ବଲାଙ୍ଗିରରେ ବୋଲେରୋ ସହ ଧକ୍କା ପରେ ଜଳିଗଲା ବାଇକ୍; ବାପ ଓ ପୁଅ ମୃତ; ମା’ ଓ ପୁଅ ଗୁରୁତର

ଏହି ଭୟଙ୍କର ସଡ଼କ ଦୁର୍ଘଟଣା ଘଟିଛି ବଲାଙ୍ଗିର ଜିଲ୍ଲାର ଗୁଡ଼ଭେଲାରେ । ଏକ ବୋଲେରୋ ସହ ଧକ୍କା ହେବା ପରେ ଜଳିଯାଇଥିଲା ବାଇକଟି ।

ଘଟଣା ସ୍ଥଳରେ ବାପା ଓ ଜଣେ ପୁଅ ମୃତ୍ୟୁ ବରଣ କରିଥିଲେ । ମାଆ ଓ ଆଉ ଜଣେ ପୁଅ ଗୁରୁତର ଅବସ୍ଥାରେ ପଡ଼ିଥିବା ଦେଖି ସ୍ଥାନୀୟ ଲୋକେ ସେମାନଙ୍କୁ ଡାକ୍ତରଖାନାରେ ପହଞ୍ଚାଇଥିଲେ ।

ଗୁଡ଼ଭେଲା ବ୍ଲକ ଡାହିମାଲ ଛକରେ ଘଟିଛି ଏହି ମର୍ମନ୍ତୁଦ ଦୁର୍ଘଟଣା । ବାପାମାଆ ଓ ଦୁଇ ପୁଅ ବାଇକ ଯୋଗେ ବଲାଙ୍ଗିରରୁ କଳାହାଣ୍ଡି ଯାଉଥିବା ବେଳେ ତାଙ୍କ ବାଇକକୁ ଧକ୍କା ଦେଇଥିଲା ଏକ ବୋଲେରୋ ।

ଏହି ଧକ୍କା ଏତେ ଜୋର୍ ଥିଲା ଯେ ଘଟଣାସ୍ଥଳରେ ବାଇକ୍ ଜଳିଯାଇଥିଲା । ବୋଲେରୋର ଆଗ ଡାହାଣ ପଟ କ୍ଷତିଗ୍ରସ୍ତ ହୋଇଥିଲା । ଆହତ ମା’ ଓ ପୁଅକୁ ତୁଷୁରା ଡାକ୍ତରଖାନାରେ ଭର୍ତ୍ତି କରାଯାଇଛି ।

ସ୍ଥାନୀୟ ଲୋକଙ୍କ କହିବା ଅନୁସାରେ ଉଭୟ ବୋଲେରୋ ଓ ବାଇକ୍ ଭୀଷଣ ବେଗରେ ଗତି କରୁଥିବା ବେଳେ ଏହି ଦୁର୍ଘଟଣା ଘଟିଥିଲା ।

ମୃତକମାନେ ହେଲେ କଳାହାଣ୍ଡି ଜିଲ୍ଲା ରିଷିଦା ଏମ୍. ରାମପୁର ଥାନା ଅଞ୍ଚଳର ମାଖୁନୁ ବିଶି ଓ ତାଙ୍କ ବଡ଼ ପୁଅ ଶମ୍ଭୁ ବିଶି । ମାଖନୁଙ୍କ ସ୍ତ୍ରୀ ଓ ସାନ ପୁଅ ଗୁରୁତର ଆହତ ହୋଇ ଏବେ ଚିକିତ୍ସାଧୀନ ଅଛନ୍ତି ।