ଗଞ୍ଜାମରେ ମଧ୍ୟ ପ୍ରଦେଶ ବାସିନ୍ଦା ଗୁପଚୁପ୍ ବିକାଳିଙ୍କ ଉପରେ ଗୁଳି ମାଡ଼ ହେଲା; ଗୁରୁତର ଆହତ

ଗଞ୍ଜାମ ଜିଲ୍ଲାର ବୁଗୁଡ଼ା ଥାନା ବାଲିପଦର ଫାଣ୍ଡି ଇଲାକାରେ ଶନିବାର ରାତିରେ ଏକ ଗୁଳିମାଡ଼ ଘଟଣା ଘଟିଛି । ଏଥିରେ ଧ୍ୟାନେନ୍ଦ୍ର ସିଂ ନାମକ ଯୁବକ ଗୁରୁତର ଆହତ ହୋଇଛନ୍ତି । ସେ ଗୁପଚୁପ୍ ବ୍ୟବସାୟ କରୁଥିଲେ ।

ଆହତ ଧ୍ୟାନେନ୍ଦ୍ର ସିଂଙ୍କୁ ବ୍ରହ୍ମପୁର ବଡ଼ ମେଡିକାଲରେ ପ୍ରାଥମିକ ଚିକିତ୍ସା କରାଯିବା ପରେ କଟକ ବଡ଼ ମେଡିକାଲକୁ ସ୍ତାନାନ୍ତରିତ କରାଯାଇଥିଲା । ସେଠାରେ ତାଙ୍କ ସ୍ଥିତି ଗୁରୁତର ଅଛି ।

ଗୁଳିମାଡ଼ର ଅସଲ କାରଣ ଏବେ ବି ଜଣାପଡ଼ି ନାହିଁ । ମଧ୍ୟ ପ୍ରଦେଶ ରାଜ୍ୟର ବାସିନ୍ଦା ଧ୍ୟାନେନ୍ଦ୍ର ସିଂ ଗଲା କିଛି ବର୍ଷ ହେବ ବାଲିପଦର ଅଞ୍ଚଳରେ ଗୁପଚୁପ ବ୍ୟବସାୟ କରୁଥିଲେ ।

କରୋନା କଟକଣା ସମୟରେ ମୁମ୍ବାଇ ରେଳ ଷ୍ଟେସନରେ ପାଣି ବୋତଲ ବିକ୍ରି କରୁଥିବା ବିକାଶ ନାମକ ଜଣେ ଯୁବକ ବାଲିପଦର ଆସି ଧ୍ୟାନେନ୍ଦ୍ରଙ୍କ ପାଖରେ ଥିଲେ । ଶନିବାର ରାତିରେ ଗୁପଚୁପ ବ୍ୟବସାୟ ବୁକିଂ ପାଇଁ ରୁମାଗଡ଼ ଅଞ୍ଚଳକୁ ଉଭୟେ ଯାଇଥିଲେ । ସେଠାରେ ବିକାଶ ଗୁଳିମାଡ଼ କରି ଫେରାର ହୋଇଯାଇଥିବା ପ୍ରାଥମିକ ଅନୁସନ୍ଧାନରୁ ଜଣାପଡ଼ିଛି ।

ବୁଗୁଡ଼ା, ବାଲିପଦର, ବାଲିଛାଇ ଓ ପୋଲସରା ପୋଲିସ ରୁମାଗଡ଼ ତଥା ଆଖପାଖ ଗାଁରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି ।