ବରଗଡ଼ରେ ସ୍ତ୍ରୀର କୋହ: ‘‘ପୋଲିସ ମୋ’ର୍ ବରକେ ମାରିଛନ୍… ମୋ’ର ନ୍ୟାୟ ଦରକାର, ଟଙ୍କା ନୁହେଁ’’

‘‘ମୋ’ର ବରକେ ନ୍ୟାୟ ଦରକାର… ପଇସା ନାଇଁ… ସରକାରୀ ଦାମ୍ ନାଇଁ…’’ କାନ୍ଦି କାନ୍ଦି କହୁଥିଲେ ଏହି ମହିଳା ।

ବରଗଡ଼ରେ ପୋଲିସ ହେଫାଜେତରେ ଥିବା ଜଣେ ଯୁବକଙ୍କ ସନ୍ଦେହଜନକ ସ୍ଥିତିରେ ମୃତ୍ୟୁ ହେବା ପରେ ସ୍ଥାନୀୟ ଲୋକେ ଉଗ୍ର ପ୍ରଦର୍ଶନ କରିଥିଲେ । ସେମାନେ ଅଭିଯୋଗ କରିଥିଲେ ଯେ ପୋଲିସ ଗୋବିନ୍ଦ କୁମ୍ଭାର ନାମକ ଯୁବକଙ୍କୁ ଥାନାରେ ପିଟି ପିଟି ହତ୍ୟା କରିଛି ।

ବରଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଥିବା ବେଳେ ଶୁକ୍ରବାର ରାତିରେ (ସେପ୍ଟେମ୍ବର ୨୪) ତୋରା ଗାଁର ଗୋବିନ୍ଦ କୁମ୍ଭାରଙ୍କ ମୃତ୍ୟୁ ହୋଇଥିଲା । ପୋଲିସ ତାକୁ ଥାନାରେ ନିର୍ଯାତନା ଦେଇ ମାରି ଦେଇଥିବା ପରିବାର ଲୋକେ ଅଭିଯୋଗ କରିଛନ୍ତି ।

ଅଭିଯୁକ୍ତ ପୋଲିସ ଏ.ଏସ୍.ଆଇ. ଓ ଅନ୍ୟ ଦୋଷୀ କର୍ମଚାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବିରେ ବରଗଡ଼ ସହରର ଗାନ୍ଧୀ ଛକରେ ଯୁବକଙ୍କ ଶବ ରଖି ଶହ ଶହ ଲୋକେ ରାସ୍ତା ଅବରୋଧ କରିଥିଲେ ।

ପୋଲିସ ଗୋବିନ୍ଦ କୁମ୍ଭାରଙ୍କ ଶବକୁ ସେଠାରୁ ବଳ ପୂର୍ବକ ଉଠେଇ ନେଇଥିଲା ।

ପୋଲିସ ଶବକୁ ଏକ ଜିପରେ ନେଇ ଯାଉଥିବା ବେଳେ ରାସ୍ତାରେ ଉତ୍ୟକ୍ତ ଲୋକଙ୍କ ବିରୋଧର ସାମନା କରିଥିଲା ଓ ପ୍ରତିକ୍ରିୟାରେ ଲାଠି ଚାର୍ଜ କରିଥିଲା । ଲୋକେ ପ୍ରାଣ ବିକଳରେ ଆନ୍ଦୋଳନ ସ୍ଥଳରୁ ଛତ୍ରଭଙ୍ଗ ଦେଇଥିଲେ ।

ଶୁକ୍ରବାର (ସେପ୍ଟେମ୍ବର ୨୪) ରାତିରେ ବରଗଡ଼ ଟାଉନ ଥାନା ପୋଲିସ ଏକ ମାମଲାରେ ଗୋବିନ୍ଦ କୁମ୍ଭାରଙ୍କୁ ଥାନାକୁ ଆଣିଥିଲା । ସେ ରାତିରେ ଅସୁସ୍ଥ ହେବାରୁ ପ୍ରଥମେ ସଦର ହସ୍ପିଟାଲ୍‌ ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଥିଲା । ସେଠାରେ ତାଙ୍କର ମୃତ୍ୟୁ ହୋଇଥିଲା ।

