ଦିନେ କେନ୍ଦ୍ରାପଡ଼ାରେ ରିକ୍ସା ଚଳାଇ ପେଟ ପୋଷୁଥିଲା ଶେଖ୍‌ ହାଇଦର୍‌; ପାଲଟିଗଲା ବଡ଼ ଗ୍ୟାଙ୍ଗଷ୍ଟର୍‌

କଟକ ଏସ୍.ସି.ବି. ହସପ୍ଟିଲର ସର୍ଜରୀ ୱାର୍ଡ଼ରେ ଚିକିତ୍ସାଧୀନ ଅବସ୍ଥାରୁ ପୋଲିସ୍ ଆଖିରେ ଧୂଳି ଦେଇ ଫେରାର୍ ହୋଇଯାଇଥିବା ଗ୍ୟାଙ୍ଗଷ୍ଟର୍ ଶେଖ୍ ହାଇଦରକୁ ନେଇ ସାରା ଓଡ଼ିଶାରେ ଚର୍ଚ୍ଚା ଚାଲିଛି । ରାଜ୍ୟର ବଡ଼ ଓ ଧନୀ ଗ୍ୟାଙ୍ଗଷ୍ଟରମାନଙ୍କ ମଧ୍ୟରେ ଗଣାଯାଉଥିବା ହାଇଦରର ଜୀବନ କାହାଣୀ ଖୁବ୍ ଚିତ୍ତାକର୍ଷକ ।

ଶେଖ୍ ହାଇଦର୍ ବହୁତ ଗରିବ ଥିଲା । ୮୦ ଦଶକରେ ସେ କେନ୍ଦ୍ରାପଡ଼ାରେ ରିକ୍ସା ଚଳାଇ ପେଟ ପୋଷୁଥିଲା । ପରେ ପରେ ଟ୍ରେକର୍‌ ଓ ଟ୍ରକ୍‌ ବି ଚଳାଇଥିଲା। ନିଜକୁ ଦାରିଦ୍ର୍ୟ ଭିତରୁ ବାହାରକୁ ଆଣିବା ପାଇଁ ଖୁବ୍‌ ଚେଷ୍ଟା କରିଥିଲା ସେ । ହେଲେ ଅପରାଧ ଦୁନିଆ ପ୍ରତି ତା’ର ଥିଲା ଆକର୍ଷଣ ।

କେନ୍ଦ୍ରାପଡ଼ାରେ ଅପରାଧୀ ଟିଟୋକୁ ଦେଖି ହାଇଦର୍‌ ମନରେ ତା’ ପରି କ୍ଷମତା ଓ ଅର୍ଥ ଲାଭ କରିବାର ଇଚ୍ଛା ଜନ୍ମିଥିଲା । ପରେ ସେ ଟିଟୋ ଗ୍ୟାଙ୍ଗରେ ମିଶି ଛୋଟମୋଟ ଅପରାଧ କରିଥିଲା । କିନ୍ତୁ ସେଥିରୁ ନା ତାକୁ ବେଶୀ କିଛି ଅର୍ଥ ନା କୁଖ୍ୟାତି ମିଳିଥିଲା । (ଫଟୋରେ ଟିଟୋ, ମଝିରେ)

୧୯୯୧ରେ ଅପରାଧୀ ବୁଲା ସେଠୀକୁ କୋର୍ଟ ପରିସରରେ ହତ୍ୟା କରିବା ପରେ ରାତାରାତି କୁଖ୍ୟାତ ହୋଇଯାଇଥିଲା ହାଇଦାର୍‌ । ସେହି ସମୟ ଠାରୁ ଟିଟୋ ଓ ଶେଖ୍ ସୁଲେମାନ୍‌ ପରି ବଡ଼ ଗ୍ୟାଙ୍ଗଷ୍ଟରମାନଙ୍କ ନାଁ ସହିତ ଯୋଡ଼ି ହାଇଦରର ନାଁ ବି ନିଆଯିବା ଆରମ୍ଭ ହୋଇଥିଲା । ଏହି ତିନି ଗ୍ୟାଙ୍ଗଷ୍ଟର୍‌ ଓଡ଼ିଶାକୁ ଥରହର କରୁଥିଲେ ।

