାରୁ ଚାଲିଯିବାକୁ କହିଥିଲା ।

ଏହି ସମୟରେ ପୋଲିସ ପହଞ୍ଚି ଅଭିଯୁକ୍ତ ସନ୍ନ୍ୟାସୀକୁ ଗିରଫ କରି ନିଜ ହେପାଜତକୁ ନେଇଥିଲା ।

ଅଭିଯୁକ୍ତ ସନ୍ନ୍ୟାସୀର ସ୍ତ୍ରୀ ଲକ୍ଷ୍ମୀ ପୋଲେଇ କହିଛନ୍ତି: ‘‘ମୁଁ ବାପଘରେ ଥିବା ବେଳେ ସେ (ସନ୍ନ୍ୟାସୀ) ମୋତେ ରାତିରେ ଫୋନ୍ କରି କହିଲା ଯେ ସେ ମା’କୁ ହାତୁଡ଼ିରେ ବାଡ଼େଇଛି । ମୁଁ ସକାଳେ ଆସି ପହଞ୍ଚି ଦେଖିଲି ଯେ ମା’ଙ୍କ ଦେହରେ ଜୀବନ ନାହିଁ । ସେ (ସନ୍ନ୍ୟାସୀ) ମୋଟେ ଭଲ ଲୋକ ନୁହେଁ । ସବୁ ବେଳେ ମଦ ପିଇ ଏମିତି ଝଗଡ଼ା କରେ । ତାକୁ କଠୋର ଦଣ୍ଡ ମିଳିବା ଉଚିତ ।’’

କବିସୂର୍ଯ୍ୟନଗର ପୋଲିସ ଏକ ହତ୍ୟା ମାମଲା (କେସ୍ ନମ୍ବର ୨୦/୨୧) ରୁଜୁ କରି ତଦନ୍ତ ଚଳାଇଛି ବୋଲି କହିଛନ୍ତି ଥାନା ଅଧିକାରୀ ପ୍ରଭାତ କୁମାର ସାହୁ ।

ଏହି ହତ୍ୟା ଘଟଣା ସାରା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି । ଲୋକେ ବିଶ୍ୱାସ କରିପାରୁ ନାହାନ୍ତି ଯେ ପୁଅ ହିଁ ନିଜ ହାତରେ ମା’ର ଜୀବନ ନେଇଛି ବୋଲି ।

ଅଭିଯୁକ୍ତ ସନ୍ନ୍ୟାସୀର ଘର । ଏହି ଘରେ ସେ ନିଜ ମା’କୁ ହାତୁଡ଼ିରେ ପିଟି ପିଟି ଜୀବନରୁ ମାରିଦେଇଥିଲା ।

ନିଶାସକ୍ତ ଅବସ୍ଥାରେ ପଡ଼ି ସନ୍ନ୍ୟାସୀ ଲୋକଙ୍କୁ ଏମିତି ଧମକ ଚମକ ଦେଉଥିଲା ।

ସନ୍ନ୍ୟାସୀର କଥାରୁ ଲାଗୁ ନ ଥିଲା ଯେ ସେ ନିଜ ମା’କୁ ହତ୍ୟା କରିଥିବାରୁ ତିଳେ ମାତ୍ର ଅନୁତପ୍ତ । ସେ ରାତି ସାରା ନିଶାସକ୍ତ ଅବସ୍ଥାରେ ଥିଲା ଓ ନିଜ କର୍ମର ଗୁରୁତ୍ୱ ହେଜି ପାରି ନ ଥିବା ପରି ଲାଗୁଥିଲା ।