ପରିବାର ଲୋକଙ୍କ ଅଭିଯୋଗକୁ ଖଣ୍ଡନ କରି ପୋଲିସ କହିଛି ଯେ ଗୋବିନ୍ଦ କୁମ୍ଭାରଙ୍କ ଶରୀରରେ କୌଣସି କ୍ଷତ ଚିହ୍ନ ନାହିଁ । ରାତିରେ ଛାତିରେ ଯନ୍ତ୍ରଣା ଅନୁଭବ ହେବାରୁ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟ ନିଆଯାଇଥିଲା ଓ ସେଠାରେ ତାଙ୍କ ମୃତ୍ୟୁ ହୋଇଛି ବୋଲି ପୋଲିସ ପକ୍ଷରୁ କୁହାଯାଇଛି ।

ମୃତ ଯୁବକଙ୍କ ସ୍ତ୍ରୀ କାନ୍ଦି କାନ୍ଦି କହିଛନ୍ତି ଯେ ତାଙ୍କ ସ୍ୱାମୀଙ୍କୁ ପୋଲିସ ପିଟି ପିଟି ମାରିଦେଇଛି ।

‘‘ପୋଲିସୱାଲେ ମାରିଛନ୍… ପୋଲିସବାଲେ ଘରକେ ଆସିକରି କଲର୍ ପେହଲେ ଖିଞ୍ଚିଲେ… ମୁଁ ଘରେ ଥିଲି । ମୋ’ର୍ ବରର କଲର୍ ଖିଞ୍ଚିଲେ । ଏଡ଼େ ବାଡ଼ି ଦି’ଟା ପୋଲିସ୍ ଧରିଥିଲେ । ତାକୁ ମାରିଲେ । ମାରିଲା ବେଳେ ମୋ’ ଶାସ୍ ଓ ମୋ’ ନଣନ୍ଦ ଛେକିଗଲେ, କହିଲେ ‘ଆଜ୍ଞା, ନା ମାରୁନ୍’ । ତା’ପରେ ସେମାନେ ତାକୁ ଥାନାକୁ ନେଇଗଲେ । ଆମେ ଡିମାଣ୍ଡ୍ କରୁଛୁ ଯେଉଁମାନେ ତାକୁ ମାରିଛନ୍ତି । ମୋ’ର ବରକେ ନ୍ୟାୟ ଦରକାର… ମୋତେ ପଇସା ଦରକାର୍ ନାଇଁ… ମୋତେ ସେ ସରକାରୀ ଚାକିରି ଦରକାର ନାଇଁ…’’ କହିଥିଲେ ହଠାତ୍ ବିଧବା ହୋଇଯାଇଥିବା ମହିଳା ।

ଏହି ସନ୍ଦେହଜନକ ମୃତ୍ୟୁର ବିଚାର ବିଭାଗୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି ପଶ୍ଚିମାଞ୍ଚଳ ଡିଆଇଜି ଜୟନାରାୟଣ ପଙ୍କଜ । ସେ କହିଛନ୍ତି ଯେ ପୋଲିସ ହେଫାଜତରେ ଗୋବିନ୍ଦ କୁମ୍ଭାରଙ୍କ ମୃତ୍ୟୁ କେଉଁ କାରଣରୁ ଘଟିଛି ତା’ର ନିରପେକ୍ଷ ତଦନ୍ତ ହେବ । ଜଣେ ଜୁଡ଼ିସିଆଲ ମାଜିଷ୍ଟ୍ରେଟ୍‌ ଓ ଏଚ୍‌.ଆର୍‌.ପି.ସି. ମିଳିତ ଭାବେ ତଦନ୍ତ କରିବେ । ତଦନ୍ତ ରିପୋର୍ଟ ମିଳିବା ପରେ ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଡିଆଇଜି କହିଛନ୍ତି ।

ମୃତକଙ୍କ ପରିବାରକୁ ଜିଲ୍ଲା ପ୍ରଶାସନ ପକ୍ଷରୁ ରେଡ୍‌ କ୍ରସ୍‌ ପାଣ୍ଠିରୁ ୩୦ ହଜାର ଟଙ୍କା ଓ ପୋଲିସ ବିଭାଗ ପକ୍ଷରୁ ୭୦ ହଜାର ଟଙ୍କା ପ୍ରଦାନ କରାଯିବ ବୋଲି ବରଗଡ଼ ଏ.ଡି.ଏମ୍‌. ମିର୍ଦ୍ଧା ଟପ୍ପୋ କହିଛନ୍ତି । ପୋଲିସ ହେଫାଜତରେ ଡ୍ୟୁଟି କରୁଥିବା ସବୁ କର୍ମଚାରୀ ଓ ଅଧିକାରୀଙ୍କୁ କାର୍ଯ୍ୟରୁ ନିଳମ୍ବିତ କରାଯିବ ବୋଲି ବରଗଡ଼ ଏସ୍‌.ପି. କହିଛନ୍ତି ।