୧୯୯୭ରେ ହାଇଦରକୁ ଏନକାଉଣ୍ଟର୍‌ କରିଥିଲା ପୋଲିସ । ଏହା ପରେ ଟିଟୋ ଓ ହାଇଦର୍‌ ମଧ୍ୟରେ ପଡି଼ ନ ଥିଲା । ତେଣୁ ଟିଟୋ, ଶେଖ୍ ସୁଲେମାନ୍‌ ଓ ହାଇଦର୍‌ ନିଜ ନିଜର ଅଲଗା ଗ୍ୟାଙ୍ଗ୍‌ ଗଢି଼ଥିଲେ । କିନ୍ତୁ ଟିଟୋ ସହିତ ହାଇଦରର ଶତ୍ରୁତା ବଢି଼ଥିଲା । ସେଇଥି ପାଇଁ ଟିଟୋ ଗ୍ୟାଙ୍ଗ୍‌ ପକ୍ଷରୁ ହାଇଦର୍‌ ଉପରେ ଅନେକ ଥର ଆକ୍ରମଣ ହୋଇଥିଲା ।

୨୦୦୫ରେ ସେଖ୍‌ ସୁଲେମାନର ସାନ ଭାଇ ସେଖ୍‌ ଚୁନାକୁ ଭୁବନେଶ୍ୱର ଷ୍ଟିୱାର୍ଟ୍‌ ସ୍କୁଲ୍‌ ନିକଟରେ ହାଇଦରର ସହଯୋଗୀମାନେ ହତ୍ୟା କରିଥିଲେ । ସେହି ହତ୍ୟାକାଣ୍ଡ ଘଟଣାରେ ହାଇଦର୍‌ ଓ ତା’ର ସହଯୋଗୀମାନେ ଚର୍ଚ୍ଚାକୁ ଆସିଥିଲେ। ଏହି ମାମଲାରେ ଭୁବନେଶ୍ୱର ଦୌରା ଜଜ୍ କୋର୍ଟ ହାଇଦରକୁ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ । (ଫଟୋରେ ଗ୍ୟାଙ୍ଗଷ୍ଟର୍‌ ସୁଲେମାନ୍‌)

୨୦୦୭ରେ କେନ୍ଦୁଝରର ଖଣି ଓ କ୍ରସର୍‌ ବ୍ୟବସାୟୀ ରଶ୍ମି ରଞ୍ଜନ ମହାପାତ୍ରଙ୍କୁ ଭୁବନେଶ୍ୱରରୁ ଅପହରଣ କରାଯାଇଥିଲା । ରଶ୍ମି ଓ ତାଙ୍କ ଗାଡି଼ ଡ୍ରାଇଭରକୁ ଅପହରଣ କରି ମୁଣ୍ଡ ଜାମିନ୍‌ ରଖି ତାଙ୍କ ପରିବାରକୁ ଟଙ୍କା ମାଗିଥିଲେ ମଧ୍ୟ ପରେ ତାଙ୍କୁ ହତ୍ୟା କରାଯାଇଥିଲା। ଏହି ମାମଲାରେ ହାଇଦର୍‌ ସମେତ ଦୁଇ ସହଯୋଗୀଙ୍କୁ ଭୁବନେଶ୍ୱର ଅତିରିକ୍ତ ଜିଲ୍ଲା ଜଜ କୋର୍ଟ ୨୦୧୫ରେ ଆଜୀବନ କାରଦଣ୍ଡ ଶୁଣାଇଥିଲେ ।

