ଇଏ ଜଣେ ମା’; ନାମ ଭାଗ୍ୟଲକ୍ଷ୍ମୀ; ନିଜ ଦୁଇ କୁନି ପୁଅଝିଅଙ୍କୁ କୂଅରେ ପକେଇ ମାରିଦେଲେ

କ୍ରୋଧର ବଶବର୍ତ୍ତୀ ହୋଇ ଜଣେ ନାରୀ ନିଜ ଦୁଇ ଜନ୍ମକଲା ପିଲାଙ୍କୁ ହତ୍ୟାକରିଛି ।

ପାରିବାରିକ କଳହ ଯୋଗୁଁ ଏହି ମହିଳା ଏତେ ହତାଶ ହୋଇଯାଇଥିଲେ ଯେ ସେ ପିଶାଚିନୀ ପାଲଟିଗଲେ ।

କନ୍ଧମାଳ ଜିଲ୍ଲାର ରାଇକିଆରେ ନିଜେ ଜନ୍ମଦାତ୍ରୀ ମା’ ନିଜ ଦୁଇ କୁନି ଛୁଆଙ୍କୁ ଏହି କୂଅ ଭିତରକୁ ଠେଲି ମାରିବା ପରେ ନିଜେ ଆତ୍ମହତ୍ୟା ଉଦ୍ୟମ କରିଥିଲେ ।

ଭାଗ୍ୟଲକ୍ଷ୍ମୀ ପାତ୍ର ନାମକ ଏହି ମହିଳା ଜୁଲାଇ ୧୬ ତାରିଖ ଅପରାହ୍ଣରେ ଏହି ଅପକର୍ମ କରିଥିଲେ । ନିଜ ଦୁଇ ପିଲାଙ୍କୁ କୂଅ ଭିତରକୁ ଠେଲି ନିଜେ ତା’ ଭିତରକୁ ଡେଇଁ ପଡ଼ୁଥିବା ବେଳେ ତାଙ୍କୁ ସ୍ଥାନୀୟ ଲୋକେ ଉଦ୍ଧାର କରିଥିଲେ ।

ନଅ ବର୍ଷର ଝିଅ ବୈଷ୍ଣବୀ ଓ ପାଞ୍ଚ ବର୍ଷର ପୁଅ ରାଜକୁ କୂଅକୁ ଠେଲି ମାରି ଦେଇଥିଲେ ଭାଗ୍ୟଲକ୍ଷ୍ମୀ ପାତ୍ର ।

ସ୍ଥାନୀୟ ଲୋକେ ପୋଲିସ ସହାୟତାରେ କୂଅ ଭିତରୁ ଦୁଇ କୁନି ପିଲାଙ୍କ ମୃତ ଦେହ ବାହାର କରିଥିଲେ ।

ରାଇକିଆର ଅଲିମାହା ସାହିରେ ଗାଁ ନିକଟରେ ଥିବା ଏହି ପରିତ୍ୟକ୍ତ କୂଅ ଭିତରକୁ ନିଜ ଦୁଇ ପିଲାଙ୍କୁ ଠେଲି ଦେଇଥିଲେ ଭାଗ୍ୟଲକ୍ଷ୍ମୀ ।

ଦୁଇ ପିଲାଙ୍କ ଶବ ବାହାରକୁ ଆସିବା ପରେ ଶବ ପାଖରେ ବାହୁନି ବାହୁନି କାନ୍ଦୁଥିଲେ ଭାଗ୍ୟଲକ୍ଷ୍ମୀ ଓ ତାଙ୍କ ସ୍ୱାମୀ ଏମ୍. ରାଜେଶ ପାତ୍ର ।

ହସପିଟାଲରେ ନିଜ ଦୁଇ ପିଲାଙ୍କ ଶବ ନିକଟରେ ଦୁଃଖରେ ଭାଙ୍ଗିପଡ଼ିଥିଲେ ବାପା ଏମ୍. ରାଜେଶ ପାତ୍ର ଓ ତାଙ୍କ ପରିଜନ ।

‘‘ମୋ’ ପାଖରେ କହିବାକୁ କିଛି ଆଉ ନାହିଁ । ମୋ’ ପିଲାମାନେ ତ ପଳେଇଲେ, କ’ଣ ଆଉ କହିବି ମୁଁ?’’ ହସପିଟାଲରେ କାନ୍ଦି କାନ୍ଦି କହୁଥିଲେ ଭାଗ୍ୟଲକ୍ଷ୍ମୀ । ‘‘ଗଣ୍ଡଗୋଳ ପାଇଁ ଏମିତି ଷ୍ଟେପ୍ ନେବାକୁ ପଡ଼ିଲା ମୋତେ । ବାଧ୍ୟ ହୋଇ ନେଲି ମୁଁ । ହେଲେ ଭଗବାନ କାହିଁକି ମୋତେ ରଖିକି ମୋ’ ପିଲା ଦି’ଟାଙ୍କୁ ନେଇଗଲେ!

ଭାଗ୍ୟଲକ୍ଷ୍ମୀ କହିଥିଲେ ଯେ ସେ ନିଜେ ଆତ୍ମହତ୍ୟା କରିବାକୁ ଘରୁ ବାହାରିଯାଉଥିବା ବେଳେ ତାଙ୍କ ଦୁଇ ପିଲା ତାଙ୍କ ସାଙ୍ଗରେ ଯିବେ ବୋଲି କହିବାରୁ ସେ ସେମାନଙ୍କୁ ସାଙ୍ଗରେ ନେଇଯାଇଥିଲେ । ‘‘ମୋ’ ସ୍ୱାମୀଙ୍କ ସହ ସେମିତି କିଛି ବଡ଼ କଳହ ନ ଥିଲା । ସେ ମୋତେ କ୍ଷମା ମାଗିସାରିଥିଲେ,’’ ସେ କହିଥିଲେ ।

ତାଙ୍କ ସ୍ୱାମୀ ଏମ୍. ରାଜେଶ ପାତ୍ର ହସପିଟାଲରେ କହିଥିଲେ, ‘‘ଆଉ ଏ ବିଷୟରେ କହି କିଛି ଲାଭ ନାହିଁ । ମୁଁ ମୋ’ ପିଲାମାନଙ୍କୁ ଆଉ ପାଇବିନି ନା! ମୋ’ ସ୍ତ୍ରୀ ହିଁ ମୋ’ର ସାହା ଭରସା ।’’

ପୋଲିସ ଉଭୟ ପତି-ପତ୍ନୀଙ୍କୁ ଅଟକ ରଖି ଏହି ଘଟଣା ବିଷୟରେ ପଚରାଉଚରା କରୁଛି ଓ ତଦନ୍ତ ଜାରି ରଖିଛି ।

ଏହି ମର୍ମନ୍ତୁଦ ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇଦେଇଛି ।