ଗଞ୍ଜାମ ଜିଲ୍ଲାରେ ଘଟିଯାଇଛି ଗୋଟିଏ ଅତି ହୃଦୟବିଦାରକ ବର୍ବର କାଣ୍ଡ । ନିଜକୁ ପ୍ରେମିକ ବୋଲି କହୁଥିବା ଜଣେ ଯୁବକ ନିଜ ପ୍ରେମିକା ଦେହରେ ନିଆଁ ଲଗାଇଦେଇଛି ବୋଲି ମୃତ୍ୟୁ ପୂର୍ବରୁ ପୋଲିସକୁ କହିଛନ୍ତି ପ୍ରେମିକା ଜଣକ । ନିଆଁରେ ଜଳି ମୃତ୍ୟୁ ଘଟିଛି ଶୁଭସ୍ମିତା ଖାଡ଼ଙ୍ଗା ନାମକ ଯୁବତୀଙ୍କର। ମୃତ୍ୟୁ ପୂର୍ବରୁ ସେ ପୋଲିସକୁ ନିଜ ବୟାନରେ କହିଛନ୍ତି ଯେ କୃଷ୍ଣଚନ୍ଦ୍ର ସାହୁ ନାମକ ତାଙ୍କ ପ୍ରେମିକ ହିଁ ତାଙ୍କ ଦେହରେ ନିଆଁ ଲଗେଇଦେଇଥିଲା । ଏହି ମୃତ୍ୟୁକାଳୀନ ଜମାନବନ୍ଦୀର ଭିଡିଓ ରେକର୍ଡ଼ ହୋଇ ରହିଛି । ଏହି ଘଟଣା ଘଟିଥିଲା ଜୁଲାଇ ୨୭ ତାରିଖ ମଙ୍ଗଳବାର ଅପରାହ୍ଣରେ। ବର୍ଷେ ଧରି ନିଜକୁ ତାଙ୍କ ପ୍ରେମିକ ବୋଲି କହୁଥିବା ଯୁବକ କୃଷ୍ଣଚନ୍ଦ୍ର ସାହୁ ତାଙ୍କ ଦେହରେ ସ୍ପିରିଟ୍ ଢାଳିବା ପରେ ନିଆଁ ଲଗାଇଦେଇଥିଲା ବୋଲି ମୃତ୍ୟୁ ପୂର୍ବରୁ କହିଛନ୍ତି ଶୁଭସ୍ମିତା। ପୁରୁଷୋତ୍ତମପୁର ଥାନା ଅନ୍ତର୍ଗତ ପ୍ରତାପପୁରରେ ଏକ ପରିତ୍ୟକ୍ତ ଘର ଭିତରୁ ଶୁଭସ୍ମିତାଙ୍କ ବିକଳ ଚିତ୍କାର ଶୁଣି ସ୍ଥାନୀୟ ଲୋକେ ଯାଇ ଦେଖିଥିଲେ ଯେ ସେ ଅର୍ଦ୍ଧଦଗ୍ଧ ଅବସ୍ଥାରେ ଯନ୍ତ୍ରଣାରେ ଛଟପଟ ହେଉଛନ୍ତି । ତାଙ୍କ ଦେହ ସାରା ନିଆଁ ଲାଗି ଜଳିଯାଇଥିଲା । ସ୍ଥାନୀୟ ଲୋକେ ପୋଲିସକୁ ସୂଚନା ଦେଇଥିଲେ । ପୋଲିସ ଆସିବା ପରେ ଗାଡ଼ିରେ ଶୁଆଇ ଗୁରୁତର ଅବସ୍ଥାରେ ଥିବା ଶୁଭସ୍ମିତାଙ୍କୁ ପ୍ରଥମେ ପୁରୁଷୋତ୍ତମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଥିଲେ । ସେଠାରୁ ତାଙ୍କୁ ବ୍ରହ୍ମପୁରର ଏମ୍.କେ.ସି.ଜି. ହସପିଟାଲକୁ ସ୍ଥାନାନ୍ତର କରାଯାଇଥିଲା । ବ୍ରହ୍ମପୁରରେ ଅଳ୍ପ କିଛି ଘଣ୍ଟା ମଧ୍ୟରେ ଚିକିତ୍ସାଧୀନ ଅବସ୍ଥାରେ ପ୍ରାଣ ହରେଇଥିଲେ ଶୁଭସ୍ମିତା। ତାଙ୍କ ଦେହ ଏତେ ମାତ୍ରାରେ ଜଳିଯାଇଥିଲା ଯେ ଡାକ୍ତରମାନଙ୍କ ସବୁ ଚେଷ୍ଟା ସତ୍ତ୍ୱେ ସେ ମୃତ୍ୟୁ ବରଣ କରିଥିଲେ । ‘‘ସେ ମୋତେ ଭଲ ପାଉଥିଲା । କୃଷ୍ଣଚନ୍ଦ୍ର ସାହୁ, ପ୍ରତାପପୁର, ଗଉଡ଼ାସାହି… କହିଲା ମୋତେ ବାହା ହେବନି । ତା’ ପରେ ସ୍ପିରିଟ ଢାଳି ନିଆଁ ଲଗେଇଦେଲା,’’ ପୋଲିସକୁ ନିଜ ବୟାନରେ କହିଥିଲେ ପୋଲସରା ବ୍ଲକର କଳମ୍ବ ଗ୍ରାମର ବାସିନ୍ଦା ଶୁଭସ୍ମିତା ଖାଡ଼ଙ୍ଗା । ପ୍ରେମ ନାଁରେ କଳଙ୍କ ସେହି ଅଭିଯୁକ୍ତ ଯୁବକ କୃଷ୍ଣଚନ୍ଦ୍ର ସାହୁକୁ ଗିରଫ କରାଯାଇଛି । ହେଲେ ସେ କହିଛି ଯେ ସେ ଏହି କାର୍ଯ୍ୟ କରିନାହିଁ ଓ ଘଟଣା ସମୟରେ ସେ ପ୍ରତାପପୁରରେ ନ ଥିଲା । ମୃତା ଯୁବତୀ ଶୁଭସ୍ମିତା ଖାଡ଼ଙ୍ଗା । ଅଭିଯୁକ୍ତ ଯୁବକ କୃଷ୍ଣଚନ୍ଦ୍ର ସାହୁ ପୋଲିସ ଦ୍ୱାରା ଗିରଫ ହୋଇ ଯାଉଥିବା ବେଳେ କୃଷ୍ଣଚନ୍ଦ୍ର କହିଥିଲା ଯେ ସେ ଯେ ଶୁଭସ୍ମିତାଙ୍କ ଦେହରେ ନିଆଁ ଲଗେଇନାହିଁ ତାହା ପୋଲିସ ତଦନ୍ତରୁ ସ୍ପଷ୍ଟ ହେବ । ମୃତା ଶୁଭସ୍ମିତାଙ୍କ ବାପା ପ୍ରଶାନ୍ତ କୁମାର ଖାଡ଼ଙ୍ଗା କହିଛନ୍ତି ଯେ କୃଷ୍ଣଚନ୍ଦ୍ର ଖାଡ଼ଙ୍ଗା ଶୁଭସ୍ମିତାଙ୍କୁ ବହୁତ ହଇରାଣ କରୁଥିଲା ଓ ସେ ତାକୁ ହତ୍ୟା କରିଥିବ । କୃଷ୍ଣଚନ୍ଦ୍ରକୁ ଫାଶୀ ଦଣ୍ଡ ମିଳୁ ବୋଲି ସେ ଦାବି କରିଛନ୍ତି । ଅଭିଯୁକ୍ତ କୃଷ୍ଣଚନ୍ଦ୍ରର ବାପା ପୂର୍ଣ୍ଣଚନ୍ଦ୍ର ସାହୁ (ଡାହାଣ) କହିଛନ୍ତି ଯେ କୃଷ୍ଣ ସହ ବିବାହ ସମ୍ଭବ ହୋଇ ନ ଥିବାରୁ ଶୁଭସ୍ମିତା ନିଜ ଉପରେ ନିଜେ ସ୍ପିରିଟ ଢାଳି ନିଆଁ ଲଗେଇଦେଇଥିବ ବୋଲି ସେ ସନ୍ଦେହ କରୁଛନ୍ତି ।