ଝାରପଡ଼ା ଜେଲରେ ଥାଇ ମଧ୍ୟ ରଶ୍ମି ରଞ୍ଜନ ମହାପାତ୍ରଙ୍କ ଅପହରଣ ଓ ହତ୍ୟା ଯୋଜନାରେ ମାଷ୍ଟରମାଇଣ୍ଡ ଥିଲା ହାଇଦର୍‌ ।

ସୁରକ୍ଷା କାରଣରୁ ହାଇଦରକୁ ବଲାଙ୍ଗିର ଜିଲ୍ଲା କାରାଗାରକୁ ୨୦୦୮ ମସିହାରେ ଅଣାଯାଇଥିଲା । ଆଉ ସେଠାରେ ୨୦୧୦ ମସିହା ଯାଏ ରହିଥିଲା ସେ । ବଲାଙ୍ଗୀର ଜେଲରେ ଥିବା ବେଳେ ସେଠାରୁ ମଧ୍ୟ ଚମ୍ପଟ ମାରିବା ପାଇଁ ଉଦ୍ୟମ କରି ବିଫଳ ହୋଇଥିଲା । ଜେଲ୍‌ ସୁରକ୍ଷା କର୍ମୀକୁ ଟଙ୍କା ଲାଞ୍ଚ ଦେଉଥିବା ନେଇ ଭିଜିଲାନ୍ସ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି ।

ଜେଲରେ ଆଇନଶୃଙ୍ଖଳା ଦୃଷ୍ଟିରୁ ୨୦୧୭ରେ ହାଇଦରକୁ ସମ୍ବଲପୁର ସର୍କଲ୍‌ ଜେଲକୁ ସ୍ଥାନାନ୍ତର କରାଯାଇଥିଲା ।

ହାଇଦର୍‌ ବିରୋଧରେ କେନ୍ଦ୍ରାପଡ଼ା ଟାଉନ ଥାନାରେ ସାତଟି ମାମଲା ରହିଛି । ଯାଜପୁର, ଭୁବନେଶ୍ୱର, କଟକ ଓ ଅନ୍ୟ ଥାନାରେ ପ୍ରାୟ ୨୦ଟି ସଙ୍ଗୀନ ମାମଲା ରହିଛି ତା’ ବିରୁଦ୍ଧରେ । ଏବେ କଟକ ବଡ଼ ମେଡିକାଲରୁ ଟମ୍ପଟ ମାରି ପୋଲିସର ନିଦ ହଜେଇ ଦେଇଛି ହାଇଦର୍‌ ।

ଏସ୍‌.ସି.ବି. ହସପିଟାଲର ସର୍ଜରୀ ୱାର୍ଡ଼ରେ ଡ୍ୟୁଟିରେ ଥିବା ନର୍ସ ମାନସୀରାଣୀ ପାଣି କହିଛନ୍ତି ଯେ ଖସିଯିବା ପୂର୍ବରୁ ହାଇଦର୍‌ ପୋଲିସ କର୍ମୀଙ୍କୁ ବିରିୟାନୀ ଖୁଆଇଥିଲା ।

ହାଇଦରର ସୁରକ୍ଷାରେ ଥିବା ପୋଲିସ କନଷ୍ଟେବଲମାନଙ୍କ ମଧ୍ୟରୁ ଜଣେ । ସେମାନେ ବିରିୟାନୀରେ ଥିବା ନିଶା ଦ୍ରବ୍ୟର ପ୍ରଭାବରେ ଅଚେତ ହୋଇଯାଇଥିଲେ ।

ହାଇଦରକୁ ଧରିବା ପାଇଁ କଟକ ପୋଲିସ ସମେତ ଚାରିଟି ଜିଲ୍ଲାର ପୋଲିସ ବଳ ଲାଗିପଡ଼ିଛନ୍ତି । ‘‘ସେ ଶୀଘ୍ର ଧରାଯିବ,’’ କହିଛନ୍ତି କଟକ ଡିସିପି ପ୍ରତୀକ ସିଂ ।