ଚାଞ୍ଚଲ୍ୟ: ଶିକ୍ଷୟତ୍ରୀ ମମିତା ମେହେରଙ୍କୁ ସ୍କୁଲ୍‌ ମାଲିକ ଗୋବିନ୍ଦ ସାହୁ ହତ୍ୟା କରି ପୋତି ଦେଇଥିଲା

ବଲାଙ୍ଗିର ଜିଲ୍ଲାର ଶିକ୍ଷିକା ମମିତା ମେହେର ନିଖୋଜ ହେବାର ୧୨ ଦିନ ପରେ ରହସ୍ୟ ଉପରୁ ହଟିଛି ପରଦା । କଳାହାଣ୍ଡି ଜିଲ୍ଲା ମହାଲିଙ୍ଗରେ ଥିବା ସନସାଇନ୍‌ ପବ୍ଲିକ୍‌ ସ୍କୁଲର ସଭାପତି ଗୋବିନ୍ଦ ସାହୁ ହିଁ ମମିତାଙ୍କୁ ହତ୍ୟା କରିଛି ବୋଲି ତଦନ୍ତ ପରେ ସ୍ପଷ୍ଟ କରିଛି ପୋଲିସ ।

୨୩-ବର୍ଷୀୟା ମମିତା ମେହେର ସନସାଇନ୍‌ ପବ୍ଲିକ୍‌ ସ୍କୁଲରେ ଶିକ୍ଷୟତ୍ରୀ ଭାବେ କାର୍ଯ୍ୟ କରୁଥିଲେ ।

ଉତ୍ତରାଞ୍ଚଳ ଡି.ଆଇ.ଜି. ଦୀପକ କୁମାର (ଡାହାଣ) କହଛନ୍ତି ତଦନ୍ତରୁ ସ୍ପଷ୍ଟ ହୋଇଛି ଯେ ପରକୀୟା ପ୍ରୀତିକୁ ନେଇ ଗୋବିନ୍ଦ ସାହୁକୁ ମମିତା ବ୍ଲାକମେଲ୍ କରୁଥିବାରୁ ତାଙ୍କୁ ବାଟରୁ ସଫା କରି ଦେବାକୁ ଗୋବିନ୍ଦ ଷଡ଼ଯନ୍ତ୍ର ରଚିଥିଲା ।

ନିଜ କାର୍ ଭିତରେ ମମିତାଙ୍କୁ ହତ୍ୟା କରିବା ପରେ ଏହି ଅପରାଧକୁ ଲୁଚାଇ ରଖିବା ପାଇଁ ମହାଲିଙ୍ଗ ଷ୍ଟାଡିୟମରେ ତାଙ୍କ ମୃତ ଦେହକୁ ପୋଡ଼ି ପୋତି ଦେଇଥିଲା ଗୋବିନ୍ଦ ସାହୁ ।

ଅକ୍ଟୋବର ୮ ତାରିଖରୁ ନିଖୋଜ ହୋଇଯାଇଥିଲେ ମମିତା । ୧୧ ତାରିଖରେ କଳାହାଣ୍ଡି କେଗାଁ ଥାନାରେ ତାଙ୍କ ବାପା ଏତାଲା ଦେବାକୁ ଆସିଥିଲେ, ହେଲେ ପୋଲିସ ରଖି ନ ଥିଲା ଏତଲା । ଅକ୍ଟୋବର ୧୩ ତାରିଖରେ ମମିତାଙ୍କ ନିଖୋଜ ହେବା ନେଇ ସିନ୍ଧିକେଲା ଥାନାରେ ଏକ ବିଧିବଦ୍ଧ ଏତଲା ଦେଇଥିଲେ ପରିବାର । ଗୋବିନ୍ଦ ସାହୁ ନାଁରେ ସେମାନେ ଆଣିଥିଲେ ସଙ୍ଗୀନ ଅଭିଯୋଗ ।

