କେନ୍ଦ୍ରାପଡ଼ା: ଟ୍ୟୁସନ୍ ମାଷ୍ଟ୍ରାଣୀଙ୍କ ସ୍ୱାମୀ ପାଠ ପଢ଼େଇଲେ; ପିଲାଙ୍କୁ ଲୁହା ପାଇପରେ ପିଟି ଗିରଫ ହେଲେ

ପାଠ ପଢ଼େଇବା ସମସ୍ତଙ୍କୁ ଆସେନି । ସାନ ପିଲାଙ୍କୁ ପାଠ ପଢ଼େଇବା ପାଇଁ ପଢ଼େଇବା କୌଶଳ ସହିତ ଧୈର୍ଯ୍ୟ ଆବଶ୍ୟକ । କେନ୍ଦ୍ରାପଡା ଜିଲ୍ଲାର ମାର୍ଶାଘାଇରେ ଟ୍ୟୁସନ୍ ମାଷ୍ଟ୍ରାଣୀଙ୍କ ଅନୁପସ୍ଥିତିରେ ତାଙ୍କ ସ୍ୱାମୀ ପିଲାଙ୍କୁ ପାଠ ପଢ଼େଇବାକୁ ବସି ସେମାନଙ୍କୁ ଅମଣିଷ ପରି ପିଟିଥିବା ଜଣାପଡ଼ିଛି ।

ମାର୍ଶାଘାଇ ଡାକ୍ତରଖାନାରେ କାର୍ଯ୍ୟରତା କାଦମ୍ବିନୀ ଦାସଙ୍କ ପୁଅ ମାନବାଦିତ୍ୟ ଦାସ ଓ ଅନିତା ପରିଡାଙ୍କ ପୁଅ ଅଭିଶେକ ପରିଡାକୁ ପୁରୁଷୋତ୍ତମପୁର ଗାଁର ଟ୍ୟୁସନ୍ ମାଷ୍ଟ୍ରାଣୀ ଲକ୍ଷ୍ମୀପ୍ରିୟା ବେହେରାଙ୍କ ସ୍ବାମୀ ରାଜେନ୍ଦ୍ର ରାଉତ ପାଠ ପଢାଇବାକୁ ବସିଥିଲେ ।

ପିଲାମାନେ ରାଜେନ୍ଦ୍ରଙ୍କର ପ୍ରଶ୍ନର ଉତ୍ତର ଠିକ୍ ଭାବେ ଦେଇପାରିଲେନି ବୋଲି ତାଙ୍କ ମୁଣ୍ଡକୁ ଏମିତି ପିତ୍ତ ଚଢିଲା ଯେ ସେ ଘରେ ଥିବା ଏକ ଲୁହା ପାଇପରେ ଛାତ୍ରମାନଙ୍କୁ ମାଡ଼ ମାରିଥିଲେ ।

ଦୁଇ କୋମଳମତି ଶିଶୁଙ୍କ ଗୋଡ଼ ଠାରୁ ମୁଣ୍ଡ ପର୍ଯ୍ୟନ୍ତ ରକ୍ତର ନୋଳା ଫାଟିବା ଯାଏ ସେମାନଙ୍କୁ ପିଟିଚାଲିଥିଲେ ରାଜେନ୍ଦ୍ର ।

ରାଜେନ୍ଦ୍ରଙ୍କ ମାଡ଼ରେ ଆହତ ହୋଇଛନ୍ତି ସ୍ଥାନୀୟ ସେଣ୍ଟ ଜାଭିୟର ସ୍କୁଲର ଛାତ୍ର ମାନବାଦିତ୍ୟ ଦାସ ଓ ଅଭିଷେକ ପରିଡା । ଗୁରୁତର ଆହତ ଏହି ଦୁଇ ଛାତ୍ରଙ୍କୁ ମାର୍ଶାଘାଇ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇ ଚିକିତ୍ସା ପରେ ଘରକୁ ଅଣା ଯାଇଛି ।

ଏ ନେଇ ମାର୍ଶାଘାଇ ଥାନାରେ ଅଭିଯୋଗ ହେବା ପରେ ରାଜେନ୍ଦ୍ରଙ୍କ ବିରୋଧରେ ଏକ ମାମଲା ରୁଜୁ କରିବା ସହ ତାଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।