ପୁରୀ: ଦୁର୍ଘଟଣା ପରେ ରାସ୍ତାରେ ପଡ଼ିଥିବା ଯୁବତୀଙ୍କୁ ଉଦ୍ଧାର କଲେ 5T ସଚିବ ଭି.କେ. ପାଣ୍ଡିଆନ୍

ପୁରୀ-ଭୁବନେଶ୍ୱର ଜାତୀୟ ରାଜପଥର ମାଳତୀପାଟପୁର ଛକରେ ଗୋଟିଏ ଗାଈ ଦେହରେ ସ୍କୁଟି ଧକ୍କା କରି ଗୁରୁତର ଆହତ ହୋଇଥିଲେ ୨୩ ବର୍ଷୀୟା ଯୁବତୀ ଅନ୍ନପୁର୍ଣ୍ଣା ସାହୁ । ପୁରୀ ଜେଲ୍ ରୋଡରେ ଥିବା ଏକ ଗାଡ଼ି ଶୋ’ ରୁମରେ ସେ କାର୍ଯ୍ୟ କରନ୍ତି । ଦୁର୍ଘଟଣା (road accident in Puri) ପରେ ସେ ଚେତାଶୂନ୍ୟ ହୋଇ ରକ୍ତାକ୍ତ ଅବସ୍ଥାରେ ପଡ଼ିରହିଥିଲେ ରାସ୍ତା ଉପରେ ।

ଅନ୍ନପୂର୍ଣ୍ଣାଙ୍କର ଅଫିସ୍ ଛୁଟି ଥିବା ଯୋଗୁଁ ସେ ମାଳତୀପାଟପୁର ଆଡ଼କୁ ନିଜ ସ୍କୁଟିରେ ଯାଉଥିବା ବେଳେ ଏହି ଦୁର୍ଘଟଣା (road accident in Puri) ହୋଇଥିଲା ।

ସେହି ସମୟରେ ପୁରୀରୁ ଏକ ସମୀକ୍ଷା ବୈଠକ ସାରି ଫେରୁଥିଲେ ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକଙ୍କ ବ୍ୟକ୍ତିଗତ ସଚିବ ସହ ରାଜ୍ୟର 5T ସଚିବ ଭି.କେ. ପାଣ୍ଡିଆନ୍ (5T secretary VK Pandian)। ଅନ୍ନପୁର୍ଣ୍ଣାଙ୍କୁ ନିସ୍ତେଜ ଓ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଥିବା ଦେଖି ସେ ନିଜ କାର୍ ରୋକିଥିଲେ ।

ଆହତ ଅନ୍ନପୂର୍ଣ୍ଣାଙ୍କୁ ଉଦ୍ଧାର କରି ନିଜ ଗାଡିରେ ସଦର ମୁଖ୍ୟ ଚିକିତ୍ସାଳୟ ନେଇଯାଇଥିଲେ ପାଣ୍ଡିଆନ୍ (5T secretary VK Pandian)। ସେଠାରେ ତାଙ୍କୁ ଭର୍ତ୍ତି କରାଇ ତୁରନ୍ତ ତାଙ୍କର ଚିକିତ୍ସା ପାଇଁ ନିର୍ଦ୍ଦେଶ ଦେଇଥିଲେ ।

ସ୍ୱାସ୍ଥ୍ୟ ମିତ୍ର ବିନୋଦିନୀ ପ୍ରଧାନ ଓ ଭାରତୀ ମହାପାତ୍ର ଅନ୍ନପୁର୍ଣ୍ଣାଙ୍କୁ ଗାଡ଼ିରୁ ଓହ୍ଲାଇ ଏକ ହ୍ୱିଲ ଚେୟାରରେ ନେଇ ଡାକ୍ତରଙ୍କ ପାଖରେ ପ୍ରାଥମିକ ଚିକିତ୍ସା କରାଇଥିଲେ ଓ ତୁରନ୍ତ ସର୍ଜରୀ ୱାର୍ଡରେ ଭର୍ତ୍ତି କରିଥିଲେ ।

ବିନୋଦିନୀ କହିଛନ୍ତି ଯେ ଅନ୍ନପୂର୍ଣ୍ଣାଙ୍କର ଦୁଇଟି ଷ୍ଟିଚ୍ ପଡ଼ିଥିଲା ଓ ଚିକିତ୍ସା ପରେ ସେ ବିପଦ ବାହାରକୁ ଆସିଥିଲେ ।

‘‘ସାର୍ (ଭି.କେ. ପାଣ୍ଡିଆନ୍) ଯଦି ତାଙ୍କୁ (ଅନ୍ନପୂର୍ଣ୍ଣାଙ୍କୁ) ରାସ୍ତାରୁ ଉଠାଇ ହସପିଟାଲ୍ ଆଣି ନ ଥାନ୍ତେ ତେବେ ଅଧିକ ରକ୍ତସ୍ରାବ ହୋଇ ତାଙ୍କ ଜୀବନ ଚାଲିଯାଇଥାନ୍ତା । ସାର୍ ଏତେ ବଡ଼ ଲୋକ ହୋଇ ବି ଆମ ପରି ଜଣେ ଝିଅର ଜୀବନ ବଞ୍ଚାଇଥିବାରୁ ତାଙ୍କୁ ଅଶେଷ ଧନ୍ୟବାଦ,’’ କହିଛନ୍ତି ବିନୋଦିନୀ ।

ପରେ କୁମ୍ଭାରପଡ଼ା ପୋଲିସ ହସପିଟାଲରେ ପହଞ୍ଚି ଅନ୍ନପୁର୍ଣ୍ଣାଙ୍କୁ ପଚରାଉଚୁରା କରିବା ପରେ ଜଣାପଡ଼ିଥିଲା ଯେ ତାଙ୍କ ଘର ପୁରୀ ସଦର ଥାନା ଅନ୍ତର୍ଗତ ବ୍ରହ୍ମଗିରି ନିକଟ ହଳଦିଆ ଗ୍ରାମରେ । ପରିବାର ଲୋକଙ୍କୁ ଖବର ଦେବା ପରେ ସେମାନେ ଆସି ଅନ୍ନପୂର୍ଣ୍ଣାଙ୍କୁ ଘରକୁ ନେଇଯାଇଥିଲେ ।

ଅନ୍ନପୁର୍ଣ୍ଣା ସାହୁ ପୁରୀ ଜେଲ୍ ରୋଡ଼ରେ ଥିବା ଏକ ଗାଡ଼ି ଶୋ’ ରୁମରେ ସେ କାର୍ଯ୍ୟ କରନ୍ତି । ଦୁର୍ଘଟଣା ପରେ ସେ ଆହତ ହୋଇ ହସପିଟାଲରେ ପହଞ୍ଚିବା ଓ ଚିକିତ୍ସିତ ହେବା ଖବର ଶୁଣି ଶୋ’ରୁମରେ ତାଙ୍କ ସହକର୍ମୀମାନେ ଆଶ୍ୱସ୍ତ ହୋଇଥିଲେ । ପାଣ୍ଡିଆନଙ୍କୁ ସେମାନେ ବହୁତ ଧନ୍ୟବାଦ ଦେଇଥିଲେ ।

‘‘ପାଣ୍ଡିଆନ୍ ସାର୍ ଅନ୍ନପୂର୍ଣ୍ଣାଙ୍କୁ ଉଦ୍ଧାର ନ କରିଥିଲେ ତାଙ୍କ ପ୍ରାଣ ହୁଏତ ଚାଲିଯାଇଥାନ୍ତା । ପାଣ୍ଡିଆନ୍ ସାରଙ୍କୁ ହୃଦୟରୁ ଧନ୍ୟବାଦ,’’ କହିଛନ୍ତି ଶୋ’ରୁମ୍ ମ୍ୟାନେଜର ଚିତ୍ତରଞ୍ଜନ ଦାସ ।

ଆଇ.ଏ. ଏସ. ଅଫିସର ଭି.କେ. ପାଣ୍ଡିଆନ୍ (IAS officer VK Pandian) ନିକଟରେ ନିଜେ ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକଙ୍କୁ (Chief Minister Naveen Patnaik) ଗାଡ଼ିରେ ବସାଇ ନିଜେ ଡ୍ରାଇଭର ସିଟରେ ବସି ଗାଡ଼ି ଚଳାଇଥିବା ଯୋଗୁଁ ଚର୍ଚ୍ଚାରେ ଥିଲେ ।

ସ୍ୱାଧୀନତା ଦିବସ ଅବସରରେ ନବୀନ ପଟ୍ଟନାୟକ (Naveen Patnaik) ଭୁବନେଶ୍ୱରର ପ୍ରଦର୍ଶନୀ ପଡ଼ିଆରେ ଆୟୋଜିତ ପରେଡ଼ ସ୍ଥଳକୁ ଯେଉଁ କାରରେ ଆସି ପହଞ୍ଚିଥିଲେ ସେହି କାରର ଡ୍ରାଇଭର ସିଟରେ ଦେଖିବାକୁ ମିଳିଥିଲା ପାଣ୍ଡିଆନଙ୍କୁ (5T secretary VK Pandian)। ଫେରିବା ସମୟରେ ବି ମୁଖ୍ୟ ମନ୍ତ୍ରୀଙ୍କୁ କାରରେ ବସିଇ ନିଜେ ଡ୍ରାଇଭ୍ କରି ନେଇଯାଇଥିଲେ ପାଣ୍ଡିଆନ୍ । କରୋନା ସଂକ୍ରମଣ ସ୍ଥିତିରୁ ଉପୁଜିଥିବା ସୁରକ୍ଷା କାରଣରୁ ପାଣ୍ଡିଆନ୍ ଏମିତି କରିଥିଲେ ବୋଲି ଜଣାପଡ଼ିଥିଲା ।