ଦିନେ ଏହି କାମ ପାଇଁ ବେଶ ଚର୍ଚ୍ଚାରେ ଥିଲେ ଦୁଇ ଜିଲ୍ଲାପାଳ; ଜଲଦି କରିବେ ବିବାହ

ବଲାଙ୍ଗିର ଜିଲ୍ଲାପାଳ ଚଞ୍ଚଳ ରାଣାଙ୍କ ସହ ପଡ଼ିବ ସମ୍ବଲପୁର ଜିଲ୍ଲାପାଳ ଅନନ୍ୟା ଦାସଙ୍କ ହାତଗଣ୍ଠି । ରବିବାର ଜିଲ୍ଲାପାଳ ଅନନ୍ୟା ଦାସଙ୍କ ସରକାରୀ ବାସଭବନ ପରିସରରେ ପାରମ୍ପରିକ ରୀତିନୀତି ଅନୁସାରେ ସଂପନ୍ନ ହୋଇଛି ନିର୍ବନ୍ଧ ଉତ୍ସବ । ଦୁଇ ପରିବାରର ସଦସ୍ୟ, ବନ୍ଧୁବାନ୍ଧବ ଓ ଘନିଷ୍ଠ ସହଯୋଗୀଙ୍କ ଉପସ୍ଥିତିରେ ହୋଇଥିଲା ନିର୍ବନ୍ଧ ପର୍ବ ।...

ଯଦିଓ ଅନନ୍ୟା-ଚଞ୍ଚଳଙ୍କ ବାହାଘର କେବେ ହେବ, ତାହା ସ୍ଥିର ହୋଇନାହିଁ, ତେବେ ଆଗାମୀ ଦୁଇରୁ ୩ ମାସ ଭିତରେ ବିବାହ ଉତ୍ସବ ଅନୁଷ୍ଠିତ ହେବ ବୋଲି କୁହାଯାଉଛି । ଏହା ହେବ ଉଭୟଙ୍କ ଦ୍ବିତୀୟ ବିବାହ ।

୨୦୧୩ ବ୍ୟାଚ୍ ଆଇଏଏସ୍ ଅଫିସର ଚଞ୍ଚଳ ରାଣା, ଅନୁଗୁଳ ବାସିନ୍ଦା । ଏନ୍ଆଇଟି ସିଲଚେରରୁ ବିଟେକ୍ ଡିଗ୍ରୀ ହାସଲ କରିଥିବା ଚଞ୍ଚଳ, ଭାରତୀୟ ପ୍ରାଶାସନିକ ସେବା ପରୀକ୍ଷାରେ ସର୍ବଭାରତୀୟ ସ୍ତରରେ ସପ୍ତମ ରାଙ୍କ ରଖିବା ସହ ଓଡ଼ିଶା ଟପ୍ପର ହୋଇଥିଲେ । ଓଡ଼ିଶା କ୍ୟାଡରର ଏହି ଆଇଏଏସ, କୁଚିଣ୍ଡା ଉପ ଜିଲ୍ଲାପାଳ, ମୟୂରଭଞ୍ଜ ପ୍ରୋଜେକ୍ଟ ଡାଇରେକ୍ଟର ଭାବେ କାମ କରିଛନ୍ତି । ରାଜ୍ୟରେ ଦୁଗ୍ଧ ଉତ୍ପାଦନ ବୃଦ୍ଧି ପାଇଁ ଶ୍ବେତ ବିପ୍ଲବରେ ବଡ଼ ଭୂମିକା ତୁଲାଇଥିବା ଚଞ୍ଚଳ ରାଣା । ଯେଉଁଥିପାଇଁ ସେ ଜାତୀୟ ଗଣମାଧ୍ୟମରେ ଚର୍ଚ୍ଚାରେ ମଧ୍ୟ ଥିଲେ ।...

