ଆୟ-ବହିର୍ଭୁତ ସମ୍ପତି ଠୁଳ କରିବା ଅଭିଯୋଗର ସାମନା କରୁଥିବା ଭୁବନେଶ୍ୱରର କୋଟିପତି ଅଙ୍ଗନବାଡି଼ ଦିଦି କବିତା ମଥାନ ଗିରଫ ହୋଇଛନ୍ତି । କବିତା ମଥାନଙ୍କ ଘରେ ଭିଜିଲାନ୍ସ ବିଭାଗ ଚଢ଼ାଉ କରିଥିଲା । ଚଢ଼ାଉ ବେଳେ ଏହି ଅଙ୍ଗନବାଡି଼ କର୍ମୀଙ୍କ ମାଲିକାନାରେ ଚାରି କୋଟି ଟଙ୍କାର ସମ୍ପତ୍ତି ଥିବା ଜାଣିପାରିଛି ଭିଜିଲାନ୍ସ ବିଭାଗ । ଭୁବନେଶ୍ୱର ଉପକଣ୍ଠ କୋରଡକଣ୍ଟା ଅଙ୍ଗନବାଡି଼ କେନ୍ଦ୍ରରେ ଆଙ୍ଗନବାଡି଼ କର୍ମୀ ଭାବରେ କାର୍ଯ୍ୟ କରୁଥିଲେ କବିତା ମଥାନ । ସେପ୍ଟେମ୍ବର ୧୪ ତାରିଖରେ କବିତା ମଥାନଙ୍କୁ ଅଟକ ରଖି ଚଢ଼ାଉ ଜାରି ରଖିଥିଲା ଇିଜିଲାନ୍ସ ବିଭାଗ । କବିତାଙ୍କ ଘର ସମେତ ତାଙ୍କ ସହ ଜଡ଼ିତ ଅନ୍ୟ ସ୍ଥାନରେ ବି ଭିଜିଲାନ୍ସ ବିଭାଗର ଛଅଟି ଟିମ୍ ଏକକାଳୀନ ଚଢ଼ାଉ କରିଥିଲା । ୧୦ ଜଣ ଡି.ଏସ୍.ପି. ଓ ଛଅ ଜଣ ଆଇ.ଆଇ.ସି.ଙ୍କ ନେତୃତ୍ୱରେ ଭୋର୍ ୬ଟା ସମୟରୁ ଚଢ଼ାଉ ଆରମ୍ଭ ହୋଇଥିଲା । ଭୁବନେଶ୍ୱର ସମେତ ଛଅଟି ସ୍ଥାନରେ ଚଢ଼ାଉ ହୋଇଥିଲା । ଭୁବନେଶ୍ୱର କୋରଡକଣ୍ଟାରେ ଥିବା କବିତାଙ୍କ ଦୁଇ ମହଲା ବିଶିଷ୍ଟ ଘର, ଝାରପଡାରେ ଥିବା ଏକ ଚାରି ମହଲା ଘର ସାଙ୍ଗକୁ ଏକ ତିନିମହଲା ଘର ଓ ଦୁଇଟି ଦୁଇମହଲା ଘର ଠାବ ହୋଇଛି । କବିତାଙ୍କ ମୋଟ ୧୪ଟି ପ୍ଲଟ୍ ଠାବ ହୋଇଛି । ସେଥିରେ ଭୁବନେଶ୍ୱରର ବିଭିନ୍ନ ସ୍ଥାନରେ ୧୦ଟି ପ୍ଲଟ୍ ରହିଛି। କବିତାଙ୍କ ମାଲିକାନାରେ ଗୋଟିଏ କାର୍ ସାଙ୍ଗକୁ ତିନିଟି ବାଇକ୍, ଦୁଇ ଲକ୍ଷ ଟଙ୍କାରୁ ଅଧିକର ଇନସ୍ୟୁରାନ୍ସ ଜମା, ୬ ଲକ୍ଷ ୩୬ ହଜାର ଟଙ୍କାର ସୁନା ଗହଣା ସାଙ୍ଗକୁ ବହୁ ମୂଲ୍ୟବାନ ଆସବାବପତ୍ର ଠାବ କରିଛି ଭିଜିଲାନ୍ସ ବିଭାଗ । କବିତା ମଥାନଙ୍କ ଦରମା ମାସକୁ ସାଢେ ସାତ ହଜାର ଟଙ୍କା । ସେ ନିଜ ଚାକିରି ଟଙ୍କାରେ ଏତେ ସମ୍ପତ୍ତି ହାସଲ କରିନାହାନ୍ତି ବୋଲି କହିଥିଲେ । ସେ ନିଜ ସ୍ୱାମୀଙ୍କ ରୋଜଗାରରେ ଏ ସବୁ ସମ୍ପତ୍ତି କରିଛନ୍ତି ବୋଲି କହିଥିଲେ। ‘‘ମୁଁ କୌଣସି ଦୁର୍ନୀତିରେ ଲିପ୍ତ ନାହିଁ । କେହି ଚକ୍ରାନ୍ତ କରି ମୋ’ ବିରୁଦ୍ଧରେ ଅଭିଯୋଗ କରି ମୋତେ ଫସାଇବାକୁ ଚାହୁଁଛି,’’ କହିଥିଲେ ଆଙ୍ଗନବାଡି଼ କର୍ମୀ କବିତା ମଥାନ । ହେଲେ ସେ କେମିତି ଚାରି କୋଟି ଟଙ୍କାର ସମ୍ପତ୍ତି ହାସଲ କଲେ ତାହା ବୁଝାଇପାରି ନ ଥିବାରୁ ତାଙ୍କୁ ସେପ୍ଟେମ୍ବର ୧୫ ତାରିଖରେ ଗିରଫ କରାଯାଇଥିଲା । କବିତାଙ୍କ ନା’ରେ ପୂର୍ବରୁ ଆୟ-ବହିର୍ଭୁତ ସମ୍ପତ୍ତି ଠୁଳ କରୁଥିବା ଅଭିଯୋଗ ଆସିଥିଲା । ବିଶେଷ କରି କୁନି କୁନି ପିଲାମାନଙ୍କ ପାଇଁ ସରକାରଙ୍କ ତରଫରୁ ଆସୁଥିବା ଅଣ୍ଡା ଓ ଛତୁଆ ଆଦିକୁ ସେ ହେରଫେର କରୁଛନ୍ତି ବୋଲି ଅଭିଯୋଗ ହୋଇଥିଲା । କୋର୍ଟଙ୍କ ଠାରୁ ଅନୁମତି ଆଣି ଭିଜିଲାନ୍ସ ବିଭାଗ କବିତା ମଥାନଙ୍କ ଘରେ ରେଡ଼ କରିଥିଲା । ଜଣେ ଅଙ୍ଗନାବାଡି କର୍ମୀ କିଭଳି ଭାବେ ଚାରି କୋଟି ଟଙ୍କାର ସମ୍ପତ୍ତିର ମାଲିକାଣୀ ହେଲେ ତାକୁ ନେଇ ଖୋଳତାଡ଼ ଜାରି ରଖିଛି ଭିଜିଲାନ୍ସ ବିଭାଗ ।
