ଷ୍ଟିଲ ସିଟି ରାଉରକେଲାରେ ମୁଖ୍ୟମନ୍ତ୍ରୀ: ଦେଖନ୍ତୁ ଆଜି କାର୍ଯ୍ୟକ୍ରମର ଝଲକ

ଦୁଇ ଦିନିଆ ରାଉରକେଲା ଗସ୍ତରେ ଆସି ସୁନ୍ଦରଗଡ଼ ଜିଲ୍ଲା ପାଇଁ ମୋଟ ୯୬୪ କୋଟି ଟଙ୍କାର ପ୍ରକଳ୍ପ ଭେଟି ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ବିଭିନ୍ନ ଉନ୍ନୟନ ପ୍ରକଳ୍ପର ଉଦଘାଟନ କରିବା ସହ ଭିତ୍ତିପ୍ରସ୍ତର ମଧ୍ୟ ସ୍ଥାପନ କରିଛନ୍ତି । ବିଶ୍ରା ଛକରେ ଥିବା ନବନିର୍ମିତ ବୀର୍ସାମୁଣ୍ଡା ଆଥଲେଟିକ ଷ୍ଟାଡିୟମର ମଧ୍ୟ ଉଦଘାଟନ କରିଛନ୍ତି ନବୀନ ।

୧୦ ଏକର ପରିମିତ ଜମିରେ ୧୫୭.୨୧ କୋଟି ଟଙ୍କା ବ୍ୟୟରେ ନିର୍ମିତ ଏହି ଆଥଲେଟିକ ଷ୍ଟାଡିୟମ ପରିସରରେ ରହିଛି ଫୁଲବଲ ଷ୍ଟାଡିୟମ, ଖେଳାଳିଙ୍କ ପାଇଁ ଜିମ୍‌, ସୁମିଇଂ ପୁଲ୍‌ ଓ ମଲ୍ଟି କାର୍‌ ପାର୍କିଂ ବ୍ୟବସ୍ଥା ।

ପ୍ରାୟ ୧୦ହଜାର ଦର୍ଶକ ଏକକାଳୀନ ଏଠାରେ ବସି ଖେଳ ଉପଭୋଗ କରିପାରିବେ । ଏଠାରେ ଫୁଟବଲ ସମେତ ଡ୍ରାଗ୍‌ ଆଣ୍ଡ ଫିଲ୍ଡ ବିଭାଗର ସମସ୍ତ ପ୍ରତିଯୋଗିତା ଅନୁଷ୍ଠିତ ହୋଇପାରିବ ।

ଏଥିସହିତ ଏଠାରେ ନିର୍ମିତ ସୁଇମିଂ ପୁଲ୍‌ରେ ସନ୍ତରଣ ପ୍ରଶିକ୍ଷଣ ସହ ରାଜ୍ୟ ତଥା ଜାତୀୟସ୍ତରୀୟ ପ୍ରତିଯୋଗିତା ମଧ୍ୟ ଆୟୋଜନ ହୋଇପାରିବ ।

ଅନ୍ୟପକ୍ଷରେ ସୁନ୍ଦରଗଡ଼ ଜିଲ୍ଲାର ସ୍ବାସ୍ଥ୍ୟ, ଶିକ୍ଷା, ରାସ୍ତାଘାଟ, ପରିମଳ, କୃଷି ଏବଂ ପର୍ଯ୍ୟଟନ ଇତ୍ୟାଦିର ବିକାଶ ପାଇଁ ବିଭିନ୍ନ ପ୍ରକଳ୍ପର ଉଦ‌ଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିଥିଲେ ମୁଖ୍ୟମନ୍ତ୍ରୀ । ଏହାପରେ ମୁଖ୍ୟମନ୍ତ୍ରୀ ଅନ୍ତର୍ଜାତୀୟ ବିର୍ସାମୁଣ୍ଡା ହକି ଷ୍ଟାଡିୟମରେ ପହଞ୍ଚି ହକି ପ୍ରୋଲିଗ୍ ଟୁର୍ଣ୍ଣାମେଣ୍ଟ ଉଦଘାଟନ କରିଥିଲେ । ଏଥିସହ ଷ୍ଟାଡିୟମରେ ବସି ଭାରତ ଓ ଜର୍ମାନୀ ମ୍ୟାଚ୍ ଦେଖିଥିଲେ ।

ବୀର୍ସାମୁଣ୍ଡା ହକି ଷ୍ଟାଡିୟମ ବିଶ୍ୱର ସର୍ବବୃହତ ହକି ଷ୍ଟାଡିୟମର ଗୌରବ ଅର୍ଜନ କରି ଗିନିଜ ବୁକ ଅପ ୱାର୍ଲଡ ରେକର୍ଡସରେ ସ୍ଥାନୀତ ହୋଇଛି । ଏଥିପାଇଁ ପୁରସ୍କାର ଗ୍ରହଣ କରିବେ ନବୀନ ପଟ୍ଟନାୟକ ।

ଆଜି ରାତିରେ ମୁଖ୍ୟମନ୍ତ୍ରୀ ହକି ଭିଲେଜରେ ରହିବେ । ଆସନ୍ତାକାଲି ଭୁବନେଶ୍ବର ଫେରି ଆସିବେ ।