୨୦୧୮ ବ୍ୟାଚ୍ ଆଇଏଏସ୍ ଅଫିସର ହେଉଛନ୍ତି ଅନନ୍ୟା ଦାସ । ଭାରତୀୟ ପ୍ରାଶାସନିକ ସେବା ପରୀକ୍ଷାରେ ସର୍ବଭାରତୀୟ ସ୍ତରରେ ୧୬ତମ ରାଙ୍କରେ ଥିଲେ । ପ୍ରଥମ ପଦକ୍ଷେପରେ ସିଭିଲ୍ ସର୍ଭିସ୍ ପରୀକ୍ଷାରେ କୃତକାର୍ଯ୍ୟ ହୋଇଥିବା ଅନନ୍ୟା ହେଉଛନ୍ତି ଆସାମର ମୂଳ ବାସିନ୍ଦା । ସମ୍ବଲପୁର ଜିଲ୍ଲାପାଳ ହେବା ପୂର୍ବରୁ ସେ କଟକ ମହାନଗର ନିଗମର କମିଶନର ଦାୟିତ୍ବ ତୁଲାଇଥିଲେ ।

ଦୁଇ ଯୁବ ଜିଲ୍ଲାପାଳ ଚଞ୍ଚଲ ରାଣା ଓ ଅନନ୍ୟା ଦାସ ନିଜ କର୍ମକ୍ଷେତ୍ରରେ ବେଶ୍ ଦକ୍ଷ । କଟକ ମହାନଗର ନିଗମ କମିଶନର ଥିବା ବେଳେ କୋଭିଡ୍ ସ୍ଥିତିର ସଫଳ ମୁକାବିଲା ଓ ପରିଚାଳନା କରିଥିଲେ IAS ଅନନ୍ୟା ଦାସ । ଏଥିସହ କଟକ ନବକଳେବର ନେଇ ମୁଖ୍ୟମନ୍ତ୍ରୀ ଘୋଷଣା କରିଥିବା ପ୍ରକଳ୍ପର କାର୍ଯ୍ୟାନ୍ବୟନ କ୍ଷେତ୍ରରେ ଗୁରୁତ୍ବପୂର୍ଣ୍ଣ ଭୂମିକା ତୁଲାଇଥିଲେ । କଟକର ଡ୍ରେନେଜ ମରାମତି ଓ ସଂପ୍ରସାରଣ ସହ ସ୍ବରେଜ୍ କାର୍ଯ୍ୟ ତୁଲାଇବାରେ ତାଙ୍କ ଭୂମିକା ବେଶ୍ ପ୍ରଶଂସନୀୟ ଥିଲା । ପ୍ରଥମ କମିଶନର ଭାବେ ଗ୍ରାଉଣ୍ଡକୁ ଓହ୍ଲାଇ ଲୋକଙ୍କ ସହ ସିଧାସଳଖ ମିଶୁଥିଲେ ଓ ପ୍ରତ୍ୟକ୍ଷ ଫିଡବ୍ୟାକ୍ ନେଇ କାର୍ଯ୍ୟକ୍ଷେତ୍ରରେ ଲଗାଉଥିଲେ । ଏଥିପାଇଁ ସାଧାରଣ ଲୋକଙ୍କଠାରୁ ଆରମ୍ଭ କରି ସହକର୍ମୀ ଓ ବରିଷ୍ଠ ପ୍ରଶାସକଙ୍କ ମହଲରେ ବେଶ୍ ପ୍ରିୟପାତ୍ରୀ ଥିଲେ ଅନନ୍ୟା ।

ଠିକ୍ ସେମିତି ଆଇଏଏସ୍ ଚଞ୍ଚଲ ରାଣା ମଧ୍ୟ ତାଙ୍କ କାର୍ଯ୍ୟକ୍ଷେତ୍ରରେ ଯଥେଷ୍ଟ ଦକ୍ଷତା ଦେଖାଇଛନ୍ତି । ନିର୍ବନ୍ଧ ସରିବା ପରେ ଚର୍ଚ୍ଚାରେ ଦୁଇ ଜିଲ୍ଲାପାଳ ଚଞ୍ଚଲ ଓ ଅନନ୍ୟା । ଏବେ ସମସ୍ତଙ୍କ ନଜର କେବେ ହେବେ ବାହାଘର ?.