ପୋଲିସ ଛାନଭିନ୍ ଆରମ୍ଭ କରିଥିଲା । ଅକ୍ଟୋବର ୧୩ ତାରିଖରେ ହିଁ ଗୋବିନ୍ଦକୁ ମହାଲିଙ୍ଗରୁ ଆଣି ଟିଟିଲାଗଡ଼ ପୋଲିସ ବାରାକରେ ଅଟକ ରଖାଯାଇଥିଲା । କିନ୍ତୁ ୧୭ ତାରିଖ ସନ୍ଧ୍ୟାରେ ବାରାକରୁ ଚମ୍ପଟ ମାରିଥିଲା ଗୋବିନ୍ଦ । ଏହାକୁ ନେଇ ସାରା ରାଜ୍ୟରେ ଖେଳିଯାଇଥିଲା ଆଲୋଡ଼ନ ।

ଗୋବିନ୍ଦକୁ ମୋଷ୍ଟ ୱାଣ୍ଟେଡ୍ ଘୋଷଣା କରି ତା’ ପାଇଁ ୨୦,୦୦୦ ଟଙ୍କାରୁ ପୁରସ୍କାର ରାଶି ଲକ୍ଷେ ଟଙ୍କାକୁ ବଢ଼ାଇ ଦେଇଥିଲା ପୋଲିସ । ଅକ୍ଟୋବର ୧୯ ତାରିଖରେ ଗୋବିନ୍ଦକୁ ତା’ ଭଉଣୀ ଘର ବଙ୍ଗୋମୁଣ୍ଡା ମୁଡ଼ିପଦରରୁ ଗିରଫ କରିଥିଲା ବଲାଙ୍ଗିର ପୋଲିସ ।

ମହାଲିଙ୍ଗରେ ନିର୍ମାଣାଧୀନ ମିନି ଷ୍ଟାଡ଼ିୟମ୍‌ ପରିସରରେ ଖୋଳିବା ପରେ ଅକ୍ଟୋବର ୧୯ ତାରିଖରେ ମିଳିଥିଲା ଏକ ଗଳିତ ମୃତ ଦେହ । ତା’ ପାଖରୁ ପାଉଁଜି ଓ ସୁନା ଚେନ୍ ସହ ଏକ ଭ୍ୟାନିଟି ବ୍ୟାଗ୍‌ ମଧ୍ୟ ମିଳିଥିଲା ।

ଅକ୍ଟୋବର ୧୯ ତାରିଖ ସକାଳୁ ସକାଳୁ ଜେ.ସି.ବି. ମ୍ୟାସିନ୍‌ ଲଗାଇ ଷ୍ଟାଡିୟମ୍‌ ପରିସରରେ ଥିବା ଏକ ନିର୍ଦ୍ଦିଷ୍ଟ ସ୍ଥାନକୁ ଖୋଳାଯାଇଥିଲା । ଗଭୀର ଯାଏଁ ଖୋଳିବା ପରେ ମିଳିଥିଲା ଗଳିତ ମୃତ ଦେହ । ସନସାଇନ୍‌ ପବ୍ଲିକ ସ୍କୁଲଠାରୁ ପଡ଼ିଆର ଦୂରତା ପ୍ରାୟ ଏକ କିଲୋମିଟର୍‌ । ଷ୍ଟାଡିୟମ ପରିସରରେ ଦୁଇ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିଲା ।

ଗୋବିନ୍ଦଙ୍କୁ ପାଞ୍ଚ-ଦିନିଆ ରିମାଣ୍ଡ ନେବା ପାଇଁ ପୋଲିସକୁ ଅନୁମତି ଦେଇଛନ୍ତି ବଙ୍ଗୋମୁଣ୍ଡା ଜେ.ଏମ୍‌.ଏଫ୍‌.ସି. କୋର୍ଟ ।

ମମିତାଙ୍କୁ ତଣ୍ଟି ଚିପି ହତ୍ୟା କରାଯାଇଥିଲା ନା ଆଉ କେଉଁ ଉପାୟରେ ମାରିଥିଲା ଗୋବିନ୍ଦ ସାହୁ, ସେ ନେଇ ଅଧିକ ତଦନ୍ତ ଚାଲିଛି ବୋଲି କହିଛନ୍ତି ଡି.ଆଇ.ଜି. ଦୀପକ କୁମାର ।