ପଙ୍କୋଧାର ଏକାଦଶୀ: ପୁରୀ ଲୋକନାଥ ପୀଠରେ ଆରମ୍ଭ ହୋଇଛି ଜାଗର ଯାତ୍ରା

ଚଳିତ ବର୍ଷ ପୁରୀ ଲୋକନାଥ ପୀଠରେ ଅନୁଷ୍ଠିତ ହେଉଛି ଜାଗର ଯାତ୍ରା। ଲୋକନାଥ ପୀଠରେ ତିନି ଦିନ ଧରି ଅନୁଷ୍ଠିତ ହୋଇଥାଏ ଏହି ଜାଗର ପର୍ବ।

ଆଜି ପଙ୍କୋଧାର ଏକାଦଶୀଠାରୁ ଆରମ୍ଭ ହୋଇଛି ଜାଗର ଯାତ୍ରା । ଆଜି ସକାଳୁ ମାନସିକଧାରୀ ଭକ୍ତମାନେ ଲୋକନାଥଙ୍କ ଗମ୍ଭୀରାରୁ ପଙ୍କୋଧାର କରିଛନ୍ତି । ପ୍ରାୟ ଶତାଧିକ ପୁରୁଷ ଓ ମହିଳା ଭକ୍ତ ଏଥିରେ ସାମିଲ ହୋଇଥିଲେ । ଭୋର ୪ଟାରୁ ସକାଳ ୭ ଟା ଭିତରେ ଶେଷ ହୋଇଛି ପଙ୍କୋଧାର କାର୍ଯ୍ୟ ।

ଶ୍ରୀକ୍ଷେତ୍ରର ଭଣ୍ଡାର ରକ୍ଷକ ତଥା ଶ୍ରୀରାମଙ୍କ ସମୟରୁ ପୁରୀରେ ସ୍ଥାପିତ ହୋଇଛନ୍ତି ବାବା ଲୋକନାଥ । ଆଉ ବାବା ଲୋକନାଥଙ୍କ ପୀଠରେ ମହାଶିବରାତ୍ରୀ ବା ଜାଗର ଉପଲକ୍ଷେ ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ । ଶ୍ରୀଲୋକନାଥ ଦେବ ଟ୍ରଷ୍ଠ ବୋର୍ଡ ପକ୍ଷରୁ କରାଯାଇଛି ପ୍ରସ୍ତୁତି । ଭିତରକାଠ ନିକଟରେ ଦର୍ଶନର ବ୍ୟବସ୍ଥା ହୋଇଥିବା ବେଳେ ଗମ୍ଭୀରା ଦର୍ଶନ ବନ୍ଦ କରାଯାଇଛି ଓ ଜାଗର ଦିନ ରାତ୍ର ୪ଟାରେ ଉଠିବ ଲୋକନାଥଙ୍କ ମହାଦ୍ୱୀପ ।

ଆଜି ଭୋର ୪ ଟାରୁ ଆରମ୍ଭ ହୋଇଥିଲା ଦର୍ଶନ । ବ୍ୟାରିକେଡ ଦେଇ ଭକ୍ତମାନେ ମନ୍ଦିର ଭିତରକୁ ଦର୍ଶନ ପାଇଁ ଯାଉଛନ୍ତି। ଜାଗର ପଡିଆରେ ସ୍ୱତନ୍ତ୍ର ସୁରକ୍ଷା ବ୍ୟବସ୍ଥା, ଅଗ୍ନିଶମ ବ୍ୟବସ୍ଥା ସହ ଶୃଙ୍ଖଳିତ ଦର୍ଶନ ପାଇଁ ପୋଲିସ ପକ୍ଷରୁ ମଧ୍ୟ ଯୋଜନା କରାଯାଇଛି ।

ମହାଶିବରାତ୍ରୀ ଦିନ ରାତି ୧୨ଟା୩୦ରେ ଦ୍ଵାର ଫିଟିବା ପରେ ଭୋର ୧ଟାରୁ ୪ଟା ମଧ୍ୟରେ ମଙ୍ଗଳାଆରତୀ, ଅବକାଶ ସୂର୍ଯ୍ୟ ପୂଜା ପରେ ଦର୍ଶନ ଆରମ୍ଭ କରାଯିବ। ତାପରେ ମଙ୍ଗଳଆଳତୀ ଆଦି ବଢି ଭିତରେ ଗୋପାଳବଲ୍ଲଭ , ସକାଳ ଧୂପ ଓ ଦ୍ୱିପହର ଧୂପ ନୀତି କରାଯିବ ।

ସକାଳ ୪ଟାରୁ ରାତ୍ର ୧୦ଟା ସର୍ବସାଧାରଣ ଦର୍ଶନ ଓ ରାତ୍ର ୨ଟାରୁ ୩ଟା ହରିହର ଭେଟ ଓ ରାତ୍ର ୪ଟାରେ ମହାଦୀପ ଉଠିବା ପାଇଁ ବ୍ୟବସ୍ଥା ହୋଇଛି । ମହାଦୀପ ଉଠିବା ଯେଭଳି ବିଳମ୍ବ ନ ହୁଏ ସେଥିପ୍ରତି ସେବକମାନେ ଯତ୍ନବାନ ହେବା ପାଇଁ ନିର୍ଦ୍ଦେଶ ଦିଆଯାଇଛି ।

ନୀତି ଶୃଙ୍ଖଳିତ କରିବା ପାଇଁ ସେବାୟତମାନେ ସମ୍ପୂର୍ଣ୍ଣ ସହଯୋଗ କରିବେ ବୋଲି ପ୍ରତିଶୃତି ଦେଇଛନ୍ତି । ସୁରକ୍ଷା ବ୍ୟବସ୍ଥାକୁ ମଧ୍ୟ କଡାକଡି କରାଯାଇଛି । ୧୫ ପ୍ଲାଟୁନ ପୋଲିସ ଫୋର୍ସ ମୃତୟନ କରାଯାଇଛି।