ମାହାଙ୍ଗା ଡବଲ୍ ମର୍ଡ଼ର: ‘‘ତାଙ୍କ ଦି’ ପୁଅ ମୋତେ ନଙ୍ଗଳା କରି ମାଇଲେ ବୋଲି ମୁଁ ତାଙ୍କୁ ମାରିଦେଲି’’

କୋର୍ଟ ଚାଲାଣ ବେଳେ ପଞ୍ଚାନନ ସେଠୀ କହିଛି ଯେ ବିଜେପି ନେତା କୁଳମଣି ବରାଳ ଓ ତାଙ୍କ ସହଯୋଗୀ ଦିବ୍ୟସିଂହ ବରାଳଙ୍କୁ ସେ ହିଁ ହତ୍ୟା କରିଛି । ପୂର୍ବ ଶତ୍ରୁତାରୁ ସେ ପ୍ରତିଶୋଧ ନେଇଥିବା କହିଛି ।

‘‘ପାଗଳ ବରାଳଙ୍କ (କୁଳମଣି ବରାଳଙ୍କ) ଦି’ ପୁଅ ମୋତେ ନଙ୍ଗଳା କରି ଘର ଭିତରେ ମାଇଲେ ବୋଲି ମୁଁ ମାରିଦେଲି ତାକୁ,’’ ଗଣମାଧ୍ୟମ ସାମନାରେ କହିଛି ପଞ୍ଚାନନ । ଏହି କଥା ସେ ପୂର୍ବରୁ ତଦନ୍ତକାରୀ ପୋଲିସ ଦଳକୁ ବି କହିଥଲା । (ଫଟୋରେ ଘଟଣା ସ୍ଥଳରେ ତଦନ୍ତକାରୀ ପୋଲିସ୍‌ ଟିମ୍‌)

ପଞ୍ଚାନନ ସେଠୀକୁ କୁଳମଣି ଓ ତାଙ୍କ ଦୁଇ ପୁଅ ପ୍ରବଳ ମାଡ଼ ମାରିଥିବାରୁ ପ୍ରତିଶୋଧ ନେବା ପାଇଁ ସେ କୁଳମଣି ଓ ତାଙ୍କ ତାଙ୍କ ସହଯୋଗୀଙ୍କୁ ହତ୍ୟା କରିଥିବା ମାନିଛି ।

ମୁଖ୍ୟ ଅଭିଯୁକ୍ତ ପଞ୍ଚାନନ ସେଠୀ ଓ କୁଳମଣି ବରାଳଙ୍କ ମଧ୍ୟରେ ଦୀର୍ଘ ଦିନ ଧରି ବିବାଦ ଲାଗି ରହିଥିଲା । ସେହି କଥିତ ମାଡ଼ ମରା ଘଟଣା ପରେ କୁଳମଣିଙ୍କ ପୁଅ ରମାକାନ୍ତ ଘରୁ ବାହାରୁ ନ ଥିବା ବେଳେ କୁଳମଣିଳଙ୍କୁ ହତ୍ୟା ପାଇଁ ଯୋଜନା ପ୍ରସ୍ତୁତ କରିଥିଲା ପଞ୍ଚାନନ। (ଫଟୋରେ ଡବଲ୍ ମର୍ଡ଼ରରେ ବ୍ୟବହାର ହୋଇଥିବା ଖଣ୍ଡା)

ଗତ ୨ ତାରିଖ ରାତିରେ କୁଳମଣି ନିଜ ସହଯୋଗୀ ଦିବ୍ୟସିଂହଙ୍କ ସହ ଜଅଁକୋଟିରୁ ନିଜ ଘର ନୃତ୍ତାଙ୍ଗକୁ ଏକ ବାଇକରେ ଫେରୁଥିବା ସମୟରେ ସେମାନଙ୍କ ଉପରେ ଖଣ୍ଡାରେ ହୋଇଥିଲା ଆକ୍ରମଣ । କୁଳମଣି ବରାଳଙ୍କ ହତ୍ୟା ପଛରେ ରାଜନୈତିକ ଶତ୍ରୁତା ଥିବା ଅଭିଯୋଗ କରିଥିଲେ ତାଙ୍କ ସମର୍ଥକ ଓ ବିଜେପି ନେତାମାନେ । କଟକ ଜିଲ୍ଲା ବିଜେପି ସଭାପତି ତଥା ପୂର୍ବତନ ବିଧାୟକ ପ୍ରକାଶ ବେହେରା କହିଥିଲେ ଏହି ହତ୍ୟାକାଣ୍ଡ ପଛରେ ରାଜନୈତିକ ଶତୃତା ଥିଲା । (ଫଟୋରେ ହସପିଟାଲରେ କୁଳମଣି ବରାଳ ଓରଫ ପାଗଳ ବରାଳ)

ପଞ୍ଚାନନ ସେଠୀ ଓ ତା’ ସହଯୋଗୀମାନେ ଖଣ୍ଡାରେ କୁଳମଣି ଓ ଦିବ୍ୟସିଂହଙ୍କୁ ନିର୍ମମ ଭାବେ ହାଣି କର୍ତାକ୍ତ ଅବସ୍ଥାରେ ଛାଡ଼ି ଫେରାର ହୋଇଯାଇଥିଲେ । (ଫଟୋରେ ହସପିଟାଲରେ କୁଳମଣି ବରାଳ ଓରଫ ପାଗଳ ବରାଳଙ୍କ ସହଯୋଗୀ ଦିବ୍ୟସିଂହ ବରାଳ)

ଏହି ଡବଲ୍‌ ମର୍ଡ଼ର ପଛରେ ଆଇନ୍‌ ମନ୍ତ୍ରୀ ପ୍ରତାପ ଜେନାଙ୍କ ହାତ ଥିବା ଅଭିଯୋଗ କରିଥିଲେ ମୃତ କୁଳମଣି ବରାଳଙ୍କ ପୁଅ ଓ ବିଜେପି ନେତାମାନେ । (ଫଟୋରେ ଡାହାଣ ପଟେ ଆଇନ୍‌ ମନ୍ତ୍ରୀ ପ୍ରତାପ ଜେନା)

ହେଲେ ଏହି ସବୁ ଅଭିଯୋଗକୁ ଖଣ୍ଡନ କରିଥିଲେ ସ୍ଥାନୀୟ ବିଧାୟକ ତଥା ଆଇନ ମନ୍ତ୍ରୀ ପ୍ରତାପ ଜେନା (ଫଟୋରେ)। ଏହି ହତ୍ୟାକୁ ଘୋର୍ ନିନ୍ଦା କରି ସେ କହିଥିଲେ, ‘‘ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆବଶ୍ୟକ । ଦୋଷୀ କିପରି ଗିରଫ ହେବେ ମୁଁ ନିଜେ ସେଥି ପ୍ରତି ଦୃଷ୍ଟି ଦେବି । ବିଜେପି ବିରୋଧୀ ଦଳ ଭାବେ ଆମକୁ କହିବା ସ୍ବାଭାବିକ । ଜଗନ୍ନାଥଙ୍କ ରାଜ୍ୟରେ ହିଂସାର ସ୍ଥାନ ନାହିଁ ।’’